শীতৰ সময়ত সকলোৰে বাবে উপকাৰী নহয় আলমণ্ড, এনে সমস্যা থাকিলে হ’ব পাৰে বিহৰ সমান!

আলমণ্ডক সাধাৰণতে স্বাস্থ্যৰ বাবে অতি উপকাৰী হিচাপে গণ্য কৰা হয়। বিশেষকৈ শীতকালত ইয়াৰ ব্যৱহাৰ বৃদ্ধি পায় কাৰণ ইয়াত প্ৰচুৰ পৰিমাণে ফাইবাৰ, মেগনেচিয়াম, কেলচিয়াম আৰু ভিটামিন-E আদি পুষ্টিকৰ উপাদান পোৱা যায়। এই আলমণ্ড পেট, হাড় আৰু চুলিৰ বাবে ভাল যদিও সকলোৰে বাবে ই উপকাৰী নহ’বও পাৰে। দিল্লীৰ জিটিবি হাস্পতালৰ প্ৰাক্তন ডায়েটিচিয়ান ডাঃ অনামিকা গৌৰে এই সন্দৰ্ভত গুৰুত্বপূৰ্ণ মতামত আগবঢ়াইছে। কোনবোৰ লোকে আলমণ্ড খোৱা অনুচিত, সেই বিষয়ে তেওঁ সতৰ্ক কৰি দিছে।

এইসমূহ লোকে আলমণ্ড খোৱাৰ পৰা বিৰত থকা উচিত

কিডনীৰ সমস্যা থকা লোকঃ যিসকল লোকৰ কিডনী ষ্ট’নৰ সমস্যা আছে, তেওঁলোকে আলমণ্ড খাব নালাগে। ইয়াত প্ৰচুৰ পৰিমাণে ফছফৰাছ আৰু অক্সালেট থাকে, এইসমূহে কিডনীৰ পাথৰ বৃদ্ধি কৰিব পাৰে।

হজমৰ সমস্যাঃ যদি আপোনাৰ গেছ, পেট ফুলা বা কোষ্ঠকাঠিন্যৰ সমস্যা আছে, তেতিয়া আলমণ্ড নোখোৱাই ভাল। ইয়াত থকা উপাদানসমূহে হজম প্ৰক্ৰিয়াত অধিক চাপ সৃষ্টি কৰিব পাৰে।

এলাৰ্জীৰ সমস্যাঃ কিছুমান লোকৰ বাদাম জাতীয় খাদ্যত এলাৰ্জী থাকে। এনে লোকে আলমণ্ড খালে ছালত দাগ পৰা বা উশাহ-নিশাহৰ সমস্যা হ’ব পাৰে।

উচ্চ ৰক্তচাপৰ ঔষধঃ যিসকল লোকে উচ্চ ৰক্তচাপ বা নিৰ্দিষ্ট কিছুমান এণ্টিবায়’টিক ঔষধ সেৱন কৰি আছে, তেওঁলোকে চিকিৎসকৰ পৰামৰ্শ অবিহনে আলমণ্ড খোৱা উচিত নহয়। ই ঔষধৰ কাৰ্যকাৰিতাত বাধা দিব পাৰে।

সতৰ্কতা আৰু সঠিক নিয়ম

ডাঃ অনামিকা গৌৰৰ মতে, যদি আপুনি আলমণ্ড খোৱাৰ পিছত মূৰৰ বিষ, ছালত গুটি ওলোৱা বা পেটত কামোৰণিৰ দৰে অনুভৱ কৰে, তেতিয়া লগে লগে আলমণ্ড খোৱা বন্ধ কৰা উচিত। লগতে এনে সমস্যাই দেখা দিলে চিকিৎসকৰ পৰামৰ্শ গ্ৰহণ কৰিব লাগে।

কিদৰে আলমণ্ড খাব?

যিসকল লোকৰ কোনো সমস্যা নাই, তেওঁলোকেও দিনটোত ৪-৫ টাৰ অধিক আলমণ্ড খাব নালাগে। সদায় নিশা আলমণ্ড পানীত তিয়াই ৰাখি পিছদিনা পুৱা ইয়াৰ বাকলিটো এৰুৱাইহে খাব লাগে। কাৰণ আলমণ্ডৰ বাকলিত থকা টেনিনে পুষ্টি শোষণত বাধা দিয়ে।