হ’ব নেকি তৃতীয় বিশ্বযুদ্ধৰ সূচনা? ট্ৰাম্পৰ বিৰুদ্ধে বিশ্বজুৰি ক্ষোভ…

ভেনিজুৱেলাৰ বিৰুদ্ধে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ অভিযানে সমগ্ৰ বিশ্বতে উত্তেজনা বৃদ্ধি কৰিছে। বিশ্বজুৰি ট্ৰাম্পৰ বিৰুদ্ধে সৃষ্টি হৈছে ক্ষোভৰ। কিয়নো এই পদক্ষেপক তৃতীয় বিশ্বযুদ্ধৰ ফিৰিঙতি বুলি অভিহিত কৰা হৈছে । ট্ৰাম্পৰ এই কাৰ্যত গভীৰভাৱে বিচলিত হৈ মুকলিকৈ গৰিহণা দিছে বহু দেশে।

শনিবাৰে পুৱা কাৰাকাছত আমেৰিকাৰ সেনাবাহিনীৰ বৃহৎ আক্ৰমণত সাধাৰণ নাগৰিক আৰু জোৱানসহ কমেও ৮০ জন লোক নিহত হয়। সংবাদ মাধ্যমৰ বাতৰি অনুসৰি ভেনিজুৱেলাৰ এজন জ্যেষ্ঠ বিষয়াই কয় যে, এই আক্ৰমণত ৮০ জন লোকৰ মৃত্যু হৈছে। মন কৰিবলগীয়া যে ভেনিজুৱেলাত আমেৰিকাই এক বৃহৎ সামৰিক অভিযান চলাইছিল, য’ত ভেনিজুৱেলাৰ ৰাষ্ট্ৰপতি নিকোলাছ মাদুৰো আৰু তেওঁৰ পত্নীক বন্দী কৰা হয়।

ভেনিজুৱেলাৰ ৰাষ্ট্ৰপতি মাদুৰোক অপহৰণ কৰাৰ পিছতে ট্ৰাম্পে প্ৰশ্নৰ সন্মুখীন হৈছে। যদিও সামৰিক আৰু অৰ্থনৈতিক শক্তিৰ ক্ষেত্ৰত ভেনিজুৱেলাৰ দৰে দেশ আমেৰিকাৰ সৈতে কোনো তুলনা নহয়, তথাপিও বিশ্বজুৰি ড’নাল্ড ট্ৰাম্পৰ এই আক্ৰমণক এক ডাঙৰ ভুল বুলি গণ্য কৰা হৈছে।

ট্ৰাম্পে নিজৰ শত্ৰুৰ সংখ্যা বৃদ্ধি কৰিলে

বিশ্বাস কৰা হয় যে ভেনিজুৱেলাক আক্ৰমণ কৰি ৰাষ্ট্ৰপতি মাদুৰো আৰু তেওঁৰ পত্নীক পনবন্দী কৰি ট্ৰাম্পে শত্ৰুৰ সংখ্যা বৃদ্ধি কৰিছে। শত্ৰুক তেওঁৰ বিৰুদ্ধে ফ্ৰণ্ট আৰম্ভ কৰাৰ সুযোগ দিছে। লগতে কোৱা হৈছে যে ভেনিজুৱেলাৰ বিৰুদ্ধে ব্যৱস্থা গ্ৰহণ কৰি ট্ৰাম্পে বিশ্বত উত্তেজনা আৰু যুদ্ধৰ একাধিক ফ্ৰণ্ট মুকলি কৰিছে। ইয়াৰ ফলত প্ৰশ্ন উত্থাপন হয় যে মাদুৰোক কেন্দ্ৰ কৰি ক্ৰমাৎ বৃদ্ধি পোৱা উত্তেজনাই বিশ্বযুদ্ধৰ সূচনা কৰিব পাৰেনে?

ট্ৰাম্পৰ বিৰুদ্ধে প্ৰতিবাদ

বিশ্বৰ বহু দেশত চলি আছে আমেৰিকাৰ বিৰুদ্ধে প্ৰতিবাদ। পেৰিছত ট্ৰাম্পৰ এই কাৰ্যৰ বাবে ক্ষুব্ধ ৰাইজে আমেৰিকাৰ পতাকাত অগ্নিসংযোগ কৰে। ইফালে কিউবাত আমেৰিকাৰ বিৰুদ্ধে ৰাজপথলৈ ওলাই আহি  ৰেলী অনুষ্ঠিত কৰে। ভেনিজুৱেলাৰ ৰাষ্ট্ৰপতি মাদুৰোক মুক্তিৰ দাবী জনাইছে কিউবাৰ ৰাষ্ট্ৰপতিগৰাকীয়ে। প’ৰ্টলেণ্ডতো শতাধিক লোকে মাদুৰোৰ মুক্তিৰ দাবীত আমেৰিকাৰ বিৰুদ্ধে প্ৰতিবাদ সাব্যস্ত কৰে।

মাদুৰোৰ মুক্তিৰ দাবী চীনৰ

ভেনিজুৱেলাৰ ৰাষ্ট্ৰপতি নিকোলাছ মাদুৰো আৰু তেওঁৰ পত্নীক শীঘ্ৰে মুকলি কৰি দিবলৈ আমেৰিকাক দাবী জনাইছে চীনে। দেওবাৰে (৪ জানুৱাৰী) চীনৰ বৈদেশিক মন্ত্ৰালয়ে এক বিবৃতি প্ৰকাশ কৰি কয় যে, ভেনিজুৱেলাৰ ৰাষ্ট্ৰপতিক এনেদৰে নিজৰ দেশলৈ লৈ যোৱাটো ভুল। আলোচনাৰ জৰিয়তে এই সমস্যা সমাধান কৰিব লাগে বুলি মন্ত্ৰালয়ে কয়। ইফালে ভেনিজুৱেলাত আমেৰিকাৰ এই কাৰ্যক গুণ্ডামী বুলি অভিহিত কৰিছে উত্তৰ কোৰিয়াই । উত্তৰ কোৰিয়াৰ বৈদেশিক মন্ত্ৰালয়ে কয় যে, আমেৰিকাৰ এই কাৰ্যই যিকোনো দেশৰ স্বাধীনতা আৰু সাৰ্বভৌমত্বৰ ওপৰত কৰা আটাইতকৈ গুৰুতৰ আক্ৰমণ।

ৱাশ্বিংটনত ট্ৰাম্পৰ বিৰুদ্ধে প্ৰতিবাদ

ৱাশ্বিংটনত আমেৰিকাৰ সামৰিক ব্যৱস্থা আৰু ভেনিজুৱেলা নিয়ন্ত্ৰণ সন্দৰ্ভত প্ৰাক্তন ৰাষ্ট্ৰপতি ড’নাল্ড ট্ৰাম্পৰ বক্তব্যৰ বিৰুদ্ধে প্ৰতিবাদ সাব্যস্ত কৰা হয়। হোয়াইট হাউছৰ বাহিৰত বৃহৎ সংখ্যক লোক সমবেত হয়। প্ৰতিবাদকাৰীসকলে “ভেনিজুৱেলাৰ বিৰুদ্ধে যুদ্ধ নহয়” আদি শ্লোগান দি প্ৰতিবাদৰ বেনাৰ প্ৰদৰ্শন কৰে। নিউয়ৰ্কৰ টাইমছ স্কোৱাৰতো ট্ৰাম্পক গ্ৰেপ্তাৰ কৰাৰ দাবীত এক সমাৱেশ অনুষ্ঠিত কৰা হয়।

পেৰিছত ৰাজপথলৈ ওলাই আহিল মানুহ

পেৰিছত বাওঁপন্থী প্ৰতিবাদকাৰীয়ে আমেৰিকাৰ আক্ৰমণক গৰিহণা দি ভেনিজুৱেলাৰ পতাকা উৰুৱাই। গ্ৰীচৰ ৰাজধানী এথেন্সতো ভেনিজুৱেলাৰ ৰাষ্ট্ৰপতি নিকোলাছ মাদুৰোক গ্ৰেপ্তাৰ কৰাৰ বিৰুদ্ধে হাজাৰ হাজাৰ লোকে প্ৰতিবাদ সাব্যস্ত কৰে। ইটালীৰ ৰাজধানী ৰোমত আমেৰিকাৰ সামৰিক অভিযানৰ প্ৰতিবাদত নাগৰিকে ৰাজপথলৈ ওলাই আহে। একেদৰে আৰ্জেণ্টিনা আৰু কলম্বিয়াত আমেৰিকাৰ হস্তক্ষেপৰ বিৰুদ্ধে মাত মাতিছিল।

টিভি-9 ব্যুৰোৰ প্ৰতিবেদন