অধিক অমিতা খালে দেহত হ’ব পাৰে এনে সমস্যা

অমিতা ভিটামিন আৰু খনিজ পদাৰ্থৰ ভাণ্ডাৰ, কিন্তু ইয়াৰ অত্যাধিক সেৱনে আপোনাক অসুস্থ কৰি তুলিব পাৰে। জানো আহক ইয়াৰ পাৰ্শ্বক্ৰিয়াসমূহ।

অমিতাত প্ৰচুৰ পৰিমাণে ফাইবাৰ থাকে। অত্যধিক ফাইবাৰ সেৱন কৰিলে পেট ফুলা, পেটৰ বিষ আৰু ডায়েৰিয়া বা পাতল শৌচৰ দৰে সমস্যা হ’ব পাৰে।

কিছু গৱেষণা মতে, অমিতাৰ বীজ আৰু গুটিৰ অত্যাধিক সেৱনে পুৰুষৰ প্ৰজনন ক্ষমতা বা শুক্ৰাণুৰ সংখ্যা সাময়িকভাৱে হ্ৰাস কৰিব পাৰে।

অমিতাত থকা পেপাইন নামৰ এনজাইমে বহু লোকৰ দেহত এলাৰ্জীৰ সৃষ্টি কৰিব পাৰে। ইয়াৰ ফলত ছালত খজুৱতি, ফুলি উঠা বা চৰ্মৰোগ দেখা দিব পাৰে।

কেঁচা বা আধা পকা অমিতাত 'লেটেক্স' থাকে, যি জৰায়ুৰ সংকোচন ঘটাব পাৰে। ই গৰ্ভৱতী মহিলাৰ বাবে অতি বিপদজনক আৰু গৰ্ভপাতৰ কাৰণ হ’ব পাৰে।

অমিতাত থকা পেপাইন এনজাইমৰ প্ৰতি সংবেদনশীল লোকসকলৰ উশাহ-নিশাহৰ সমস্যা হ’ব পাৰে। ফলত কাহ, বুকুত কঁপনি বা হাপানিৰ দৰে লক্ষণ দেখা দিব পাৰে।