জাতিগত সংঘৰ্ষৰ পাছত প্ৰথমবাৰৰ বাবে মণিপুৰ ভ্ৰমণ কৰিব প্ৰধানমন্ত্ৰী নৰেন্দ্ৰ মোদীয়ে…
শীঘ্ৰেই মণিপুৰ ভ্ৰমণ কৰিব পাৰে প্ৰধানমন্ত্ৰী নৰেন্দ্ৰ মোদীয়ে। ২০২৩ চনৰ পৰা চলি থকা হিংসাত্মক ঘটনাৰ পাছত এয়া হ'ব মোদীৰ প্ৰথম মণিপুৰ ভ্ৰমণ। বৰ্তমান ৰাজ্যখনত ৰাষ্ট্ৰপতি শাসন চলি আছে।
প্ৰায় ২ বছৰৰ হিংসাৰ অন্তত মণিপুৰলৈ যাব প্ৰধানমন্ত্ৰী নৰেন্দ্ৰ মোদী। ছেপ্টেম্বৰৰ দ্বিতীয় সপ্তাহত মণিপুৰ ভ্ৰমণ কৰিব পাৰে মোদীয়ে। ২০২৩ চনৰ মে’ মাহৰ পৰা মেইটেই আৰু কুকি জনগোষ্ঠীৰ মাজত চলি থকা হিংসাত্মক ঘটনাৰ পাছত এয়া হ’ব মোদীৰ প্ৰথম মণিপুৰ ভ্ৰমণ। সূত্ৰ অনুসৰি, মোদীয়ে ইম্ফল আৰু চুৰাচান্দপুৰ ভ্ৰমণ কৰি হিংসাত্মক ঘটনাৰ বাবে স্থানচ্যুত হোৱা লোকসকলক সাক্ষাৎ কৰিব। ইয়াৰোপৰি ৰাজ্যখনৰ বাবে কেইবাটাও নতুন প্ৰকল্প লৈ যাব মোদীয়ে।
জানিব পৰা মতে, প্ৰধানমন্ত্ৰীৰ এই ভ্ৰমণ সময়ত বহুকেইটা ডাঙৰ আন্তঃগাঁথনি প্ৰকল্পৰ ঘোষণা কৰাৰ লগতে নতুন প্ৰকল্পৰ শুভ উদ্বোধন কৰিব পাৰে। মোদীৰ ভ্ৰমণৰ প্ৰতি লক্ষ্য ৰাখি ৰাজ্যখনত ইতিমধ্যে কটকটীয়া কৰি তোলা হৈছে নিৰাপত্তা ব্যৱস্থা। প্ৰধানমন্ত্ৰীৰ ভ্ৰমণৰ সময়চোৱাত যাতে শান্তি অব্যাহত থাকে তাৰ প্ৰতি আৰক্ষী তথা নিৰাপত্তাৰক্ষীয়ে অহৰহ নজৰ দি আছে।
উল্লেখ্য যে, ২০২৩ চনৰ মে’ মাহত মণিপুৰত আৰম্ভ হৈছিল জাতিগত সংঘৰ্ষৰ ঘটনা। মেইটেই আৰু কুকি জনগোষ্ঠীৰ মাজত হোৱা এই সংঘৰ্ষৰ ফলত এতিয়ালৈকে ২৫০ জনৰো অধিক লোকৰ মৃত্যু হোৱাৰ লগতে হাজাৰ হাজাৰ লোক আহত হৈছে। ইয়াৰ বিপৰীতে এতিয়াও সাহাৰ্য শিবিৰত বাস কৰি আছে প্ৰায় ৬০,০০০ লোক।
দেশখনত হিংসা ইমানেই বৃদ্ধি পাইছিল যে হত্যা, লুণ্ঠনৰ লগতে একাংশই হাজাৰ হাজাৰ অস্ত্ৰ-শস্ত্ৰ আৰক্ষী থানাৰ পৰা লুটি নিছিল। তথ্য অনুসৰি, নিৰাপত্তা বাহিনী আৰু ৰাজ্যিক আৰক্ষীয়ে হাজাৰ হাজাৰ লুণ্ঠন অস্ত্ৰৰ ভিতৰত প্ৰায় ৩ হাজাৰ অস্ত্ৰ উদ্ধাৰ কৰিছে।
হিংসা আৰম্ভ হোৱাৰ পাছত কেইবাবাৰো ৰাজ্যখন ভ্ৰমণ কৰিছিল কেন্দ্ৰীয় গৃহমন্ত্ৰী অমিত শ্বাহ। সাংসদতো এই বিষয়টোৰ ওপৰত আলোচনা হৈছিল যদিও এতিয়াও শান্ত হোৱা নাই মণিপুৰ। পূৰ্বৰ তুলনাত হিংসা কিছু হ্ৰাস পালেও প্ৰায়েই ৰাজ্যখনৰ পৰা হিংসাত্মত ঘটনাৰ কথা পোহৰলৈ আহে। এনে পৰিস্থিতিৰ প্ৰতি লক্ষ্য ৰাখি চলিত বৰ্ষৰ ফেব্ৰুৱাৰী মাহত ৰাজ্যখনত ৰাষ্ট্ৰপতি শাসন জাৰি কৰা হৈছিল। পৰৱৰ্তী সময়ত আগষ্ট মাহত পুনৰ ৬ মাহৰ বাবে ৰাষ্ট্ৰপতি শাসন বৃদ্ধি কৰা হৈছিল।
উল্লেখ্য যে, মেইটেই সম্প্ৰদায়ক অনুসূচিত জনজাতিৰ মৰ্যদা প্ৰদানৰ দাবীৰ প্ৰতিবাদত আৰম্ভ হৈছিল আৰু পাছত ই হিংসাত্মক পৰিস্থিতিৰ ৰূপ লয়। কুকি জনগোষ্ঠীৰ বিক্ষোভৰ পাছতে ই ভয়বাহ ৰূপ ধাৰণ কৰে আৰু মণিপুৰক সংকটৰ মাজলৈ লৈ যায়। বিগত সময়চোৱাত পৰিস্থিতি নিয়ন্ত্ৰণ কৰিবলৈ কেন্দ্ৰীয় চৰকাৰে যথেষ্ঠ সংখ্যক নিৰাপত্তা বাহিনী মোতায়েন কৰিছিল, বিভিন্ন ব্যৱস্থা লৈছিল কিন্তু তাৰ পাছতো হিংসা চলিয়েই আছে। পৰিস্থিতি এনে হৈ পৰিছিল যে, দলৰ ভিতৰত একমত নথকাৰ বাবে মুখ্যমন্ত্ৰী এন বীৰেণ সিঙে পদত্যাগ কৰিবলগীয়া হৈছিল।
বিগত সময়চোৱাত মণিপুৰৰ ওপৰত মোদীৰ মন্তব্যৰ দাবী কৰি আহিছিল বিৰোধিয়ে। সদনত ঘন্টাৰ পাছত ঘন্টা ভাষণ দিয়াৰ পাছতো মোদীয়ে এই বিষয়টোৰ ওপৰত বিশেষ একো কোৱা নাছিল। এতিয়া প্ৰায় ২ বছৰৰ অন্তত মোদীয়ে ৰাজ্যখন ভ্ৰমণ কৰিব। গতিকে এই ভ্ৰমণে কি প্ৰভাৱ পেলা সেয়া সময়ত হ’ব লক্ষণীয়।
অন্য খবৰ পঢ়ক ঃ BTC election: বিটিচি নিৰ্বাচনৰ বাবে বিজেপিৰ ২৮ জনীয়া প্ৰাৰ্থীৰ তালিকা প্ৰকাশ…
