শত্ৰু য’তেই নাথাকক ভয়ত কঁপিব লাগিব, কানপুৰৰ পৰা কঠোৰ সকীয়নি মোদীৰ

শুকুৰবাৰে কানপুৰত এক সমাৱেশত ভাষণ দি প্ৰধানমন্ত্ৰী মোদীয়ে কয়, “যোৱা ২৪ এপ্ৰিলত কানপুৰত এই কাৰ্যসূচী অনুষ্ঠিত হোৱাৰ কথা আছিল যদিও পহলগাম আক্ৰমণৰ বাবে কানপুৰ ভ্ৰমণ বাতিল কৰিবলগীয়া হৈছিল । আমাৰ কানপুৰৰ পুত্ৰ শুভম দ্বিবেদীও পহলগাম সন্ত্ৰাসবাদী আক্ৰমণত বৰ্বৰতাৰ বলি হৈছিল । কন্যা ঐশান্যাৰ বেদনা আমি সকলোৱে অনুভৱ কৰিব পাৰো । সমগ্ৰ বিশ্বই আমাৰ কন্যা-ভগ্নীৰ একেই খং অপাৰেচন সেন্দূৰৰ ৰূপত দেখিছে ।”

প্ৰধানমন্ত্ৰী মোদীয়ে কয়, “আমি পাকিস্তানৰ সন্ত্ৰাসবাদীৰ আত্মগোপন স্থানত প্ৰৱেশ কৰি ধ্বংস কৰিলোঁ । আমাৰ সেনাই ইমানেই সাহস দেখুৱালে যে পাকিস্তানী সেনাই যুদ্ধ বন্ধ কৰিবলৈ কাতৰ অনুৰোধ আৰু দাবী কৰিবলৈ বাধ্য হ’ল । স্বাধীনতা সংগ্ৰামৰ এই ভূমিৰ পৰা বাৰে বাৰে সেনাৰ বীৰত্বক প্ৰণাম জনাইছো ।”

সন্ত্ৰাসবাদৰ বিৰুদ্ধে যুঁজত ভাৰতৰ তিনিটা নীতি

প্ৰধানমন্ত্ৰীয়ে কয়, “মই পুনৰ ক’ব বিচাৰো যে অপাৰেচন সেন্দূৰৰ সময়ত যি শত্ৰুৱে কাতৰ অনুৰোধ কৰি আছিল, তেওঁলোক কোনো ভ্ৰমত থাকিব নালাগে । অপাৰেচন সেন্দূৰ এতিয়াও শেষ হোৱা নাই । সন্ত্ৰাসবাদৰ বিৰুদ্ধে যুঁজত ভাৰতে তিনিটা নীতিৰ সিদ্ধান্ত লৈছে ।

• প্ৰথম – ভাৰতে প্ৰতিটো সন্ত্ৰাসবাদী আক্ৰমণৰ উপযুক্ত উত্তৰ দিব । ইয়াৰ সময়, পদ্ধতি আৰু চৰ্ত আমাৰ সেনাই নিৰ্ধাৰণ কৰিব ।
• দ্বিতীয় – ভাৰতে পৰমাণু বোমাৰ ভাবুকিৰ প্ৰতি আৰু ভয় নকৰে । নতুবা সেই ভিত্তিত কোনো সিদ্ধান্ত গ্ৰহণ নকৰে ।
• তৃতীয়তে – ভাৰতে সন্ত্ৰাসবাদৰ মাষ্টাৰ আৰু সন্ত্ৰাসবাদক পৃষ্ঠপোষকতা কৰা চৰকাৰখনক একে চকুৰে চাব । পাকিস্তানৰ ৰাষ্ট্ৰ আৰু অৰাষ্ট্ৰীয় অভিনয়ৰ খেলখন আৰু নচলে । কানপুৰীয়াত সহজ ভাষাত ক’বলৈ গ’লে শত্ৰুক যিকোনো ঠাইতে ভয় খুওৱা হ’ব ।

মেক ইন ইণ্ডিয়াৰ শক্তি বিশ্বই দেখিছে

প্ৰধানমন্ত্ৰী মোদীয়ে কয়, “অপাৰেচন সেন্দূৰৰ সময়ত বিশ্বই ভাৰতৰ থলুৱা অস্ত্ৰ আৰু মেক ইন ইণ্ডিয়াৰ শক্তিও দেখিছে । আমাৰ ভাৰতীয় অস্ত্ৰ-শস্ত্ৰ আৰু ব্ৰাহ্মোছ ক্ষেপণাস্ত্ৰই শত্ৰুৰ ঘৰত প্ৰৱেশ কৰি ধ্বংসলীলাৰ সৃষ্টি কৰিছে । য’তেই লক্ষ্য নিৰ্ধাৰণ কৰিছিল তাতেই বিস্ফোৰণ কৰিছিল । স্বাৱলম্বী ভাৰতৰ সংকল্পৰ পৰাই আমি এই শক্তি পাইছো ।”

সমগ্ৰ দেশৰ বাবে গৌৰৱৰ বিষয়

প্ৰধানমন্ত্ৰীয়ে কয় যে, প্ৰতিৰক্ষা খণ্ডত আত্মনিৰ্ভৰশীলতাৰ ক্ষেত্ৰত ডাঙৰ ভূমিকা গ্ৰহণ কৰাটো সমগ্ৰ দেশৰ বাবে গৌৰৱৰ বিষয় । কানপুৰত যেনেকৈ এটা পুৰণি অৰ্ডিনেন্স কাৰখানা আছে তেনেকৈ আমি এনে ৭টা কাৰখানাক ডাঙৰ আধুনিক কোম্পানীলৈ ৰূপান্তৰিত কৰিছো । আজি দেশৰ বৃহৎ প্ৰতিৰক্ষা কৰিড’ৰটো উত্তৰ প্ৰদেশত নিৰ্মাণ কৰা হৈছে । যি সময়ত উদ্যোগবোৰে তাৰ পৰাই প্ৰব্ৰজন কৰিছিল, এতিয়া প্ৰতিৰক্ষা খণ্ডৰ ডাঙৰ ডাঙৰ কোম্পানী তালৈ আহি আছে ।

প্ৰধানমন্ত্ৰী মোদীয়ে কয়, “এতিয়া বৃহৎ মেট্ৰ’ চহৰৰ যি আন্তঃগাঁথনি, সুবিধা আৰু সকলো সম্পদ উপলব্ধতা আমাৰ কানপুৰত দেখা গৈছে । সঠিক উদ্দেশ্য, দৃঢ় ইচ্ছা আৰু সদিচ্ছা থকা চৰকাৰ এখন থাকিলে দেশ আৰু ৰাজ্যৰ উন্নয়নৰ বাবে কিমান আন্তৰিক প্ৰচেষ্টা চলাব পাৰি তাৰ প্ৰমাণ কানপুৰ মেট্ৰ’।”