বুমেৰাং ট্ৰাম্পৰ দাবী, ভাৰত-পাক যুদ্ধবিৰতিত ট্ৰাম্পৰ ভূমিকাক অস্বীকাৰ পাকিস্তানৰ বৈদেশিক মন্ত্ৰীৰ

পহলগাম আক্ৰমণ আৰু অপাৰেচন সেন্দূৰ সংঘাতৰ কেইবামাহো পাছত পাকিস্তানৰ বৈদেশিক মন্ত্ৰী ইশ্বাক দাৰৰ প্ৰতিক্ৰিয়া প্ৰকাশ পাইছে। পাকিস্তানৰ বৈদেশিক মন্ত্ৰীয়ে কয় যে আমি ভাৰতৰ সৈতে কথা পাতিব বিচাৰো, কিন্তু তেওঁলোকৰ পক্ষৰ পৰা আমি কোনো ধৰণৰ সঁহাৰি পোৱা নাই।

পাকিস্তানৰ বৈদেশিক মন্ত্ৰী ইশ্বাক দাৰে এক কাৰ্যসূচীৰ সময়ত এই কথা ৰাজহুৱাভাৱে মানি লৈছে। তেওঁ কয় যে ভাৰতে কেতিয়াও কোনো তৃতীয় পক্ষৰ মধ্যস্থতাত সন্মতি দিয়া নাছিল। তেওঁ কয় যে যেতিয়া পাকিস্তানে আমেৰিকাৰ বৈদেশিক মন্ত্ৰী মাৰ্কো ৰুবিঅ’ক ভাৰতৰ সৈতে তৃতীয় পক্ষৰ মধ্যস্থতা সম্পৰ্কে কথা পাতিছিল, তেতিয়া তেওঁ অস্বীকাৰ কৰিছিল। আনহাতে, ট্ৰাম্পে বহুবাৰ মধ্যস্থতাৰ দাবী কৰিছে। পাকিস্তানৰ বৈদেশিক মন্ত্ৰীৰ এই বক্তব্যৰ পিছতে বুমেৰাং হৈ পৰিছে আমেৰিকাৰ ৰাষ্ট্ৰপতি ট্ৰাম্পৰ দাবী।

আলোচনাৰ জৰিয়তেহে সমাধান আহিব

পাকিস্তানৰ বৈদেশিক মন্ত্ৰীগৰাকীয়ে আৰু কয় যে আমি ভাৰতৰ সৈতে কথা পাতিবলৈ সাজু। ভাৰতে বিচৰা ধৰণে আলোচনা হ’ব, কিন্তু আমি তাৰ বাবে ভিক্ষা নকৰো। কোনো দেশে কথা পাতিব বিচাৰিলে আমি আদৰি ল’ম। কাৰণ আলোচনাৰ জৰিয়তেহে সমাধান আহে। তেওঁ দাবী কৰে যে পাকিস্তান এখন শান্তিপ্ৰেমী দেশ। যদি ভাৰতে কথা পাতিব নিবিচাৰে, তেন্তে আমিও তেওঁলোকৰ ওপৰত হেঁচা নিদিওঁ।

ট্ৰাম্পে ৩০ বাৰতকৈও অধিক এই দাবী কৰিছে

যোৱা ১০ মে’ত ভাৰত আৰু পাকিস্তানৰ মাজত যুদ্ধবিৰতিৰ পিছত আমেৰিকাৰ ৰাষ্ট্ৰপতি ড’নাল্ড ট্ৰাম্পে কেইবাবাৰো দাবী উত্থাপন কৰিছে। দৰাচলতে তেওঁ ৩০ বাৰৰো অধিক দাবী কৰিছে যে দুয়োখন দেশৰ মাজত যুদ্ধবিৰতিৰ ব্যৱস্থা কৰা হৈছিল। বহু মঞ্চৰ পৰা ট্ৰাম্পে কয় যে তেওঁ ভাৰত আৰু পাকিস্তানৰ মাজত উত্তেজনা শেষ কৰাত সহায় কৰিছিল। তেওঁ কৈছিল যে যদি দুয়োখন দেশেই সংঘাত বন্ধ কৰে তেন্তে আমেৰিকাই তেওঁলোকৰ সৈতে বাণিজ্য বৃদ্ধি কৰিব।

ভাৰতে প্ৰতিবাৰেই ট্ৰাম্পৰ এই দাবী অস্বীকাৰ কৰিছে

ভাৰতে ট্ৰাম্পৰ যুদ্ধবিৰতিৰ দাবীক অহৰহ অস্বীকাৰ কৰি আহিছে। ভাৰতে কয় যে দুয়োখন দেশৰ সেনাবাহিনীৰ সামৰিক অভিযানৰ সঞ্চালক প্ৰধানৰ মাজত প্ৰত্যক্ষ আলোচনাৰ অন্তত যুদ্ধবিৰতিৰ সিদ্ধান্ত লোৱা হৈছে। এই সমগ্ৰ বিষয়টোত ট্ৰাম্পৰ কোনো ভূমিকা নাই। এতিয়া পাকিস্তানৰ বৈদেশিক মন্ত্ৰী ইশ্বাক দাৰেও ট্ৰাম্পৰ দাবী উদঙাই দিছে।