কৰ্তব্য পথত এদল পুৰুষ চি আৰ পি এফ জোৱানক নেতৃত্ব দিব ২৬ বছৰীয়া কাশ্মীৰি বিষয়া ছিমৰণে
২৬ জানুৱাৰীত অনুষ্ঠিত হ’বলগীয়া গণৰাজ্য দিৱসৰ পেৰেডত ভাৰতীয় সেনাৰ আন বাহিনীৰ লগতে থাকিব কেন্দ্ৰীয় সংৰক্ষিত আৰক্ষী বাহিনীৰ এটা পুৰুষ দল। প্ৰতিবাৰেই অৱশ্যে থাকে। কিন্তু এইবাৰ এই দলটো এক ব্যতিক্ৰম, কাৰণ এই দলটোক নেতৃত্ব দিব এগৰাকী মহিলা বিষয়াই।
গণৰাজ্য দিৱসলৈ মাত্ৰ তিনিদিন বাকী। ইতিমধ্যেই দেশবাসী সাজু হৈছে বিশ্বৰ সৰ্ববৃহৎ গণতন্ত্ৰৰ এই মহা উৎসৱ উদযাপনৰ বাবে। কৰ্তব্য পথত পেৰেডৰ বাবে ভাৰতীয় সেনা বাহিনী আৰু আৰক্ষী বাহিনীয়ে ইতিমধ্যে অনুশীলন তুংগত কৰি তুলিছে। এক ঐতিহাসিক মুহূৰ্তৰ সাক্ষী হ’ব দেশবাসী। ঐতিহাসিক বুলি কোৱাৰো কাৰণ আছে, যাৰ বাবে এই প্ৰতিবেদন লৈ আহিছোঁ আপোনালোকলৈ।
২৬ জানুৱাৰীত অনুষ্ঠিত হ’বলগীয়া গণৰাজ্য দিৱসৰ পেৰেডত ভাৰতীয় সেনাৰ আন বাহিনীৰ লগতে থাকিব কেন্দ্ৰীয় সংৰক্ষিত আৰক্ষী বাহিনীৰ এটা পুৰুষ দল। প্ৰতিবাৰেই অৱশ্যে থাকে। কিন্তু এইবাৰ এই দলটো এক ব্যতিক্ৰম, কাৰণ এই দলটোক নেতৃত্ব দিব এগৰাকী মহিলা বিষয়াই। এটা পুৰুষ দলক এইদৰে পেৰেডত নেতৃত্ব দিয়া প্ৰথমগৰাকী মহিলা বিষয়া হিচাপে ইতিহাস ৰচিবলৈ সাজু হৈছে বাহিনীটোৰ এগৰাকী সহকাৰী কামাণ্ডেণ্ট ছিমৰণ বালা। জম্মু-কাশ্মীৰৰ এই ২৬ বছৰীয়া যুৱতী বিষয়াগৰাকীক লৈ দেখা গৈছে ব্যাপক চৰ্চা।
ছিমৰণ বালাই এই আনুষ্ঠানিক পেৰেডত ১৪০ জনতকৈ অধিক পুৰুষ জোৱানৰ এটা দলক নেতৃত্ব দিব, যিয়ে দেশৰ সৰ্ববৃহৎ অৰ্ধসামৰিক বাহিনীৰ বাবে আৰু দেশজুৰি ইউনিফৰ্ম পৰিহিত মহিলাসকলৰ বাবে এক বিৰল আৰু শক্তিশালী মাইলৰ খুঁটি হিচাপে চিহ্নিত কৰিব। গণৰাজ্য দিৱসত সৰ্বপুৰুষ চি আৰ পি এফ ইউনিটৰ নেতৃত্ব দিবলৈ লোৱা মহিলা বিষয়া ছিমৰণ বালা কোন?
জম্মু-কাশ্মীৰৰ ৰাজৌৰী জিলাৰ নৌশ্বেৰাৰ এখন সীমান্তৱৰ্তী চহৰত ঘৰ ছিমৰণ বালাৰ। তেওঁৰ যাত্ৰাত দৃঢ়তা আৰু নীৰৱ সাধনা স্পষ্টকৈ দেখা গৈছে। চি আৰ পি এফত বিষয়া হিচাপে যোগদান কৰা ছিমৰণ নিজৰ জিলাৰ প্ৰথমগৰাকী মহিলা বুলি জানিব পৰা গৈছে।
২০২৩ চনত ইউ পি এছ চিৰ কেন্দ্ৰীয় সশস্ত্ৰ আৰক্ষী বাহিনী (চি এ পি এফ)ৰ প্ৰথমটো পৰীক্ষাত অৱতীৰ্ণ হৈ ৮২ সংখ্যক সৰ্বভাৰতীয় ৰেংক লাভ কৰিছিল ছিমৰণে। উল্লেখযোগ্য যে জম্মু-কাশ্মীৰৰ পৰা সেই বছৰ যোগ্যতা অৰ্জন কৰা একমাত্ৰ মহিলাগৰাকীয়েই সমগ্ৰ অঞ্চলটোৰ উচ্চাকাংক্ষী যুৱক-যুৱতীসকলৰ বাবে আদৰ্শ হিচাপে দ্ৰুতগতিত আত্মপ্ৰকাশ কৰিছিল।
ইণ্ডিয়া টুডেৰ এক প্ৰতিবেদন অনুসৰি, গণৰাজ্য দিৱসৰ পেৰেডৰ আখৰাৰ সময়ত এক ষ্টেণ্ডআউট প্ৰদৰ্শনৰ পিছত তেওঁক সৰ্বপুৰুষ দলটোৰ মুৰব্বী হিচাপে নিৰ্বাচিত কৰা হয়, য’ত তেওঁৰ আত্মবিশ্বাস, ড্ৰিল আৰু নেতৃত্বৰ নিখুঁততাই জ্যেষ্ঠ বিষয়াসকলৰ দৃষ্টি আকৰ্ষণ কৰে। ফলত ২৬ জানুৱাৰীত চি আৰ পি এফৰ ইউনিটৰ নেতৃত্ব দিয়াৰ গৌৰৱ অৰ্জন কৰিবলৈ সক্ষম হয় ছিমৰণ।
ভাৰতবৰ্ষই গণৰাজ্য দিৱস আয়োজন কৰাৰ লগে লগে কৰ্তব্য পথত ইউনিফৰ্ম পৰিহিত ছিমৰণ বালাৰ খোজটো ভৱিষ্যত প্ৰজন্মৰ মহিলাৰ বাবে গঢ়ি তোলা নতুন পথৰ এক শক্তিশালী প্ৰতীক হিচাপে থিয় দিব। সমগ্ৰ দেশৰ দৰ্শকৰ বাবে সন্মুখৰ পৰা কমাণ্ডিং কৰা এগৰাকী যুৱতী বিষয়াৰ দৃশ্যই সশস্ত্ৰ বাহিনীৰ ভিতৰত প্ৰতিনিধিত্বৰ বিকাশৰ এক শক্তিশালী প্ৰতীক হিচাপে কাম কৰিব।
হিন্দুস্তান টাইমছৰ সৈতে হোৱা এক বাৰ্তালাপত ছিমৰণে এই সুযোগক সন্মান আৰু দায়িত্ব দুয়োটা বুলি অভিহিত কৰে। ছিমৰণে কয়, “ভাৰতীয় গণৰাজ্যত অনুষ্ঠিত এই ৰাষ্ট্ৰীয় পৰ্যায়ৰ অনুষ্ঠানত চি আৰ পি এফৰ দলটোক নেতৃত্ব দিয়াৰ সুযোগ পাই মই সঁচাকৈয়ে সন্মানিত অনুভৱ কৰিছো।” তেওঁ লগতে কয়, “প্ৰস্তুতি এমাহৰো অধিক পূৰ্বে আৰম্ভ হৈছিল। আমি প্ৰতিজন ব্যক্তিৰ ওপৰত নিৰ্দিষ্ট মনোনিৱেশৰ সৈতে কঠোৰ ড্ৰিল অনুশীলন কৰিছিলো। আমি দলৰ সংহতি, নিখুঁততা আৰু আদেশ কেনেকৈ গ্ৰহণ কৰা হয় আৰু নিষ্পাদন কৰা হয় তাৰ ওপৰত গুৰুত্ব আৰোপ কৰিছিলো। মই আশা কৰোঁ এই সকলোবোৰে অন্তিম দিনটোত প্ৰতিফলিত হ’ব।”
সঘনাই সীমান্তৰ সিপাৰৰ পৰা গুলীচালনাৰ সাক্ষী হোৱা দেশৰ সীমামূৰীয়া জিলাত ডাঙৰ-দীঘল হোৱা ছিমৰণে কয় যে তেওঁৰ লালন-পালনে তেওঁৰ আকাংক্ষাক গঢ় দিয়াত ভূমিকা গ্ৰহণ কৰিছিল। “মই ইউনিফৰ্ম পিন্ধা পুৰুষ-মহিলাৰ বেষ্টনীৰ মাজত ডাঙৰ হৈছিলোঁ। সেই পৰিৱেশে মোক সদায় অনুপ্ৰাণিত কৰিছিল।”
জম্মু-কাশ্মীৰৰ যুৱতীসকলৰ বাবেও তেওঁৰ এটা বাৰ্তা আছিল। বালাই কয়, ‘‘মোৰ এই যাত্ৰাই অধ্যৱসায় আৰু কঠোৰ পৰিশ্ৰমৰ প্ৰতি বিশ্বাস দেখুৱাইছে। মই সদায় শিক্ষা আৰু প্ৰচেষ্টাত বিশ্বাস কৰিছিলো। উপত্যকাৰ সকলো ছোৱালীকে মই ক’ম: নিজকে বিশ্বাস কৰক, ডাঙৰ সপোন দেখক আৰু কঠোৰ পৰিশ্ৰম কৰক। আজি সুযোগসমূহ যোগ্যতাৰ ওপৰত ভিত্তি কৰি গঢ় লৈ উঠে, আৰু এটা জাতি হিচাপে আমাক প্ৰতিটো ক্ষেত্ৰতে ৫০% কৰ্মশক্তিৰ অংশ হিচাপে সক্ষম আৰু প্ৰতিশ্ৰুতিবদ্ধ মহিলাৰ প্ৰয়োজন।”
