Starlink: বৰ্তমানতকৈ ১০ গুণ হাইস্পীড ইন্টাৰনেট সেৱা, মাহিলী কিমান টকা ভৰিব লাগিব জানেনে, জানক…

ভাৰতত ইলন মাস্কৰ ষ্টাৰলিংকৰ সেৱা আৰম্ভ হোৱাৰ দিশে। দীৰ্ঘদিন ধৰি ষ্টাৰলিংকে ভাৰতত ব্যৱসায় আৰম্ভ কৰাৰ চেষ্টা চলাই আছিল যদিও অনুমোদন লাভ কৰা নাছিল। কিছুদিন পূৰ্বে ষ্টাৰলিংকে সকলো অনুমোদন লাভ কৰাৰ পাছতে এতিয়া ব্যৱসায়ৰ বাবে বাট মুকলি হৈছে। একাংশৰ মতে, অহা ২ মাহৰ ভিতৰত ভাৰতত ষ্টাৰলিংকৰ সেৱা আৰম্ভ হ’ব পাৰে। বিশেষ কথা এয়াই যে, ভাৰতত কোম্পানীটোৱে ষ্টাৰলিংকৰ উন্নীত সংস্কৰণ মুকলি কৰিবলৈ সাজু হৈছে, কোম্পানীটোৰ উন্নীতকৃত নেটৱৰ্কে আপোনাক বৰ্তমানৰ ইণ্টাৰনেট গতিতকৈ ১০ গুণ বেছি গতি প্ৰদান কৰিব।

এই সকলোবোৰ সম্ভৱ হ’ব কোম্পানীটোৰ নেক্স জেনেৰেশ্যন চেটেলাইটৰ জৰিয়তে, যি ২০২৬ চনত উৎক্ষেপণ হ’ব। ইয়াৰ দ্বাৰা ক’ব পাৰি যে, ষ্টাৰলিংকে সংযোগ আৰু গতিৰ ক্ষেত্ৰত এক বিপ্লৱ আনিবলৈ সাজু হৈছে। ষ্টাৰলিংক সেৱা ১০০ খনতকৈও অধিক দেশত উপলব্ধ আৰু বিশ্বজুৰি ৬০ লাখতকৈ অধিক গ্ৰাহক আছে।

চৰকাৰৰ পৰা অনুমোদন পোৱাৰ পিছত এতিয়া আশা কৰা হৈছে যে কোম্পানীটোৱে ২০২৫ চনৰ শেষৰ ফালে বা ২০২৬ চনৰ আৰম্ভণিতে এই সেৱা আৰম্ভ কৰিব পাৰে। ২০৩০ চনৰ ভিতৰত ষ্টাৰলিংকক ভাৰতত Gen1 চেটেলাইট নেটৱৰ্ক চলাবলৈ অনুমতি দিয়া হৈছে। এই নেটৱৰ্ক কা(Ka) আৰু কু ( Ku) বেণ্ড ফ্ৰিকুৱেন্সিত চলিব, যাৰ ফলত ব্যৱহাৰকাৰীয়ে দ্ৰুতবেগী চেটেলাইট ইন্টাৰনেটৰ সুবিধা লাভ কৰিব। বৰ্তমানলৈকে ষ্টাৰলিংক ৩.০ৰ নাম নিৰ্ধাৰণ কৰা নাই, কিন্তু ই এক ডাঙৰ উন্নীতকৰণ হ’ব।

ই হাৰ্ডৱেৰ, বিমফৰ্মিং, অনব’ৰ্ড কম্পিউটাৰ আৰু কম উচ্চতাৰ কাৰ্যৰ বাবে ষ্টাৰলিংক নেটৱৰ্কত ৬০ টিবিপিএছ ক্ষমতা যোগ কৰিব যাতে লেটেন্সি হ্ৰাস পায়। ইয়াৰ অৰ্থ হ’ল আপুনি চহৰৰ মাজভাগত হওক বা দূৰৈৰ গাঁৱত হওক সকলোৱে দ্ৰুত গতিৰ ইন্টাৰনেট লাভ কৰিব।

ষ্টাৰলিংক কিটৰ মূল্য আৰু পৰিকল্পনাৰ মূল্য

ভাৰতত এতিয়ালৈকে মূল্যৰ বিষয়ে একো স্পষ্ট হোৱা নাই যদিও বিশ্বব্যাপী মূল্যৰ ভিত্তিত ষ্টেণ্ডাৰ্ড ষ্টাৰলিংক কিটৰ দাম প্ৰায় ৩৩ হাজাৰ টকা হ’ব পাৰে। ই ৩০০০ টকাৰ পৰা ৪২০০ টকালৈকে মাহিলী পৰিকল্পনাৰ সৈতে আহিব।কিছু সময়ৰ পূৰ্বে প্ৰতিবেদনত  প্ৰকাশ পাইছিল যে ষ্টাৰলিংকে ভাৰতীয় টেলিকম কোম্পানী জিঅ’ আৰু এয়াৰটেলৰ সৈতে উন্নত প্ৰসাৰ আৰু প্ৰৱেশৰ বাবে কাম কৰি আছে।

অন্য খবৰ পঢ়কঃ আপুনি ৰীল বনাই ভাল পাই নেকি? তেন্তে লাভ কৰিব ১৫ হাজাৰ টকা, জানক…