কলকাতাত দুটাকৈ স্থানত ইডিৰ অভিযান, মমতাই ক’লে তৃণমূল কংগ্ৰেছক হাইজেকৰ চেষ্টা বিজেপিৰ
বৃহস্পতিবাৰে পুৱাৰে পৰা IPACৰ কাৰ্যালয় আৰু প্ৰতীক জৈনৰ ঘৰত তালাচী অভিযান অব্যাহত আছে। দুপৰীয়া ১২ মান মানত তালাচী চলি থকাৰ সময়তে হঠাৎ প্ৰতীক জৈনৰ ঘৰত উপস্থিত হৈ মুখ্যমন্ত্ৰী মমতা বেনাৰ্জীয়ে বিজেপিয়ে টিএমচিৰ নথি জব্দ কৰাৰ অভিযোগ উত্থাপন কৰে।
নিৰ্বাচনৰ পূৰ্বে উত্তপ্ত হৈ পৰিছে পশ্চিম বংগ। বৃহস্পতিবাৰে বলবৎকাৰী সঞ্চালকালয়ে IPACৰ মুৰব্বী প্ৰতীক জৈনৰ ঘৰ আৰু কাৰ্যালয়ত অভিযান চলায়। ইডিৰ অভিযানত ক্ষুব্ধ হৈ মুখ্যমন্ত্ৰী মমতা বেনাৰ্জীয়ে প্ৰথমে প্ৰতীক জৈনৰ লৌডন ষ্ট্ৰীটৰ ঘৰলৈ যায় আৰু তাৰ পিছত ছল্ট লেকত থকা IPACৰ কাৰ্যালয়লৈ যায়। IPACৰ বিৰুদ্ধে ইডিৰ অভিযানক লৈ কেন্দ্ৰীয় চৰকাৰৰ ওপৰত তীব্ৰ আক্ৰমণ চলাই মমতাই কেন্দ্ৰীয় গৃহমন্ত্ৰী অমিত শ্বাহক লক্ষ্য কৰি লয়। মমতা বেনাৰ্জীয়ে ইডিৰ বিষয়াসকলে তেওঁৰ দলৰ নথি-পত্ৰ জব্দ কৰাৰ অভিযোগ উত্থাপন কৰে।
বৃহস্পতিবাৰে পুৱাৰে পৰা IPACৰ কাৰ্যালয় আৰু প্ৰতীক জৈনৰ ঘৰত তালাচী অভিযান অব্যাহত আছে। দুপৰীয়া ১২ মান মানত তালাচী চলি থকাৰ সময়তে হঠাৎ প্ৰতীক জৈনৰ ঘৰত উপস্থিত হৈ মুখ্যমন্ত্ৰী মমতা বেনাৰ্জীয়ে বিজেপিয়ে টিএমচিৰ নথি জব্দ কৰাৰ অভিযোগ উত্থাপন কৰে। IPACৰ মুৰব্বী প্ৰতীক জৈনৰ লৌডন ষ্ট্ৰীটৰ বাসগৃহলৈ যায় মুখ্যমন্ত্ৰী মমতা বেনাৰ্জী। কলকাতা আৰক্ষী আয়ুক্ত মনোজ বাৰ্মা মুখ্যমন্ত্ৰীৰ পাঁচ মিনিট পূৰ্বে উপস্থিত হয় প্ৰতীক জৈনৰ ঘৰত।
“মোৰ দলৰ নথি-পত্ৰ জব্দ কৰিছে…” মমতা বেনাৰ্জীৰ ডাঙৰ অভিযোগ
কেইমিনিটমানৰ ভিতৰতে প্ৰতীকৰ ঘৰৰ পৰা ওলাই আহিল মমতা বেনাৰ্জী, হাতত সেউজীয়া ৰঙৰ ফাইল। সংবাদ মাধ্যমৰ আগত মমতাই কয়, “তেওঁলোকে মোৰ দলৰ সকলো নথি-পত্ৰ জব্দ কৰি আছিল! মই লৈ আনিছোঁ।” গৃহমন্ত্ৰী অমিত শ্বাহক আক্ৰমণ কৰি মমতাই কয়, “তেওঁ দেশ নিয়ন্ত্ৰণ কৰিব নোৱাৰে! তেওঁ মোৰ দলৰ নথি-পত্ৰ জব্দ কৰিছে! মই প্ৰতীকক ফোন কৰিলোঁ। তেওঁ মোৰ দলৰ দায়িত্বত আছে। তেওঁলোকে সকলো লৈ গৈছিল—হাৰ্ড ড্ৰাইভ, ফোন।” মমতাই কয় যে তাৰ পিছত তেওঁ ছল্ট লেকৰ IPACৰ কাৰ্যালয়লৈ গৈছিল।
পাৰ্টি হাইজেক কৰাৰ চেষ্টা!
মমতা বেনাৰ্জীয়ে কয় যে এফালে এছ আই আৰৰ জৰিয়তে ভোটাৰৰ নাম তালিকাৰ পৰা আঁতৰোৱা হৈছে; প্ৰায় ১.৫ কোটি লোকক আঁতৰাই পেলোৱা হৈছে। আনহাতে, এনেধৰণৰ তালাচীৰ জৰিয়তে দলৰ পৰিকল্পনা হাইজেক কৰা হৈছে। মমতাই ক’লে, “চাওক, মই এই ফাইলটোৰ সকলোখিনি আনিছো কাৰণ প্ৰতীকে মোৰ পাৰ্টিৰ দায়িত্বত আছে। মই সকলো হাৰ্ড ডিস্ক সজাই থৈছো।”
ইয়াৰ পূৰ্বে ২০১৯ চনত চিবিআইয়ে তেতিয়াৰ আৰক্ষী আয়ুক্ত ৰাজীৱ কুমাৰৰ লৌডন ষ্ট্ৰীট বাংলোত অভিযান চলাইছিল। ইতিমধ্যে মমতা তাত উপস্থিত হৈছিল। আনকি ধৰ্মতলাত ধৰ্ণা কাৰ্যসূচীও আৰম্ভ কৰিছিল। ইয়াৰ পিছতে কেন্দ্ৰীয় তদন্তকাৰী সংস্থাই মমতা চৰকাৰৰ সৈতে জড়িত কনচালটেন্সি ফাৰ্মৰ মুৰব্বীৰ ঘৰত অভিযান চলায়। তাতো মমতা উপস্থিত আছিল।
IPACৰ বিৰুদ্ধে কি অভিযোগ?
বৃহস্পতিবাৰে পুৱা ইডিৰ দলটোৱে ছল্ট লেকৰ ছেক্টৰ ৫ত থকা IPACৰ কাৰ্যালয়ত তালাচী চলাইছিল। ইফালে কেন্দ্ৰীয় সংস্থাটোৰ আন এটা দল ৭ লৌডন ষ্ট্ৰীটত বাস কৰা IPACৰ মুৰব্বী প্ৰতীক জৈনৰ ঘৰত উপস্থিত হয়। সূত্ৰ অনুসৰি ইডিয়ে এই অনুসন্ধান অভিযান আৰম্ভ কৰিছিল দিল্লীৰ বিত্তীয় জালিয়াতিৰ গোচৰৰ সৈতে IPACৰ কোনো সম্পৰ্ক আছে নে নাই সেইটো নিৰ্ণয় কৰিবলৈ। ইডিৰ সূত্ৰ অনুসৰি এই অভিযানটো কয়লা সৰবৰাহৰ সন্দৰ্ভত দিল্লীত ৰুজু হোৱা এটা পুৰণি গোচৰৰ সৈতে জড়িত। পাঁচ ঘণ্টাৰ পাছতো তালাচী অব্যাহত আছে। ইফালে প্ৰতীক জৈনৰ ঘৰত উপস্থিত হয় মমতা বেনাৰ্জী।
চি আৰ পি এফ বাহিনী নিয়োগ
ইফালে IPACৰ কাৰ্যালয়ত নিৰাপত্তা বৃদ্ধি কৰা হৈছে। IPACত চিআৰপিএফৰ জোৱান নিয়োগ কৰা হৈছে। প্ৰতীক জৈনৰ পিছত মমতা বেনাৰ্জীও ছল্ট লেকত থকা IPACৰ কাৰ্যালয়ত উপস্থিত হয়।
