ভাৰতৰে এখন ৰাজ্যত পাঁচ বছৰত সন্ধানহীন প্ৰায় ১৩০০০ শিশু, পোহৰলৈ আহিছে ভয়ংকৰ ছবি

এটা চাঞ্চল্যকৰ খবৰ, ভাৰতৰ এখন ৰাজ্যত বৃদ্ধি পাইছে শিশু অপহৰণৰ সংখ্যা । যোৱা পাঁচ বছৰৰ শিশু অপহৰণৰ তথ্য দেখিলে চকু কপালত উঠিব আপোনাৰ । এই ৰাজ্যখন হৈছে দক্ষিণ ভাৰতৰ অন্যতম এখন ৰাজ্য কৰ্ণাটক । বেংগালুৰু মিৰ’ৰৰ এক প্ৰতিবেদন অনুসৰি সমগ্ৰ কৰ্ণাটকতে শিশু অপহৰণৰ ঘটনা যথেষ্ট বৃদ্ধি পাইছে । চৰকাৰী তথ্য অনুসৰি যোৱা পাঁচ বছৰত প্ৰায় ১৩ হাজাৰ শিশু নিৰুদ্দেশ হৈছে ।

প্ৰতিবেদন অনুসৰি ২০২০ চনৰ পৰা ২০২৪ চনৰ ভিতৰত ১২,৭৯০ টা শিশু অপহৰণৰ গোচৰ ৰুজু হৈছে । কিন্তু ইয়াৰে ১,৩০০ৰো অধিক শিশু এতিয়াও সন্ধানহীন হৈ আছে ।

ক’ৰ পৰা অপহৰণ কৰা হৈছে শিশু ?

অপহৰণ কৰা শিশুৰ তালিকাত আৰু অধিক চিন্তাৰ সৃষ্টি কৰা এটা বিষয় হ’ল অপহৃত শিশুৰ বেছিভাগেই ছোৱালী । দৈনন্দিন কাম-কাজ কৰি থাকোঁতে এই শিশুসকল নিৰুদ্দেশ হোৱাটোও পোহৰলৈ আহিছে । কোনোবাই স্কুললৈ গৈ তাৰ পিছত ঘৰলৈ উভতি নাহিল, কোনোবাই টিউচন ক্লাছৰ পৰা নোহোৱা হৈ গ’ল, একেদৰে দৈনন্দিন কাম-কাজ কৰি থাকোঁতে ল’ৰা-ছোৱালী নোহোৱা হৈ পৰিছে । এই সকলোবোৰ গোচৰৰ বাবেই পিতৃ-মাতৃৰ ভয় বাঢ়িছে আৰু আৰক্ষীৰ বাবে এক বৃহৎ প্ৰত্যাহ্বানৰ সৃষ্টি হৈছে ।

কোনবোৰ অঞ্চলত বেছিভাগ অপহৰণ সংঘটিত হৈছে

বেংগালুৰু মিৰ’ৰৰ প্ৰতিবেদন অনুসৰি সমগ্ৰ ৰাজ্যৰ ভিতৰত বেংগালুৰুতেই অধিকাংশ অপহৰণৰ ঘটনা সংঘটিত হৈছে । তাৰ পিছতে দক্ষিণৰ আন কেইবাখনো জিলাৰ ভিতৰত টুমকুৰু, শিৱমোগ্গা, মাণ্ডিয়া, দভানাগেৰে, হাছান, চিত্ৰদুৰ্গ আৰু মহীশূৰকে ধৰি শীৰ্ষ ১০ টা স্থান আছে । এই জিলাসমূহত বিগত পাঁচ বছৰত সৰ্বাধিক শিশু অপহৰণৰ সংখ্যা দেখা গৈছে । এই নিৰুদ্দেশ হোৱা শিশুসকলৰ সন্ধান উলিয়াবলৈ ৰাজ্য আৰু কেন্দ্ৰীয় দুয়োখন চৰকাৰে বিশেষ টাস্ক ফ’ৰ্চ গঠন কৰিছে ।

ধাৰাবাহিক অপহৰণৰ ঘটনাই অপহৃত শিশুসকল মানৱ সৰবৰাহ, শিশু শ্ৰমিক, অংগ ব্যৱসায়, যৌন শোষণ আৰু বলপূৰ্বক ভিক্ষাৰ লগত জড়িত সংগঠিত অপৰাধী নেটৱৰ্কৰ বলি হোৱাৰ সম্ভাৱনা প্ৰকট কৰি তুলিছে । অৱশ্যে এই গোচৰসমূহৰ তদন্ত আৰক্ষীয়ে অব্যাহত ৰাখিছে আৰু এনে নেটৱৰ্কৰ ওপৰত নজৰ ৰখা হৈছে ।