হোটেলৰ নিৰাপত্তাৰক্ষীৰ ৰূপত পাকিস্তানৰ চোৰাংচোৱা! পৰিল নিয়াৰ জালত, চলিছে তদন্ত

পহলগাম আক্ৰমণৰ পিছতে দেশত নিৰাপত্তা বাহিনী তথা চোৰাংচোৱা সংস্থাৰ অভিযান যথেষ্ট বৃদ্ধি পাইছে। দেশবিৰোধী চক্ৰৰ বিপক্ষে ধাৰাবাহিকভাৱে চলিছে অভিযান। শেহতীয়া কিছুদিনত দেশৰ ভিন্নস্থানৰ পৰা চোৰাংচোৱা সংস্থাই পাকিস্তানৰ হৈ দেশৰ ভিতৰত চোৰাংচোৱা কৰি থকাৰ অভিযোগত বহু কেইজন লোকক গ্ৰেপ্তাৰ কৰিছে। এইবাৰ পাকিস্তানৰ বাবে চোৰাংচোৱাগিৰি কৰাৰ অভিযোগত কলকাতাৰ এখন হোটেলৰ নিৰাপত্তাৰক্ষীক গ্ৰেপ্তাৰ কৰে কেন্দ্ৰীয় তদন্ত সংস্থা NIA ই।

আজি পুৱাৰে পৰা কলকাতাকে ধৰি সমগ্ৰ দেশৰ পোন্ধৰটা স্থানত তালাচী চলাইছিল NIAৰ বিষয়াসকলে। তালাচীৰ সময়ত সংস্থাটোৱে কলকাতাৰ তাপছিয়াৰ পৰা এজন সন্দেহযুক্ত পাকিস্তানী চোৰাংচোৱাক গ্ৰেপ্তাৰ কৰে। এখন হোটেল নিৰাপত্তাৰক্ষী হিচাপে কৰ্মৰত হৈ আছিল এই লোকজন। নিউটাউনস্থিত NIA ৰ কাৰ্যালয়ত ধৃত লোকজনক সোধা-পোছা কৰা হৈছে।

শেহতীয়াকৈ পাকিস্তানৰ হৈ চোৰাংচোৱাৰ অভিযোগত মতিৰাম জাট নামৰ চি আৰ পি এফৰ এজন জোৱানক গ্ৰেপ্তাৰ কৰা হৈছিল। ধৃত জোৱানজনক জেৰা অব্যাহত ৰাখিছে তদন্তকাৰী বিষয়াসকলে। তেওঁৰ পৰা পোৱা তথ্যৰ ভিত্তিত কেন্দ্ৰীয় সংস্থাটোৱে দেশৰ বিভিন্ন প্ৰান্তত তালাচী চলায়। আজি কেন্দ্ৰীয় সংস্থাটোৱে কলকাতাৰ পাৰ্ক চাৰ্কাছ, মমিনপুৰ আৰু ইকবালপুৰত অভিযান চলায়।

পাৰ্ক চাৰ্কাছৰ পৰা NIAৰ বিষয়াই আজি গ্ৰেপ্তাৰ কৰা নিৰাপত্তাৰক্ষীজনে এমাহৰো অধিক সময় তাপচিয়া হোটেলত চকীদাৰ হিচাপে কাম কৰি আছিল বুলি জানিব পৰা গৈছে। হোটেলখনৰ আন এজন নিৰাপত্তাৰক্ষীয়ে উল্লেখ কৰা মতে তেওঁলোকে হোটেলখনত ঠিকাভিত্তিত নিয়োজিত হয়। ধৃত চকীদাৰজন প্ৰায় এমাহ ন দিন হোটেলখনত কৰ্মৰত আছিল বুলি তেওঁ জানিবলৈ দিয়ে।