শীতকালত নিজে নিজে বৃদ্ধি হৈছে নেকি শৰীৰৰ ওজন? কিয় জানক…

শীতকালৰ আগমনৰ লগে লগে বহুতে খাদ্যাভ্যাস বা দৈনন্দিন জীৱনত কোনো ডাঙৰ পৰিৱৰ্তন নহ’লেও ক্ৰমান্বয়ে ওজন বৃদ্ধি হোৱা লক্ষ্য কৰে। গৰম কাপোৰ পিন্ধা, সূৰ্যৰ কম পোহৰ আৰু শুকান পৰিৱেশে শৰীৰৰ কাম-কাজত প্ৰভাৱ পেলায়। এই ঋতুত ভোক বৃদ্ধি, অধিক জিৰণি, শাৰীৰিক ক্ৰিয়া-কলাপ কমি যোৱা আদি সাধাৰণ কথা। কিন্তু ওজন বৃদ্ধি সদায় খাদ্য বা ব্যায়ামৰ অভাৱৰ বাবে নহয়। আচলতে শীতকালত শৰীৰৰ ভিতৰত কিছুমান পৰিৱৰ্তন ঘটে যিয়ে ওজনত প্ৰভাৱ পেলাব পাৰে, ইয়াত হৰম’নৰ ভাৰসাম্যই মূল ভূমিকা পালন কৰে।

শীতকালত শৰীৰে নিজকে গৰম কৰি ৰাখিবলৈ আৰু শক্তি সংৰক্ষণ কৰিবলৈ চেষ্টা কৰে। এই প্ৰক্ৰিয়াত কিছুমান হৰম’নৰ কাৰ্য্যকলাপ সলনি হ’ব পাৰে। এই হৰম’নবোৰে ভোক, শক্তিৰ ব্যৱহাৰ, চৰ্বি জমা হোৱা আদি নিয়ন্ত্ৰণ কৰে। যেতিয়া ইহঁতৰ ভাৰসাম্য বিঘ্নিত হয় তেতিয়া ওজন বৃদ্ধি হয়। কেৱল অভ্যাসৰ বাবেই নহয়, শৰীৰৰ ভিতৰৰ হৰম’ন প্ৰক্ৰিয়াৰ বাবেও ওজন বৃদ্ধি হয়। শীতকালত ওজন বৃদ্ধিৰ বাবে কোনবোৰ হৰম’ন দায়ী জানো আহক।

শীতকালত ওজন বৃদ্ধিৰ বাবে কোনবোৰ হৰম’ন দায়ী?

লেডী হাৰ্ডিং হাস্পতালৰ ডাঃ এল এইচ ঘোটেকৰে বুজাইছে যে, শীতকালত ওজন বৃদ্ধিত তিনিটা হৰম’নে মূল ভূমিকা পালন কৰে। প্ৰথমটো হ’ল লেপ্টিন, যিয়ে ভোক নিয়ন্ত্ৰণ কৰে। ঠাণ্ডাত ইয়াৰ প্ৰভাৱ দুৰ্বল হ’ব পাৰে, যাৰ ফলত পেট ভৰি থকাৰ সময়তো খাদ্য গ্ৰহণৰ ইচ্ছা জন্মিব পাৰে। দ্বিতীয়টো হ’ল ঘ্ৰেলিন, ভোকত উদ্দীপিত কৰা হৰম’ন।

শীতকালত লেপ্টিনৰ মাত্ৰা বৃদ্ধি হ’লে সঘনাই ভোকত থাকিব পাৰে। তৃতীয়টো হ’ল ষ্ট্ৰেছ হৰম’ন কৰ্টিছল। ঠাণ্ডা, কম সূৰ্যৰ পোহৰ, দৈনন্দিন কাম-কাজৰ পৰিৱৰ্তনে কৰ্টিছল বৃদ্ধি কৰিব পাৰে, যাৰ ফলত শৰীৰত অধিক চৰ্বি জমা হৈ থাকে। এই তিনিটা হৰম’নৰ একেলগে ভাৰসাম্যহীনতাই ওজন বৃদ্ধিত অৰিহণা যোগায়।

হৰম’নৰ ভাৰসাম্য কেনেকৈ বজাই ৰাখিব পাৰি?

হৰম’নৰ ভাৰসাম্য ৰক্ষা কৰিবলৈ নিয়মীয়া ৰুটিন বজাই ৰখাটো অতি প্ৰয়োজনীয়। সময়মতে শুই থকা আৰু পৰ্যাপ্ত পৰিমাণে টোপনি অহাটো হৰম’নৰ স্বাস্থ্যৰ বাবে উপকাৰী। প্ৰটিন, আঁহ, আৰু স্বাস্থ্যকৰ চৰ্বিযুক্ত সুষম খাদ্য গ্ৰহণ কৰক। দৈনিক মধ্যমীয়া ব্যায়াম বা খোজ কঢ়াৰ ফলত বিপাকীয় ক্ৰিয়া উন্নত হয়। মানসিক চাপ কম কৰিবলৈ ধ্যান বা গভীৰ উশাহ লোৱাৰ অভ্যাস কৰক।

লগতে গুৰুত্বপূৰ্ণ:

• প্ৰচুৰ পৰিমাণে পানী খাব লাগে।
• জাংক ফুড আৰু মিঠাই কমকৈ খাব।
• বেছি সময় বহি থকাৰ পৰা বিৰত থাকিব।
• আপোনাৰ শৰীৰৰ সংকেতবোৰ বুজি লওক, সেইবোৰক আওকাণ নকৰিব।
• প্ৰয়োজন হ’লে চিকিৎসকৰ পৰামৰ্শ লওক।