মহুৱাৰ অগ্নিবৰ্ষণ, অমিত শ্বাহৰ মূৰ কাটি টেবুলত থ’বলৈ ক’লে তৃণমূল কংগ্ৰেছৰ সাংসদগৰাকীয়ে
কেন্দ্ৰীয় গৃহমন্ত্ৰী অমিত শ্বাহৰ বিৰুদ্ধে আপত্তিজনক মন্তব্য টিএমচিৰ সাংসদ মহুৱা মৈত্ৰৰ। গৃহমন্ত্ৰীৰ মূৰ কাটি টেবুলত ৰখাৰ কথা কৈছে মহুৱাই। পশ্চিম বংগত অবৈধ অনুপ্ৰৱেশ সম্পৰ্কে এই বক্তব্য সাংসদগৰাকীৰ। সীমান্ত সুৰক্ষা বাহিনীৰ ভূমিকাক লৈও প্ৰশ্ন উত্থাপন কৰিছে মৈত্ৰই। এই বক্তব্যৰ পিছত ৰাজনৈতিক বিতৰ্ক তীব্ৰতৰ হৈ পৰিছে।
কেন্দ্ৰীয় গৃহমন্ত্ৰী অমিত শ্বাহ সন্দৰ্ভত এক আপত্তিজনক বক্তব্য কৰিছে তৃণমূল কংগ্ৰেছৰ সাংসদ মহুৱা মৈত্ৰই। সকলো সীমা অতিক্ৰম কৰি মহুৱাই কয় যে গৃহমন্ত্ৰীৰ মূৰটো কাটি টেবুলত থৈ দিব লাগে। পশ্চিম বংগত অবৈধ অনুপ্ৰৱেশকাৰীৰ সৈতে জড়িত কাৰ্য সন্দৰ্ভত এই বক্তব্য কৰিছে মহুৱাই। ভাষণত তেওঁ যুক্তি আগবঢ়ায় যে অবৈধ অনুপ্ৰৱেশৰ দায়িত্ব সম্পূৰ্ণৰূপে কেন্দ্ৰীয় চৰকাৰ আৰু ইয়াৰ সংস্থাসমূহৰ।
মহুৱাই কয়, ‘‘তেওঁৰ বাবে মোৰ এটা স্পষ্ট প্ৰশ্ন আছে। তেওঁ মাথোঁ কৈছে অনুপ্ৰৱেশকাৰী… অনুপ্ৰৱেশকাৰী… অনুপ্ৰৱেশকাৰী। আমাৰ সীমান্তত পহৰা দি থকা সংস্থাটো কেন্দ্ৰীয় গৃহ মন্ত্ৰালয়ৰ অধীনত আছে। প্ৰধানমন্ত্ৰীয়ে ১৫ আগষ্টত লালকিল্লাৰ পৰা কয় যে অনুপ্ৰৱেশ চলি আছে আৰু তাৰ বাবেই জনগাঁথনি সলনি হৈছে। প্ৰধানমন্ত্ৰীয়ে এই কথা কৈ থকাৰ সময়ত আগশাৰীত বহি থকা গৃহমন্ত্ৰীয়ে তেওঁৰ কথা শুনি হাঁহি হাঁহি হাত চাপৰি বজাইছিল।”
তেওঁ আৰু কয়, ‘‘ভাৰতৰ সীমান্ত ৰক্ষা কৰিবলৈ যদি কোনো নাই। যদি আন দেশৰ মানুহে প্ৰতিদিনে শ শ, হাজাৰ-লাখকৈ অনুপ্ৰৱেশ কৰি আমাৰ মা-ভনীৰ ওপৰত চকু ৰাখিছে, আমাৰ মাটি কাঢ়ি লৈ গৈছে, তেন্তে প্ৰথমে অমিত শ্বাহৰ মূৰটো কাটি টেবুলত থৈ দিব লাগে।”
বি এছ এফ সন্দৰ্ভতো প্ৰশ্ন উত্থাপন কৰে মহুৱাই
ভাৰতত বসবাস কৰা ৰোহিংগীয়া আৰু বাংলাদেশৰ পৰা অহা অবৈধ অনুপ্ৰৱেশকাৰীক খেদি পঠিয়াবলৈ মোদী চৰকাৰে ‘অপাৰেচন পুছবেক’ আৰম্ভ কৰা সময়তে এই বিতৰ্ক চৰ্চালৈ আহিছে। সীমান্ত সুৰক্ষা বাহিনীক লৈ প্ৰশ্ন উত্থাপন কৰিলে মহুৱা মৈত্ৰই। তেওঁ কয়, “বি এছ এফ ইয়াত আছে। কি কৰি আছে বি এছ এফে? আমি (থলুৱা) বি এছ এফক ভয় খাইছো। ইয়াত (বংগত) কাৰো অনুপ্ৰৱেশ আমি দেখা নাপাওঁ।”
তেওঁৰ মন্তব্যই দেখুৱাইছে যে সীমান্ত সুৰক্ষাৰ ক্ষেত্ৰত বি এছ এফৰ ভূমিকা পশ্চিম বংগৰ স্থানীয় জনসাধাৰণৰ বাস্তৱতাৰ সৈতে মিল নাই। মহুৱাৰ এই বক্তব্য সন্দৰ্ভত সন্দীপ মজুমদাৰ নামৰ বিজেপি কৰ্মী এজনে নাদিয়া কোতৱালি থানাত লিখিত অভিযোগ দাখিল কৰি তেওঁৰ বিৰুদ্ধে ব্যৱস্থা গ্ৰহণৰ আবেদন জনাইছে।
ৰাহুলক আক্ৰমণ অমিত শ্বাহৰ
কেন্দ্ৰীয় গৃহমন্ত্ৰী অমিত শ্বাহ দুদিনীয়া ভ্ৰমণসূচীৰে অসমত আছে। শুকুৰবাৰে তেওঁ গুৱাহাটী ৰাজভৱনৰ নৱনিৰ্মিত ব্ৰহ্মপুত্ৰ ইউনিট উদ্বোধন কৰে। এই সময়ত কংগ্ৰেছ নেতা ৰাহুল গান্ধীক আক্ৰমণ কৰে শ্বাহে। তেওঁ কয় যে ৰাহুল গান্ধীয়ে নেতিবাচক ৰাজনীতি আৰম্ভ কৰিছে। তেওঁ আৰম্ভ কৰিছে অনুপ্ৰৱেশকাৰী বাচাও যাত্ৰা। ভোটাৰ তালিকাত থকা অনুপ্ৰৱেশকাৰীয়ে নিৰ্বাচন প্ৰদূষিত কৰিব। যদি ৰাহুল গান্ধীৰ কিবা লাজ বাকী আছে, তেন্তে তেওঁ প্ৰধানমন্ত্ৰী মোদী আৰু দেশবাসীৰ ওচৰত ক্ষমা খুজিব লাগে।
