দুৰ্গা পূজা

হিন্দু ধৰ্মৰ এক বৃহৎ ধৰ্মীয় আৰু সামাজিক উৎসৱ দুৰ্গা পূজা বা দুৰ্গোৎৱ। এই সময়চোৱাত হিন্দু দেৱী দুৰ্গাৰ আৰধনা কৰা হয়। দুৰ্গাক দুৰ্গতি নাশনি বুলি কোৱা হয়। বিশ্বাস অনুসৰি, দুৰ্গাই পৃথিৱীৰ পৰা অপায়- অমংগল দূৰ কৰাৰ লগতে ভক্তসকলৰ মনোবাঞ্চা পূৰণ কৰে।

শাস্ত্ৰমতে আহিন মাহৰ শুক্ল পক্ষত বা চ’ত মাহৰ শুক্ল পক্ষত এই পূজা পালন কৰা হয়। আহিনৰ এই দুৰ্গা পূজাত শাৰদীয়া দুৰ্গাপূজা নামেৰে জনাজাত। ভাৰতৰ পশ্চিম বংগ, অসম, ওড়িশা, ত্ৰিপুৰা, বিহাৰ, ঝাৰখণ্ড আদিত দৰ্গা পূজা জাকত- জিলিকাকৈ অনুষ্ঠিত কৰা হয়।

দুৰ্গা দেৱৰ মূৰ্তিটো সাধাৰণতে পৰিয়ালৰ লগত দেখা যায়। এই মূৰ্তি সমূহৰ মধ্য স্থানত দেৱী দুৰ্গা থাকে আৰু সোঁ ফালে লক্ষ্মী আৰু গনেশ থাকে। লগতে বাওঁফালে দেৱী সৰস্বতী আৰু কাৰ্তিক থাকে। কলিকতাত পোন প্ৰথমবাৰৰ বাবে ১৬১০ চনত সাবৰ্ণ ৰায় চৌধুৰী পৰিয়ালে এই প্ৰথাৰ প্ৰচলন কৰিছিল।