T-90 Engine Upgrade: এইবাৰ পাহাৰত দৌৰিব ‘ভীষ্ম’, শক্তিশালী ইঞ্জিন থাকিলে কি সুবিধা হ’ব সেনাবাহিনীৰ?
বৰ্তমান ভাৰতীয় সেনাৰ টি-৯০ টেংকত ১০০০ হৰ্চপাৱাৰৰ ইঞ্জিন ব্যৱহাৰ কৰা হৈছে। যদিও এই ইঞ্জিনে ভৈয়ামত বৰ ভাল কাম কৰে, তথাপিও লাডাখ বা ছিকিমৰ দৰে ওখ পাহাৰত ইয়াৰ শক্তি যথেষ্ট কম যেন লাগে।
ভাৰত-চীন সীমান্তত পহৰা দি আছে ৪৬ টন ওজনৰ ভীষ্ম টেংকে। প্ৰতিদিনে সুৰক্ষা ক্ষেত্ৰত গুৰুত্বপূৰ্ণ ভূমিকা গ্ৰহণ কৰিছে এই টেংকখনে। এতিয়া এই টি-৯০ ভীষ্ম টেংকৰ(T-90 Bhishma Tank) শক্তি আৰু বৃদ্ধি পাবলৈ গৈ আছে। প্ৰতিৰক্ষা মন্ত্ৰালয়ে এই টেংকৰ বাবে ১৩৫০ হৰ্চপাৱাৰৰ থলুৱা প্ৰযুক্তিৰ নতুন শক্তিশালী ইঞ্জিন নিৰ্মাণৰ বাবে সেউজ সংকেত দিছে।
কিয় এই পৰিৱৰ্তন?
আপুনি জানি আচৰিত হ’ব যে, বৰ্তমান ভাৰতীয় সেনাৰ টি-৯০ টেংকত ১০০০ হৰ্চপাৱাৰৰ ইঞ্জিন ব্যৱহাৰ কৰা হৈছে। যদিও এই ইঞ্জিনে ভৈয়ামত বৰ ভাল কাম কৰে, তথাপিও লাডাখ বা ছিকিমৰ দৰে ওখ পাহাৰত ইয়াৰ শক্তি যথেষ্ট কম যেন লাগে। কাৰণ, সেই উচ্চতাত অক্সিজেনৰ অভাৱৰ বাবে ইন্ধন ভালদৰে নজ্বলে। আৰু সেইবাবেই এই টেংকে হিমালয়ৰ দৰে অঞ্চলত চলাচল কৰাত অসুবিধা হয়।
কি হ’বলৈ গৈ আছে?
জানিব পৰা মতে, প্ৰ’ট’টাইপ নিৰ্মাণৰ ৭০ শতাংশ খৰচ চৰকাৰে বহন কৰিব। তদুপৰি এই টেংক নিৰ্মাণৰ প্ৰকল্পৰ সৈতে জড়িত প্ৰতিটো কোম্পানীকো সৰ্বাধিক ২৫০ কোটি টকা দিয়া হ’ব। ইয়াৰ উপৰিও চৰকাৰে ঘোষণা কৰিছে যে, এই নতুন ইঞ্জিনৰ কমেও ৫০ শতাংশ কম্পোনেণ্ট ভাৰতত নিৰ্মাণ কৰিব লাগিব।
সহজ ভাষাত ক’বলৈ গ’লে ১৩৫০ হৰ্চপাৱাৰৰ নতুন ইঞ্জিন যোগ কৰিলে ৪৬ টন ওজনৰ এই টেংকখনে বহুগুণ গতি লাভ কৰিব। এতিয়া যুদ্ধক্ষেত্ৰত দ্ৰুতগতিত স্থান সলনি কৰা বা বিশাল মৰুভূমি পাৰ হোৱাটো সহজ হ’ব। প্ৰতিৰক্ষা বিশেষজ্ঞসকলৰ মতে, ইয়াৰ ফলত সেনাৰ ‘প্ৰতিক্ৰিয়াৰ সময়’ বা কাউণ্টাৰ আক্ৰমণৰ ক্ষমতা বহু পৰিমাণে বৃদ্ধি পাব।
আত্মনিৰ্ভৰশীল ভাৰতৰ লক্ষ্যৰ দিশত এয়া এক বৃহৎ পদক্ষেপ। এতিয়ালৈকে ভাৰতে এটা শক্তিশালী ইঞ্জিনৰ বাবে অন্য দেশৰ সহায় বিচাৰিব লগা হৈছিল। আৰু এইবাৰ ভাৰতৰ মাটিত অধিক উন্নত প্ৰযুক্তিৰ বিকাশ হ’ব। আৰু ফলত উত্তৰ সীমান্তৰ পাহাৰীয়া অঞ্চলত মোকাবিলা কৰিবলৈ ভীষ্ম এতিয়া আৰু শক্তিশালী হ’ব।
