অসমত কংগ্ৰেছৰ নিৰ্বাচনী যুঁজ পৰ্যবেক্ষণ কৰিব তিনি ৰাষ্ট্ৰীয় নেতাই, থাকিব প্ৰিয়ংকা গান্ধীও

অসম বিধানসভা নিৰ্বাচনলৈ মাত্ৰ মাত্ৰ তিনিমাহৰ সময়। অহা মাৰ্চ-এপ্ৰিল মাহত অসমত অনুষ্ঠিত হ’ব নিৰ্বাচন। ইতিমধ্যে নিৰ্বাচনৰ বাবে কঁকালত টঙালি বান্ধি সাজু হৈছে ৰাজনৈতিক দলসমূহ। কি শাসক, কি বিৰোধী, সকলোৱেই জনতাৰ মাজলৈ গৈছে নিজ নিজ ৰণকৌশল লৈ। কিছুদিন পূৰ্বে বিজেপিয়ে অসমৰ নিৰ্বাচনৰ বাবে তত্বাৱধায়ক নিয়োগ কৰিছিল। তাৰ পাছতেই এইবাৰ কংগ্ৰেছ দলেও অসমৰ বাবে নিযুক্তি দিছে পৰ্যবেক্ষক।

যোৱা ৭ জানুৱাৰীত কংগ্ৰেছে অসম বিধানসভা নিৰ্বাচনৰ পূৰ্বে জ্যেষ্ঠ নেতা ডি কে শিৱকুমাৰ, ভূপেশ বাঘেল আৰু বন্ধু তিৰ্কেক ৰাজ্যখনৰ বাবে পৰ্যবেক্ষক হিচাপে নিযুক্তি দি সাংগঠনিক স্থিতি শক্তিশালী কৰিছে। অহা মাৰ্চ–এপ্ৰিল মাহত ১২৬টা সমষ্টিত অনুষ্ঠিত হ’বলগীয়া নিৰ্বাচনত অসমত দলটোৰ তৃণমূল পৰ্যায়ত সমন্বয় আৰু মিত্ৰতা ব্যৱস্থাপনাক তীক্ষ্ণভাৱে নিৰীক্ষণ কৰাৰ উদ্দেশ্যৰ ইংগিত প্ৰদান কৰিছে এই নিযুক্তিয়ে।

অসম, পশ্চিম বংগ, কেৰালা, তামিলনাডু আৰু পুডুচেৰীৰ বাবে পৰ্যবেক্ষক দলৰ নাম উল্লেখ কৰাৰ সমান্তৰালকৈ নিখিল ভাৰত কংগ্ৰেছ কমিটীৰ সাধাৰণ সম্পাদক (সাংগঠনিক) কে চি বেনুগোপালে এই সিদ্ধান্ত ঘোষণা কৰে।

শেহতীয়াকৈ প্ৰিয়ংকা গান্ধী ৱাদ্ৰাক অসমৰ নিৰ্বাচনৰ বাবে দলৰ স্ক্ৰীনিং কমিটীৰ অধ্যক্ষ হিচাপে নিযুক্তি দিয়াৰ পিছতে এই পদক্ষেপে কংগ্ৰেছৰ প্ৰচাৰ গঢ় দিয়াত তেওঁৰ কেন্দ্ৰীয় ভূমিকাক আলোকপাত কৰে। শিৱকুমাৰ, বাঘেল আৰু তিৰ্কিক ৱাদ্ৰাৰ ঘনিষ্ঠ হিচাপে গণ্য কৰা হয় আৰু প্ৰাৰ্থী নিৰ্বাচন তথা মিত্ৰ দলৰ সৈতে সমন্বয়ৰ ক্ষেত্ৰত মূল ভূমিকা গ্ৰহণ কৰিব বুলি আশা কৰা হৈছে।

অসমৰ বিৰোধী ৰাজনীতিত মিত্ৰতাৰ প্ৰসংগক লৈ ব্যাপক চৰ্চা হৈ আহিছে। বিগত মাহত কংগ্ৰেছে চিপিআই(এম), ৰাইজৰ দল, অসম জাতীয় পৰিষদ, চিপিআই, চিপিআই(এমএল) লিবাৰেচন, জাতীয় দল-অসম আৰু কাৰ্বি আংলংস্থিত অল পাৰ্টি হিল লিডাৰ্ছ কনফাৰেন্সৰ সৈতে নিৰ্বাচনৰ পূৰ্বে মিত্ৰতা কৰি শাসকীয় বিজেপি নেতৃত্বাধীন মিত্ৰজোঁটৰ বিৰুদ্ধে যৌথভাৱে যুঁজ দিয়াৰ বাবে আলোচনাত মিলিত হৈছিল।

বৰ্তমান ১২৬ জনীয়া বিধানসভাত বিজেপিৰ ৬৪খন আসন আছে। ইয়াৰ লগতে মিত্ৰ দল — অসম গণ পৰিষদ (৯), ইউনাইটেড পিপলছ পাৰ্টি লিবাৰেল (৭) আৰু বডোলেণ্ড পিপলছ ফ্ৰণ্ট (৩) খন আসন আছে। বিৰোধী শিবিৰত আছে ২৬ জন কংগ্ৰেছ বিধায়ক, এ আই ইউ ডি এফৰ ১৫ জন, চি পি আই (এম)ৰ এজন বিধায়ক আৰু এজন নিৰ্দলীয়।