নিৰ্বাচন

নিৰ্বাচন গণতন্ত্ৰৰ এক গুৰুত্বপূৰ্ণ প্ৰক্ৰিয়া, যাৰ জৰিয়তে ৰাইজে প্ৰতিনিধি বাছনি কৰে। নিৰ্বাচনৰ জৰিয়তেহে আধুনিক গণতন্ত্ৰৰ মানুহে বিধায়িনী দলত (আৰু কেতিয়াবা ন্যায়পালিকা আৰু কাৰ্যপালিকা) ভিন্ন পদবী গ্ৰহণ কৰিবলৈ ব্যক্তিক বাছি লয়।

ভাৰতীয় গণতন্ত্ৰত বিভিন্ন স্তৰৰ নিৰ্বাচনী প্ৰক্ৰিয়া আছে যদিও মূলতঃ সংবিধানত সমগ্ৰ দেশৰ বাবে এখন লোকসভা আৰু বিভিন্ন ৰাজ্যৰ বাবে পৃথক বিধানসভাৰ ব্যৱস্থা আছে।

ভাৰতীয় সংবিধানৰ ১৫ নং খণ্ডত ৩২৪ নং অনুচ্ছেদৰ পৰা ৩২৯ নং অনুচ্ছেদলৈকে নিৰ্বাচনৰ বিষয়ে ব্যাখ্যা কৰা হৈছে।৩২৪ নং অনুচ্ছেদত উল্লেখ আছে যে নিৰ্বাচনৰ অধীক্ষকতা, নিৰ্দেশনা আৰু নিয়ন্ত্ৰণ নিৰ্বাচন আয়োগৰ ওপৰত ন্যস্ত।

দেশৰ সকলো নিৰ্বাচন নিৰ্বাচন আয়োগে অনুষ্ঠিত কৰে। গণতান্ত্ৰিক দেশ এখনৰ বাবে নিৰ্বাচন অতি গুৰুত্বপূৰ্ণ। নিৰ্বাচনে ৰাইজক জনপ্ৰতিনিধি বাছনি কৰাৰ সুযোগ দিয়ে আৰু নিৰ্বাচিত হোৱা জনপ্ৰতিনিধিয়ে দেশৰ উন্নতিত অৱদান আগবঢ়ায়।