Zubeen Garg death: জুবিন গাৰ্গ আৰু অসমীয়াক অপমান কৰি অৱশেষত ক্ষমা খুজিলে আই আই টিৰ ছাত্ৰই
Zubeen Garg passes away: অসমীয়া মানুহৰ জুবিন গাৰ্গৰ প্ৰতি থকা এই ভালপোৱাক অনুধাৱন কৰিব নোৱৰা আই আই টি গুৱাহাটীত অধ্যয়নৰত পশ্চিম বংগৰ মালদাৰ এজন পি এইছ ডি গৱেষকে কৰা মন্তব্যক লৈ ব্যাপক প্ৰতিক্ৰিয়াৰ সৃষ্টি হয়। তাৰ পাছতেই তেওঁ ক্ষমা বিচাৰে।
জুবিন গাৰ্গৰ বিয়োগত শোকাহত হৈ আছে সমগ্ৰ ৰাজ্য। প্ৰিয় শিল্পীগৰাকীক শেষ বিদায় জনাবলৈ সৰুসজাইত ভিৰ কৰিছেহি অগণন অনুৰাগীয়ে। সুধাকণ্ঠ ভূপেন হাজৰিকাৰ মৃত্যুৰ পাছত জুবিন গাৰ্গৰ মৃত্যুতেই এনে ব্যাপক ভিৰ দেখা পাইছে সমগ্ৰ ভাৰতে।
কিন্তু অসমীয়া মানুহৰ জুবিন গাৰ্গৰ প্ৰতি থকা এই ভালপোৱাক অনুধাৱন কৰিব নোৱৰা এজন বহিঃৰাজ্যৰ যুৱকে এটা হোৱাটছএপ গ্ৰুপত জুবিন সংক্ৰান্তত আপত্তিজনক মন্তব্য কৰিছিল। আই আই টি গুৱাহাটীত অধ্যয়নৰত পশ্চিম বংগৰ মালদাৰ পি এইছ ডি গৱেষকগৰাকীয়ে কৰা মন্তব্যক লৈ ব্যাপক প্ৰতিক্ৰিয়াৰ সৃষ্টি হয়।
লগতে পঢ়ক: Zubeen Garg Death Live Updates: সৰুসজাইত জুবিনক শ্ৰদ্ধাঞ্জলি অগণন গুণমুগ্ধৰ
কণ্ঠশিল্পীগৰাকীৰ প্ৰতি থকা মানুহৰ প্ৰেমৰ ওপৰত মন্তব্য কৰাৰ সমান্তৰালকৈ অসমীয়া মানুহক বৰ্ণবাদী আৰু উগ্ৰপন্থীৰ সৈতে তুলনা কৰা এই মন্তব্যই ছাত্ৰ-ছাত্ৰী আৰু স্থানীয় ৰাইজৰ মাজত ক্ষোভৰ সৃষ্টি কৰে। বিশেষকৈ অসমে কিংবদন্তি গায়কগৰাকীৰ অকাল মৃত্যুত শোক পালন কৰাৰ সময়তে যুৱকজনৰ মন্তব্যৰ বিৰুদ্ধে ক্ষোভিত হৈ পৰে একাংশ অনুৰাগী।
ব্যাপক সমালোচনাৰ অন্তত পদাৰ্থ বিজ্ঞান বিভাগৰ ছোবান হোছেইন নামৰ ছাত্ৰজনে ২১ ছেপ্টেম্বৰ তাৰিখে হাতে লিখা এক পত্ৰযোগে ক্ষমা প্ৰাৰ্থনা বিচাৰে। চিঠিখনত হোছেইনে তেওঁৰ “অসংবেদনশীল মন্তব্য”ই অসমীয়া সমাজক গভীৰ আঘাত দিয়াৰ কথা স্বীকাৰ কৰি তেওঁৰ এই কাৰ্যক “অপৰিপক্ক আৰু দায়িত্বহীন আচৰণ” বুলি অভিহিত কৰিছে। তেওঁ “গভীৰ অনুশোচনা” প্ৰকাশ কৰি “সকলোৰে ওচৰত নিঃচৰ্ত ক্ষমাপ্ৰাৰ্থনা” বিচাৰে।
পৰৱৰ্তী সময়ত আই আই টি গুৱাহাটীৰ ছাত্ৰ জিমখানা পৰিষদে আনুষ্ঠানিকভাৱে প্ৰচাৰ কৰে এই ক্ষমাপ্ৰাৰ্থনা বিচৰা পত্ৰখন। সকলো ছাত্ৰ-ছাত্ৰী আৰু অধ্যাপকলৈ ইমেইলযোগে প্ৰেৰণ কৰা পত্ৰখনত পৰিষদৰ উপ-সভাপতি কৃষ্ণ বামছি ভিয়ে ছাত্ৰজনে নিঃচৰ্ত ক্ষমাপ্ৰাৰ্থনা বিচৰা বুলি নিশ্চিত কৰি বিবেচনাৰ বাবে আবেদন জনায়।
এই ঘটনাই অৱশ্যে অসমৰ সাংস্কৃতিক আইকন হিচাপে সকলোৰে চকুৰমণি হৈ পৰা জুবিন গাৰ্গৰ মৃত্যুক লৈ থকা কৰা মন্তব্যই সংবেদনশীলতাক উজ্জ্বল কৰি তুলিছে। পৰিস্থিতি যাতে আৰু অধিক তীব্ৰতৰ নহয় তাৰ বাবে প্ৰতিষ্ঠানটোৰ কৰ্তৃপক্ষই তীক্ষ্ণ দৃষ্টি ৰাখিছে।
ইফালে, জুবিন গাৰ্গক নিজৰ “ভাই” বুলি অভিহিত কৰি পশ্চিমবংগৰ মুখ্যমন্ত্ৰী মমতা বেনাৰ্জীয়ে ১৯ ছেপ্টেম্বৰত জনপ্ৰিয় কণ্ঠশিল্পীগৰাকীৰ মৃত্যুত শোক প্ৰকাশ কৰে। ছিংগাপুৰত সংঘটিত দুৰ্ঘটনাত প্ৰাণ হেৰুওৱা ৫২ বছৰীয়া কণ্ঠশিল্পীগৰাকীক শ্ৰদ্ধাঞ্জলি জনায় মমতাই।
“মোৰ প্ৰিয় ভাই জুবিন — ৰেষ্ট ইন ৰিদম! আমি আপোনাক, আপোনাৰ মৃদু কণ্ঠ আৰু আপোনাৰ উপস্থিতিৰ অভাৱ অনুভৱ কৰিম। সংগীতে আমাক যুঁজিবলৈ, সুস্থ কৰিবলৈ আৰু বিশ্বাস ৰাখিবলৈ শিকায়। আপোনাৰ গীতবোৰ আপোনাৰ উত্তৰাধিকাৰ আৰু চিৰদিনৰ বাবে অমৰ হৈ থাকিব।” মমতাই লিখে।
