Bihar Election 2025: এন ডি এ নে মহাজোঁট, বিহাৰত কোনে গঠন কৰিব চৰকাৰ? এই পাঁচটা সম্প্ৰদায়ৰ হাতত চাবিকাঠি
Bihar Election 2025: বিহাৰৰ নিৰ্বাচনত এতিয়ালৈকে যিবোৰ সমীকৰণৰ সৃষ্টি হৈছে, সেইবোৰে এটা কথা নিশ্চিত কৰিছে যে বিহাৰত যি দল বা মিত্ৰজোঁটে চৰকাৰ গঠন নকৰক কিয়, নতুন চৰকাৰত মাত্ৰ পাঁচটা জাতিয়েহে আধিপত্য বিস্তাৰ কৰিব। অৰ্থাৎ এই পাঁচটা জাতিৰ সহযোগতহে বিহাৰত নতুন চৰকাৰ গঠন সম্ভৱপৰ।
বিহাৰ বিধানসভা নিৰ্বাচনৰ বাবে চলি আছে ব্যাপক প্ৰচাৰ অভিযান। প্ৰথম পৰ্যায়ৰ ভোটগ্ৰহণ অহা ৬ নৱেম্বৰত অনুষ্ঠিত হ’ব। আজি প্ৰথম পৰ্যায়ৰ নিৰ্বাচনৰ বাবে প্ৰচাৰৰ অন্তিমটো দিন। বিজেপি-জেডিইউ নেতৃত্বাধীন এনডিএ মিত্ৰজোঁটে এফালে প্ৰতিদ্বন্দ্বিতা কৰাৰ বিপৰীতে আনফালে কংগ্ৰেছ-আৰজেডি নেতৃত্বাধীন মহাজোঁটবন্ধনৰ প্ৰতিদ্বন্দ্বিতা।
প্ৰশান্ত কিশোৰৰ দল জন সুৰজে নিৰ্বাচনক তিনিকোণীয়া প্ৰতিদ্বন্দ্বিতা হিচাপে গঢ়ি তোলাৰ বাবে কাম কৰি আছে। ইয়াৰ বাবে বিহাৰৰ নিৰ্বাচনী যুঁজ এইবাৰ অধিক আকৰ্ষণীয় হৈ পৰিছে। ২৪৩ খন আসনবিশিষ্ট বিহাৰ বিধানসভাত চৰকাৰ গঠন কৰিবলৈ কোনো এটা দল বা মিত্ৰজোঁটক ১২২ জন বিধায়কৰ প্ৰয়োজন।
বিহাৰৰ নিৰ্বাচনত এতিয়ালৈকে যিবোৰ সমীকৰণৰ সৃষ্টি হৈছে, সেইবোৰে এটা কথা নিশ্চিত কৰিছে যে বিহাৰত যি দল বা মিত্ৰজোঁটে চৰকাৰ গঠন নকৰক কিয়, নতুন চৰকাৰত মাত্ৰ পাঁচটা জাতিয়েহে আধিপত্য বিস্তাৰ কৰিব। অৰ্থাৎ এই পাঁচটা জাতিৰ সহযোগতহে বিহাৰত নতুন চৰকাৰ গঠন সম্ভৱপৰ। এই সমীকৰণৰ কিছু আভাস লওঁ আহক-.
এই ৫টা জাতিয়ে আধিপত্য বিস্তাৰ কৰিব পাৰে?
১) যাদৱ- চৰকাৰৰ মতে বিহাৰৰ জনসংখ্যাৰ ১৪ শতাংশ এই যাদৱসকলে প্ৰতিনিধিত্ব কৰে। বিহাৰৰ দুয়োটা মিত্ৰজোঁটে যাদৱসকলক যথেষ্ট সংখ্যক টিকট দিছে। এন ডি এই ১৭ জন যাদৱ প্ৰাৰ্থী প্ৰক্ষেপ কৰিছে। একেদৰে মহাজোঁটে এইবাৰ প্ৰায় ৬৭ জন যাদৱ প্ৰাৰ্থীক প্ৰক্ষেপ কৰিছে। দুয়োটা দলে দনাপুৰ আৰু পাৰ্ছাৰ দৰে কেইবাখনো বিধানসভাৰ আসনত যাদৱ সম্প্ৰদায়ৰ প্ৰাৰ্থী প্ৰক্ষেপ কৰিছে।
২০২০ চনৰ বিধানসভা নিৰ্বাচনত ৫২ গৰাকী যাদৱ সম্প্ৰদায়ৰ প্ৰাৰ্থী জয়ী হৈছিল। ইয়াৰে প্ৰায় ৪০ জন মহাজোঁটৰ হৈ সদনলৈ নিৰ্বাচিত হৈছিল। এন ডি এ আৰু মহাজোঁটৰ চৰকাৰসমূহত যাদৱসকলে উল্লেখযোগ্য ভূমিকা পালন কৰিছিল।
২) কৈৰী- বিহাৰৰ জনসংখ্যাৰ প্ৰায় ৩ শতাংশ এই জনগোষ্ঠীৰ লোক আছে। সৰ্বাধিক কৈৰী জনসংখ্যা আছে চাহাবাদ আৰু মিথিলা অঞ্চলত। এইবাৰ দুয়োটা মিত্ৰজোঁটে কৈৰী সম্প্ৰদায়ক আকৰ্ষণ কৰিবলৈ বিভিন্ন কৌশল গ্ৰহণ কৰিছে। এন ডি এই ২২ গৰাকী কৈৰী প্ৰাৰ্থীক টিকট প্ৰদান কৰিছে।
আনহাতে মহাজোঁটে ২৩ জন কৈৰী সম্প্ৰদায়ৰ নেতাক টিকট প্ৰদান কৰিছে। কেৱল আৰজেডিয়েই ১৩ জন কৈৰী সম্প্ৰদায়ৰ নেতাক টিকট দিছে। দুয়োটা মিত্ৰজোঁটৰ পৰা প্ৰায় ১০ শতাংশ টিকট কৈৰী সম্প্ৰদায়ক আবণ্টন দিয়া হৈছে। যোৱা নির্বাচনত ১৬ জন কৈৰী বিধায়ক বিধানসভালৈ নির্বাচিত হৈছিল ৷
৩) ৰাজপুত – বিহাৰ জাতি সমীক্ষা অনুসৰি মুঠ জনসংখ্যাৰ ২ শতাংশ ৰাজপুত সম্প্ৰদায়ৰ, কিন্তু এইবাৰ দুয়োটা মিত্ৰজোঁটৰে টিকট বিতৰণত ৰাজপুত সম্প্ৰদায়ৰ আধিপত্য আছে। এন ডি এত ৩৭ জন ৰাজপুত প্ৰাৰ্থী আৰু মহাজোঁটৰ ১২ জন প্ৰাৰ্থী আছে। ২০২০ চনত ২৭ জন ৰাজপুত বিধায়ক জয়ী হৈ সদনলৈ গৈছিল।
টিকট বিতৰণৰ পিছত কোৱা হৈছে যে যিয়েই চৰকাৰ গঠন নকৰক কিয় ৰাজপুত সম্প্ৰদায়ৰ আধিপত্য থাকিব। ৰাজপুত বিধায়ক অবিহনে চৰকাৰ গঠন কৰাটো অসম্ভৱ।
৪) ভূমিহাৰ- ৰাজপুতৰ দৰে বিহাৰৰ জনসংখ্যাৰ মাত্ৰ ২ শতাংশহে ভূমিহাৰ জনগোষ্ঠী, কিন্তু টিকট বিতৰণৰ ক্ষেত্ৰত তেওঁলোকেও আগভাগ লৈছে। এইবাৰ এন ডি এই ৩২ গৰাকী ভূমিহাৰ প্ৰাৰ্থীক প্ৰক্ষেপ কৰাৰ বিপৰীতে মহাজোঁটে ১৫ গৰাকী ভূমিহাৰক প্ৰক্ষেপ কৰিছে। মকামাৰ দৰে বহুকেইখন আসনত দুয়োটা মিত্ৰজোঁটৰ হৈ মুখামুখিকৈ প্ৰতিদ্বন্দ্বিতা কৰিছে ভূমিহাৰ সম্প্ৰদায়ৰ প্ৰাৰ্থীয়ে।
২০২০ চনৰ বিধানসভা নিৰ্বাচনত ভূমিহাৰ সম্প্ৰদায়ৰ ২০ গৰাকী নেতাই জয়লাভ কৰি সদনলৈ যায়। এই সংখ্যা মুঠ আসনৰ প্ৰায় ১০ শতাংশ। গতিকে এইবাৰ ২০ জন বা তাতকৈ অধিক ভূমিহাৰে আসন লাভ কৰিলে এই জাতিয়ে চৰকাৰত আধিপত্য বিস্তাৰ কৰিব।
৫) মুছলমান- বিহাৰৰ জনসংখ্যাৰ প্ৰায় ১৭ শতাংশ মুছলমান। এই সম্প্ৰদায়ে চৰকাৰ গঠনত উল্লেখযোগ্য ভূমিকা পালন কৰিছে। এইবাৰ দুয়োটা মিত্ৰজোঁটে মুছলমানক বৃহৎ সংখ্যক টিকট দিছে। বহু ঠাইত সৰু সৰু দলৰ পৰা অহা মুছলমান প্ৰাৰ্থীৰো স্থিতি শক্তিশালী।
এইবাৰ এন ডি এই ৫ গৰাকী মুছলমানক টিকট দিয়াৰ বিপৰীতে মহাজোঁটে ২৯ গৰাকী মুছলমানক টিকট দিছে। ২০২০ চনত ১৯ গৰাকী মুছলমান বিধায়ক জয়ী হৈছিল বিহাৰত। কিন্তু এন ডি এৰ পৰা এজনো মুছলমান বিধায়ক নিৰ্বাচিত নহ’ল।
