ডাঙৰ বিপৰ্যয়ৰ আশংকা! ট্ৰাম্পৰ শুল্কই ভাৰতৰ কোনটো খণ্ডত কিমান প্ৰভাৱ পেলাব জানক…
১ আগষ্টৰ পৰা ভাৰতৰ ওপৰত কাৰ্যকৰী হ’বলগীয়া নতুন শুল্কই ভাৰতত প্ৰত্যক্ষ প্ৰভাৱ পেলাব। বিশেষজ্ঞসকলৰ মতে ২ৰ পৰা ৭ বিলিয়ন ডলাৰ হ্ৰাস পাব পাৰে ভাৰতৰ বাৰ্ষিক ৰপ্তানি । ২০২৩-২৪ চনত ভাৰতে আমেৰিকালৈ প্ৰায় ৭৭.৫২ বিলিয়ন ডলাৰৰ সামগ্ৰী ৰপ্তানি কৰিছিল।
আমেৰিকাৰ ৰাষ্ট্ৰপতি ড’নাল্ড ট্ৰাম্পে আগষ্টৰ শেষত ভাৰত আৰু আমেৰিকাৰ মাজত ষষ্ঠ ৰাউণ্ডৰ শুল্ক আলোচনা আৰু শুল্কৰ ১ আগষ্টৰ অন্তিম তাৰিখৰ পূৰ্বে ভাৰতৰ ওপৰত ২৫ শতাংশ শুল্ক আৰোপ কৰিছে। ইয়াৰ সমান্তৰালকৈ ট্ৰাম্পে ৰাছিয়াৰ সৈতে ব্যৱসায় কৰাৰ বাবে ভাৰতৰ ওপৰত পেনাল্টি আৰোপ কৰাৰ কথাও কয়। যদি ১ আগষ্টৰ পৰা ট্ৰাম্পে আৰোপ কৰা শুল্ক কাৰ্যকৰী হয় তেন্তে ইয়াৰ প্ৰত্যক্ষ প্ৰভাৱ ভাৰতৰ বহু ব্যৱসায়িক খণ্ডত পৰিব, যাৰ বিষয়ে এই প্ৰতিবেদনত আপোনালোকক বিতংভাৱে জনাম।
বস্ত্ৰ আৰু কাপোৰৰ ওপৰত প্ৰভাৱ
বস্ত্ৰ আৰু কাপোৰৰ বৃহৎ ৰপ্তানিকাৰক হৈছে ভাৰত। আমেৰিকাই ভাৰতৰ পৰা আটাইতকৈ বেছি কাপোৰ আৰু জোতা ক্ৰয় কৰে। ২৫ শতাংশ শুল্ক আৰু জৰিমনা বিহাৰ বাবে এই সামগ্ৰীসমূহ আমেৰিকাৰ বজাৰত ব্যয়বহুল হৈ পৰিব। ইয়াৰ ফলত ভাৰতীয় কোম্পানীসমূহৰ অৰ্ডাৰ আৰু শিপমেণ্টত প্ৰভাৱ পৰিব পাৰে আৰু ৰপ্তানি হ্ৰাস পাব পাৰে।
গহনা আৰু হীৰা
বিশ্বৰ ভিতৰতে সৰ্বাধিক হীৰা ৰপ্তানি কৰা দেশ ভাৰত। আমেৰিকাই ভাৰতৰ পৰা বৃহৎ পৰিমাণৰ গহনা আৰু হীৰা ক্ৰয় কৰে। নতুন শুল্কৰ পিছত ইয়াৰ মূল্য বৃদ্ধি পাব। এনে পৰিস্থিতিত আমেৰিকাৰ ক্ৰেতাই ভাৰতৰ পৰিৱৰ্তে আন দেশৰ পৰা হীৰা আৰু গহনা অৰ্ডাৰ কৰিব পাৰে।
অটোমোবাইল খণ্ডতো বিপদ
ভাৰতে আমেৰিকালৈ অটোমোবাইল আৰু অটো পাৰ্টছো ৰপ্তানি কৰে। ইতিমধ্যে ষ্টীল আৰু এলুমিনিয়ামৰ ওপৰত ২৫% শুল্ক আৰোপ কৰা হৈছে আৰু এতিয়া ১ আগষ্টৰ পৰা অটো খণ্ডত ২৫% কৰ আৰোপ কৰা হ’ব, গতিকে সেইবোৰৰ চাহিদা হ্ৰাস পাব পাৰে।
মোবাইল আৰু ইলেক্ট্ৰনিকছতো পৰিব প্ৰভাৱ
ভাৰতে প্ৰতি বছৰে আমেৰিকাক প্ৰায় ১৪ বিলিয়ন ডলাৰৰ মোবাইল, টেলিকম আৰু ইলেক্ট্ৰনিক সামগ্ৰী বিক্ৰী কৰে। এই শুল্কই এনে সামগ্ৰীৰ দাম বৃদ্ধি কৰিব। যাৰ বাবে আমেৰিকাৰ ক্ৰেতাসকলে আন দেশৰ ফালে মুখ কৰিব পাৰে। ইয়াৰ ফলত ভাৰতৰ কোটি কোটি টকাৰ ৰপ্তানি হ্ৰাস পোৱাৰ সম্ভাৱনা আছে। ইয়াৰ উপৰিও শুল্কৰ প্ৰভাৱ ৰাসায়নিক খণ্ডতো দেখা যাব।
এই খণ্ডসমূহো ২৫ শতাংশ শুল্কৰ দ্বাৰা প্ৰভাৱিত হ’ব
কিছুমান খণ্ডত আমেৰিকাৰ শুল্কৰ পৰা ৰেহাই দিয়া হৈছিল, য’ত ঔষধ (ফাৰ্মা), ছেমিছেক্টৰ, শক্তি সামগ্ৰী (তেল, গেছ, কয়লা, এল এন জি) আৰু তাম আদি অন্তৰ্ভুক্ত কৰা হৈছিল যদিও এই সকলোবোৰ কথা ১ আগষ্টৰ পৰা কাৰ্যকৰী হ’বলগীয়া শুল্কত অন্তৰ্ভুক্ত হ’ব পাৰে।যাৰ বাবে ইয়াৰ ৰপ্তানিৰ ওপৰত প্ৰভাৱ পৰাটো স্বাভাৱিক।
কিমান ক্ষতি হ’ব পাৰে ভাৰত?
১ আগষ্টৰ পৰা ভাৰতৰ ওপৰত কাৰ্যকৰী হ’বলগীয়া নতুন শুল্কই ভাৰতত প্ৰত্যক্ষ প্ৰভাৱ পেলাব। বিশেষজ্ঞসকলৰ মতে ভাৰতৰ বাৰ্ষিক ৰপ্তানি ২ৰ পৰা ৭ বিলিয়ন ডলাৰ হ্ৰাস পাব পাৰে। ২০২৩-২৪ চনত ভাৰতে আমেৰিকালৈ প্ৰায় ৭৭.৫২ বিলিয়ন ডলাৰৰ সামগ্ৰী ৰপ্তানি কৰিছিল, যিটো ভাৰতৰ মুঠ ৰপ্তানিৰ প্ৰায় ১৮%। এনে পৰিস্থিতিত এই বিপৰ্যয় ভাৰতৰ বাবে অতি ডাঙৰ বুলি বিবেচিত হৈছে।
