ডিজিটেল ইণ্ডিয়াৰ ১১ বছৰ, কিদৰে সলনি হৈছে দেশৰ ছবি?

যোৱা এঘাৰ বছৰত ডিজিটেল বিপ্লৱৰ জৰিয়তে শাসন, জনসেৱা আৰু অন্তৰ্ভুক্তিৰ ক্ষেত্ৰত ঐতিহাসিক পৰিৱৰ্তন সাক্ষী হৈ আহিছে ভাৰত। প্ৰধানমন্ত্ৰী নৰেন্দ্ৰ মোদীৰ নেতৃত্বত “ডিজিটেল ইণ্ডিয়া” কেৱল এক পদক্ষেপ নহয়, প্ৰতিখন গাঁৱলৈ প্ৰযুক্তিৰ প্ৰসাৰ ঘটাই নাগৰিকক সবল কৰি তোলা এক ব্যাপক ৰূপান্তৰত পৰিণত হৈছে।

ইউপিআই আৰু ডিজিটেল পেমেণ্ট
ডিজিটেল লেনদেনৰ ছবি সলনি কৰা ইউনিফাইড পেমেণ্টছ ইন্টাৰফেচ (ইউপিআই) এতিয়া সমগ্ৰ দেশতে দৈনন্দিন লেনদেনৰ মূল মাধ্যম হৈ পৰিছে। কেৱল ২০২৫ চনৰ মাৰ্চ মাহত এমাহত ইউ পি আইৰ জৰিয়তে ২৪.৭৭ লাখ কোটি টকাৰ ১৮,৩০১ মিলিয়ন লেনদেন হৈছিল। আজি ৪৬ কোটিতকৈ অধিক লোক আৰু ৬.৫ কোটি ব্যৱসায়ীয়ে ইউপিআই ব্যৱহাৰ কৰে। এচিআই ৱৰ্ল্ডৱাইডৰ প্ৰতিবেদন অনুসৰি ২০২৩ চনত বিশ্বব্যাপী ৰিয়েল টাইম পেমেণ্টৰ ৪৯% ভাৰতত হৈছিল।

আধাৰ আৰু ডিবিটিৰ জৰিয়তে স্বচ্ছতা
ডিজিটেল পৰিচয়ৰ বাবে এক নিৰ্ভৰযোগ্য ভিত্তি সৃষ্টি কৰি আধাৰে ই-কেৱাইচি আৰু সেৱা প্ৰদানৰ ব্যৱস্থা সৰল কৰি তুলিছে। ২০২৫ চনৰ এপ্ৰিল মাহলৈকে ১৪১.৮৮ কোটি আধাৰ কাৰ্ড প্ৰস্তুত হৈছে। ইয়াৰ সৈতে সংযুক্ত প্ৰত্যক্ষ লাভ হস্তান্তৰ (ডিবিটি) ব্যৱস্থাই হিতাধিকাৰীসকললৈ প্ৰত্যক্ষভাৱে ৪৩.৯৫ লাখ কোটিতকৈ অধিক ধন হস্তান্তৰ কৰিছে। ইয়াৰ ফলত ৫.৮৭ কোটি ভুৱা ৰেচন কাৰ্ড আৰু ৪.২৩ কোটি ডুপ্লিকেট গেছৰ সংযোগ বাতিল কৰা হৈছে।

ডিজিটেল সংযোগৰ বিপ্লৱ
৫জিৰ আগমন আৰু ৪.৭৪ লাখ বিটিএছ টাৱাৰ স্থাপনৰ ফলত ভাৰত বিশ্বৰ ভিতৰতে সৰ্বাধিক দ্ৰুততম ৫জি ৰোলআউট দেশ হিচাপে পৰিগণিত হৈছে। ভাৰতনেট প্ৰকল্পৰ জৰিয়তে ২.১৪ লাখৰো অধিক গাঁও পঞ্চায়তক দ্ৰুতবেগী ইন্টাৰনেটৰ সৈতে সংযোগ কৰা হৈছে, যাৰ ফলত গাঁৱে-ভূঞে ডিজিটেল সেৱা সুলভ হৈ পৰিছে।

স্বাস্থ্য আৰু শিক্ষাত প্ৰযুক্তিৰ ভূমিকা
CoWIN পৰ্টেলে ২২০ কোটিৰো অধিক ক’ভিড ভেকচিন ট্ৰেক কৰি বিশ্বৰ সৰ্ববৃহৎ টিকাকৰণ অভিযানত ভাৰতক আগশাৰীৰ হিচাপে গঢ়ি তুলিছে। ভাৰতৰ গ্ৰাম্য অঞ্চলৰ ৫.৯৭ লাখ কেন্দ্ৰৰ জৰিয়তে কমন চাৰ্ভিচ চেণ্টাৰ (CSC) সমূহে বেংকিং, বীমা আৰু শিক্ষাৰ দৰে সেৱা আগবঢ়াইছে।

ভাষা, সাক্ষৰতা আৰু প্ৰশিক্ষণ
ভাষিনী প্লেটফৰ্মে ভাষাৰ বাধা ভংগ কৰি ৩৫+ ভাষাত সেৱা আগবঢ়াইছে। প্ৰধানমন্ত্ৰী গ্ৰামীণ ডিজিটেল সাক্ষৰতা অভিযানে ৬.৩৯ কোটি গাঁওবাসীক ডিজিটেলভাৱে সাক্ষৰ কৰি তুলিছে। একে সময়তে ১.০৭ কোটি চৰকাৰী কৰ্মচাৰীয়ে “কৰ্মযোগী ভাৰত” পৰ্টেলত ডিজিটেল প্ৰশিক্ষণ লৈছে।

প্ৰযুক্তিগত আত্মনিৰ্ভৰশীলতাৰ দিশত পদক্ষেপ
ইণ্ডিয়া এআই মিছন, ভাৰত অৰ্ধপৰিবাহী মিছন আৰু প্ৰতিৰক্ষা খণ্ডত থলুৱাকৰণৰ দৰে কাৰ্যসূচীয়ে দেশখনক প্ৰযুক্তিগত স্বাৱলম্বিতাৰ দিশত দ্ৰুতগতিত আগুৱাই নিছে। ২০২৫ চনৰ মে’ মাহলৈকে ভাৰতৰ জিপিইউ ক্ষমতাই ৩৪ হাজাৰ অতিক্ৰম কৰিছে আৰু ১.৫৫ লাখ কোটি টকাৰ অৰ্ধপৰিবাহী প্ৰকল্পৰ অনুমোদন লাভ কৰিছে।

প্ৰতিৰক্ষা খণ্ডত আত্মনিৰ্ভৰশীলতা
ভাৰতে ২০২৩-২৪ বিত্তীয় বৰ্ষত প্ৰতিৰক্ষা উৎপাদনৰ সৰ্বোচ্চ মূল্য ৰেকৰ্ড কৰি ১,২৭,৪৩৪ কোটি টকা লাভ কৰে। ২০১৪-১৫ চনত ৪৬,৪২৯ কোটি টকাৰ তুলনাত ১৭৪ শতাংশ উল্লেখযোগ্য বৃদ্ধি। এই উত্থানে লাইট কম্বেট এয়াৰক্ৰাফ্ট তেজস, অৰ্জুন টেংক, আকাশ মিছাইল চিষ্টেম, এ এল এইচ ধ্ৰুৱ হেলিকপ্টাৰ আৰু কেইবাখনো ঘৰুৱাভাৱে নিৰ্মিত নৌসেনাৰ জাহাজৰ দৰে থলুৱা মঞ্চৰ ক্ৰমবৰ্ধমান শক্তিক প্ৰতিফলিত কৰে।