হোটেলত মহিলাৰ সৈতে অপকৰ্ম, বান্ধৱী আৰু তেওঁৰ দুই বন্ধুক গ্ৰেপ্তাৰ!
ফৰিদাবাদৰ এখন হোটেলত এগৰাকী মহিলা শ্বুটাৰৰ সৈতে অপকৰ্ম। আৰক্ষীয়ে গ্ৰেপ্তাৰ কৰিছে বন্ধুসহ তিনিজন সন্দেহযুক্ত লোকক। ভুক্তভোগী শ্বুটাৰগৰাকীয়ে প্ৰতিযোগিতাত ফৰিদাবাদলৈ অহা বুলি উল্লেখ কৰে। প্ৰতিযোগিতাৰ অন্তত এজন সন্দেহযুক্ত লোকে হোটেলত অপকৰ্ম কৰে।
হাৰিয়ানাৰ ফৰিদাবাদৰ এখন হোটেলত এগৰাকী ২৩ বছৰীয়া মহিলা শ্বুটাৰৰ সৈতে জঘণ্য কাণ্ড কৰে। বুধবাৰে সন্ধিয়া এই ঘটনা সংঘটিত হোৱা বুলি জানিব পৰা গৈছে। এতিয়া আৰক্ষীয়ে মহিলাগৰাকীৰ এজন বন্ধুকে ধৰি তিনিজন লোকক গ্ৰেপ্তাৰ কৰিছে। এজাহাৰত ভুক্তভোগীয়ে উল্লেখ কৰিছে যে মঙলবাৰে বন্ধুৰ সৈতে ফৰিদাবাদলৈ আহিছিল প্ৰতিযোগিতাত অংশগ্ৰহণ কৰিবলৈ।
মহিলা শ্বুটাৰগৰাকীয়ে অভিযোগ কৰে যে বুধবাৰে সন্ধিয়া প্ৰতিযোগিতা শেষ হোৱাৰ পিছত বন্ধুৱে ফৰিদাবাদত বাস কৰা তেওঁৰ চিনাকি গৌৰৱক ফোন কৰি মেট্ৰ’ ষ্টেচনত থৈ আহিবলৈ কয়। আৰক্ষীৰ মতে, বন্ধু সতেন্দ্ৰৰ সৈতে গৌৰৱ আহি উপস্থিত হয়। তাৰ পিছত চাৰিওজনে দিনটোৰ বাবে ফৰিদাবাদত থাকি পিছদিনা ঘূৰি অহাৰ সিদ্ধান্ত ল’লে। হোটেলৰ দুটা কোঠা বুকিং কৰিলে, আৰু এটা কোঠাত পাৰ্টি কৰিলে।
হোটেলৰ কোঠাত অপকৰ্ম
ভুক্তভোগীৰ অভিযোগ যে নিশা প্ৰায় ৯ বজাত তাইৰ বন্ধু গৌৰৱৰ সৈতে তললৈ নামি গৈছিল। সেই সময়ত সতেন্দ্ৰ কোঠাটোত উপস্থিত আছিল, আৰু তেওঁ মহিলা শ্বুটাৰগৰাকীৰ সৈতে জঘণ্য কাণ্ড কৰে। ভুক্তভোগী মহিলাগৰাকীয়ে উল্লেখ কৰে যে যেতিয়া তেওঁৰ বন্ধুজন উভতি আহিছিল তেতিয়া তেওঁক এই বিষয়ে অৱগত কৰিছিল। ইয়াৰ পিছতে ভুক্তভোগীয়ে সাহস গোটাই অভিযুক্তক কোঠাৰ ভিতৰত আবদ্ধ কৰি ৰাখি চিনাকি এজনক ঘটনাৰ বিষয়ে কয়। ইয়াৰ পিছত পোনে পোনে আৰক্ষীৰ ওচৰলৈ গৈ এজাহাৰ দাখিল কৰে।
আৰক্ষীৰ মতে, ভুক্তভোগী যুৱতীগৰাকীৰ চিকিৎসা পৰীক্ষা কৰা হৈছে। হোটেলখনৰ চিচিটিভি ফুটেজো পৰীক্ষা কৰি এই ঘটনাটো পৰিকল্পিতভাৱে কৰা হৈছে নে নাই সেয়া জানিবলৈ চেষ্টা কৰি আছে। এতিয়া গোচৰটোৰ তদন্ত অব্যাহত আছে, আৰু আৰক্ষীয়ে অধিক ব্যৱস্থা লোৱাৰ পূৰ্বে সকলো দিশৰ প্ৰতি লক্ষ্য ৰাখিছে।
