এছ জয় শংকৰ আৰু অজিত ডোভালক সলনি কৰিবলৈ প্ৰধানমন্ত্ৰীক আহ্বান গৌৰৱ গগৈৰ
ট্ৰাম্পৰ শুক্ল আৰোপৰ কাৰ্যক গৰিহণা দিছে কংগ্ৰেছ সাংসদ গৌৰৱ গগৈয়ে। ইয়াৰ লগেত ৰাষ্ট্ৰীয় নিৰাপত্তা উপদেষ্টা আৰু বৈদেশিক মন্ত্ৰীক সলনি বাবে চিন্তা কৰিবলৈও প্ৰধানমন্ত্ৰীক আহ্বান কংগ্ৰেছ সাংসদগৰাকীৰ।
আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰতীয় ৰপ্তানিৰ ওপৰত ২৫% শুল্ক আৰোপ কৰাৰ পিছতে ভাৰতৰ বৈদেশিক নীতিৰ নেতৃত্বৰ গুৰুতৰ পুনৰ মূল্যায়নৰ আহ্বান জনাইছে কংগ্ৰেছৰ সাংসদ গৌৰৱ গগৈয়ে। কেন্দ্ৰৰ কূটনৈতিক কৌশলক তীব্ৰ সমালোচনা কৰি প্ৰধানমন্ত্ৰী নৰেন্দ্ৰ মোদীক বৈদেশিক পৰিক্ৰমা মন্ত্ৰী এছ জয়শংকৰ আৰু ৰাষ্ট্ৰীয় নিৰাপত্তা উপদেষ্টা অজিত ডোভাল দুয়োকে সলনি কৰাৰ কথা চিন্তা কৰিবলৈ আহ্বান জনায় কংগ্ৰেছৰ সাংসদগৰাকীয়ে।
গগৈয়ে কয়, ‘‘যোৱা দুদিনত ৰাষ্ট্ৰপতি ট্ৰাম্পে দিয়া বক্তব্য গ্ৰহণযোগ্য নহয়। ভাৰতত নতুন উপদেষ্টাৰ প্ৰয়োজন। বৰ্তমান আমাৰ বৈদেশিক নীতিৰ পথ প্ৰদৰ্শক, বিশেষকৈ বৈদেশিক পৰিক্ৰমা মন্ত্ৰী আৰু ৰাষ্ট্ৰীয় নিৰাপত্তা উপদেষ্টাক সলনি কৰাৰ কথা প্ৰধানমন্ত্ৰীয়ে গুৰুত্বসহকাৰে বিবেচনা কৰা উচিত।”
ট্ৰাম্পে “ঘৃণনীয়” বাণিজ্যিক বাধা আৰু ৰাছিয়াৰ সৈতে ভাৰতৰ গভীৰ প্ৰতিৰক্ষা সম্পৰ্কৰ উদ্ধৃতি দি ঘোষণা কৰা শুল্ক ১ আগষ্টৰ পৰা কাৰ্যকৰী হ’ব। মস্কোৰ সৈতে ভাৰতৰ কৌশলগত অংশীদাৰিত্ব অব্যাহত ৰখাৰ সৈতে জড়িত এই গৌণ শাস্তিয়ে অৰ্থনৈতিক আঘাত আৰু অধিক ভয়াৱহ কৰি তুলিব পাৰে।
বিশেষজ্ঞসকলে সকীয়াই দিছে যে যদিহে এই ব্যৱস্থাসমূহ স্থায়ী হৈ থাকে তেন্তে অহা নতুন বিত্তীয় বৰ্ষত আমেৰিকাৰ শুল্কই ভাৰতৰ জিডিপিৰ ০.২%ৰ পৰা ০.৫% হ্ৰাস কৰিব পাৰে। বস্ত্ৰ আৰু ৰত্নৰ দৰে শ্ৰম নিবিড় উদ্যোগসমূহে আটাইতকৈ বেছি ক্ষতিগ্ৰস্ত হোৱাৰ সম্ভাৱনা আছে।
ৰাষ্ট্ৰপতি ট্ৰাম্পে নিজৰ পুৰণি বাক্যবাণক পুনৰ সজীৱ কৰি তুলিছে, ভাৰতক “টেৰিফ কিং” বুলি অভিহিত কৰিছে আৰু ভাৰতক “বিশ্বৰ ভিতৰতে সৰ্বাধিক শুল্ক” থকাৰ অভিযোগ উত্থাপন কৰিছে আৰু “অ-বিত্তীয় বাধা”ৰ জৰিয়তে আমেৰিকাৰ সামগ্ৰীসমূহক বাধা দিছে।
তেওঁৰ মন্তব্য আৰু কাৰ্যই যোৱা কেইমাহমানত সুস্থিৰ হোৱা যেন লগা বাণিজ্যিক উত্তেজনাক পুনৰ জগাই তুলিছে। বৰ্তমানলৈকে ভাৰত চৰকাৰে শুল্ক বৃদ্ধি বা গগৈৰ মন্তব্যৰ কোনোটোৱেই আনুষ্ঠানিক সঁহাৰি প্ৰকাশ কৰা নাই।
