ভেনিজুৱেলাত আমেৰিকাৰ ‘চাৰ্জিকেল ষ্ট্ৰাইক’, মাদুৰোৰ গ্ৰেপ্তাৰক লৈ বিশ্ব বিভক্ত, কোন দেশে কি ক’লে ?

ভেনিজুৱেলাত আমেৰিকাৰ আক্ৰমণ আৰু শনিবাৰে ৰাষ্ট্ৰপতি নিকোলাছ মাদুৰো আৰু তেওঁৰ পত্নীক বন্দী কৰাৰ সন্দৰ্ভত বিশ্বৰ নেতাসকলে তীব্ৰ প্ৰতিক্ৰিয়া প্ৰকাশ কৰে। কোনোৱে উদ্বেগ প্ৰকাশ কৰি সংযমৰ আহ্বান জনোৱাৰ বিপৰীতে কোনোৱে ৱাশ্বিংটনৰ এই পদক্ষেপক সমৰ্থন কৰে। আমেৰিকাৰ ৰাষ্ট্ৰপতি ড’নাল্ড ট্ৰাম্পৰ মতে, ৰাজধানী কাৰাকাছত আমেৰিকাৰ আক্ৰমণত গ্ৰেপ্তাৰ হোৱা মাদুৰো আৰু তেওঁৰ পত্নী চিলিয়া ফ্ল’ৰেছক নিউয়ৰ্কত অপৰাধমূলক অভিযোগৰ সন্মুখীন হ’ব লাগিব।

ৰাছিয়া আৰু চীনে গৰিহণা দিয়ে

এই আক্ৰমণ আৰু গ্ৰেপ্তাৰক তীব্ৰ সমালোচনা কৰিছিল ৰাছিয়া আৰু চীনকে ধৰি বিশ্বৰ প্ৰধান দেশসমূহে। ৰাছিয়াৰ বৈদেশিক মন্ত্ৰালয়ে আমেৰিকাৰ নেতৃত্বক নিজৰ স্থিতি পুনৰ বিবেচনা কৰি সাৰ্বভৌম দেশৰ বৈধভাৱে নিৰ্বাচিত ৰাষ্ট্ৰপতি আৰু তেওঁৰ পত্নীক মুকলি কৰি দিবলৈ আহ্বান জনায়।

সামাজিক মাধ্যমৰ এটা পোষ্টত মন্ত্ৰালয়ে কয় যে, “আমি আলোচনাৰ জৰিয়তে আমেৰিকা আৰু ভেনিজুৱেলাৰ মাজত বৰ্তমানৰ সমস্যাসমূহ সমাধানৰ বাবে পৰিস্থিতি সৃষ্টি কৰাৰ প্ৰয়োজনীয়তাৰ ওপৰত গুৰুত্ব আৰোপ কৰিছো।” চীনে আমেৰিকাৰ বিমান আক্ৰমণক গৰিহণা দি ইয়াক আন্তঃৰাষ্ট্ৰীয় আইন গুৰুতৰভাৱে উলংঘা কৰা স্বৈৰাচাৰী কাৰ্য বুলি অভিহিত কৰে।

আমেৰিকাৰ কাৰ্যত স্তম্ভিত চীন

চীনৰ বৈদেশিক মন্ত্ৰালয়ে কয় যে, চীন স্তম্ভিত আৰু আমেৰিকাই এখন সাৰ্বভৌম ৰাষ্ট্ৰৰ বিৰুদ্ধে বল প্ৰয়োগ আৰু ইয়াৰ ৰাষ্ট্ৰপতিৰ বিৰুদ্ধে কৰা কাৰ্যক তীব্ৰভাৱে গৰিহণা দিয়ে। মন্ত্ৰালয়ে আৰু কয় যে, চীনে ইয়াৰ তীব্ৰ বিৰোধিতা কৰিছে। আমি আমেৰিকাক আহ্বান জনাইছো যে, আন্তঃৰাষ্ট্ৰীয় আইন আৰু ৰাষ্ট্ৰসংঘৰ চনদৰ উদ্দেশ্য আৰু নীতি মানি চলি আন দেশৰ সাৰ্বভৌমত্ব আৰু নিৰাপত্তা উলংঘা কৰাটো বন্ধ কৰক।

ইজৰাইলৰ প্ৰশংসা

ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে কয় যে, “স্বাধীনতা আৰু ন্যায়ৰ বাবে তেওঁৰ সাহসী আৰু ঐতিহাসিক নেতৃত্বৰ বাবে ৰাষ্ট্ৰপতি ড’নাল্ড ট্ৰাম্পক অভিনন্দন। আপোনাৰ দৃঢ়তা আৰু আপোনাৰ সাহসী সৈনিকসকলৰ উজ্জ্বল কাৰ্যক মই প্ৰণাম জনাইছো।”

ভেনিজুৱেলাৰ সাৰ্বভৌমত্বৰ ওপৰত এক গুৰুতৰ আক্ৰমণ: ব্ৰাজিল

ব্ৰাজিলৰ ৰাষ্ট্ৰপতি লুইজ ইনাছিঅ’ লুলা দা ছিলভাই এই আক্ৰমণ আৰু মাদুৰোৰ গ্ৰেপ্তাৰক গৰিহণা দি কয় যে, এই আক্ৰমণ ভেনিজুৱেলাৰ সাৰ্বভৌমত্বৰ ওপৰত হোৱা আটাইতকৈ গুৰুতৰ আক্ৰমণ। তেওঁ কয় যে, “আন্তঃৰাষ্ট্ৰীয় আইনৰ স্পষ্ট উলংঘা কৰি দেশসমূহক আক্ৰমণ কৰাটো হিংসা, বিশৃংখলতা আৰু অস্থিৰতাৰে ভৰা এখন পৃথিৱীৰ দিশত প্ৰথম পদক্ষেপ।” তেওঁ আৰু কয় যে, ইয়াৰ ফলত লেটিন আমেৰিকা আৰু কেৰিবিয়ানৰ শান্তিপূৰ্ণ অঞ্চলৰ প্ৰতি ভাবুকি আহি পৰিছে।

ৰাষ্ট্ৰসংঘৰ চনদৰ প্ৰতি সন্মানৰ আহ্বান

ইফালে ইউৰোপীয় সংঘৰ বৈদেশিক নীতিৰ মুৰব্বী কাজা কালাছে ইউৰোপীয় ইউনিয়নে ভেনিজুৱেলাৰ পৰিস্থিতি নিবিড়ভাৱে নিৰীক্ষণ কৰি আছে বুলি উল্লেখ কৰি ৰাষ্ট্ৰসংঘৰ চনদৰ প্ৰতি সংযম আৰু সন্মানৰ আহ্বান জনায়। এটা পোষ্টত কালাছে কয় যে, তেওঁ বৈদেশিক মন্ত্ৰী মাৰ্কো ৰুবিঅ’ আৰু কাৰাকাছত ইউৰোপীয় ইউনিয়নৰ ৰাষ্ট্ৰদূতৰ সৈতে কথা পাতিছিল।

তেওঁ কয় যে, ইউৰোপীয় সংঘই বাৰে বাৰে কৈ আহিছে যে, মাদুৰোৱে শান্তিপূৰ্ণ ক্ষমতাৰ পৰিৱৰ্তনক সমৰ্থন কৰে। যিকোনো পৰিস্থিতিত আন্তঃৰাষ্ট্ৰীয় আইনৰ নীতি আৰু ৰাষ্ট্ৰসংঘৰ চনদক সন্মান কৰিব লাগিব। আমি সংযমৰ আহ্বান জনাইছো। দেশখনত ইউৰোপীয় ইউনিয়নৰ নাগৰিকৰ সুৰক্ষা আমাৰ শীৰ্ষ অগ্ৰাধিকাৰ হ’ব বুলি তেওঁ কয়।

আমেৰিকাৰ অভিযানত জড়িত নহয় ব্ৰিটেইন

ব্ৰিটিছ প্ৰধানমন্ত্ৰী কেইৰ ষ্টাৰমাৰে কয় যে, ভেনিজুৱেলাত কৰা আমেৰিকাৰ অভিযানৰ সৈতে ব্ৰিটেইন জড়িত নহয় আৰু তেওঁ ট্ৰাম্পৰ পৰা অতিৰিক্ত তথ্য বিচাৰিব। ষ্টাৰমাৰে কয় যে, তেওঁ সদায় বিশ্বাস কৰে যে আন্তঃৰাষ্ট্ৰীয় আইন মানি চলিব লাগে।

আৰ্জেণ্টিনাৰ ৰাষ্ট্ৰপতিয়ে সমৰ্থন আগবঢ়াইছে

স্পেইনৰ প্ৰধানমন্ত্ৰী পেড্ৰ’ ছানচেজে ছ’চিয়েল মিডিয়াৰ পোষ্টত কয় যে, আন্তঃৰাষ্ট্ৰীয় আইন আৰু ৰাষ্ট্ৰসংঘৰ চনদৰ নীতিক সন্মান কৰিব লাগিব। ইফালে ট্ৰাম্পৰ মিত্ৰ আৰ্জেণ্টিনাৰ ৰাষ্ট্ৰপতি জেভিয়াৰ মিলীয়ে এই ঘটনাৰ প্ৰতি সমৰ্থন প্ৰকাশ কৰে।

ভেনিজুৱেলাত আমেৰিকাৰ হস্তক্ষেপৰ খবৰৰ প্ৰতিক্ৰিয়া প্ৰকাশ কৰি তেওঁ ছ’চিয়েল মিডিয়াত এটা পোষ্টত কয় যে স্বাধীনতা পদযাত্ৰা চলি আছে। স্বাধীনতা জীয়াই থাকক! আৰ্জেণ্টিনাৰ সংবাদ মাধ্যমে এই কথা প্ৰকাশ কৰিছে। ইকুৱেডৰৰ ৰাষ্ট্ৰপতি ডেনিয়েল নোব’য়াই এটা পোষ্টত কয় যে, “সকলো নাৰ্কো-চাভিষ্টা অপৰাধী, আপোনালোকৰ সময় আহি আছে। সমগ্ৰ মহাদেশতে আপোনাৰ সমগ্ৰ ব্যৱস্থাটো ভাঙি পৰিব।”

মাদুৰোক গ্ৰেপ্তাৰ কৰাৰ পিছত এখন সংবাদমেলত ট্ৰাম্পে কয় যে, ক্ষমতা নিৰাপদ হাতলৈ হস্তান্তৰ নোহোৱালৈকে আমেৰিকাই ভেনিজুৱেলা পৰিচালনা কৰিব। তেওঁ লগতে কয় যে, আমেৰিকাই ভেনিজুৱেলাৰ বিশাল তেলৰ মজুতৰ এক্সপ্লইটেচন কৰি আন দেশক “বহু পৰিমাণে” বিক্ৰী কৰিব।