কৃষিজাত সামগ্ৰী ৰপ্তানিৰ বাবে সাজু হৈছে পতঞ্জলি! চৰকাৰৰ পৰিকল্পনা কি?

জেৱৰ বিমানবন্দৰৰ ওপৰত নিৰ্ভৰ কৰি ৱেষ্ট ইউপিক এক প্ৰধান ৰপ্তানি কেন্দ্ৰ হিচাপে গঢ়ি তোলাৰ পৰিকল্পনা কৰিছে উত্তৰ প্ৰদেশ চৰকাৰে । ইয়াৰ বাবে চৰকাৰে যমুনা এক্সপ্ৰেছৱে অৰ্থাৎ জেৱৰ বিমানবন্দৰৰ ওচৰত এখন ফুড পাৰ্ক নিৰ্মাণৰ প্ৰস্তুতি চলাইছে। এই মেগা প্ৰজেক্টত পতঞ্জলি এক উল্লেখযোগ্য সহায়ক হ’ব পাৰে।

খবৰ অনুসৰি যমুনা এক্সপ্ৰেছৱে ইণ্ডাষ্ট্ৰিয়েল ডেভেলপমেণ্ট অথৰিটি (YEIDA)-এ পতঞ্জলি আৰু কৰ্ণাটকৰ কোলাৰৰ ইনোভা ফুড পাৰ্কৰ মাজত অংশীদাৰিত্বৰ প্ৰস্তাৱ প্ৰস্তুত কৰিছে। যাতে জেৱৰ আন্তঃৰাষ্ট্ৰীয় বিমানবন্দৰৰ সমীপত কৃষি ৰপ্তানি কেন্দ্ৰ স্থাপন কৰিব পৰা যায়। কৰ্তৃপক্ষই পতঞ্জলিক ছেক্টৰ ২৪এত আবণ্টিত ফুড পাৰ্কৰ ৫০ একৰ মাটি ইনোভাক চাবলিজত দিবলৈ প্ৰস্তাৱ আগবঢ়াইছে।

য়ীডায়ে পতঞ্জলিক এই অফাৰ দিছে

য়ীডা(YEIDA)ৰ বিশেষ কাৰ্যবাহী বিষয়া শৈলেন্দ্ৰ ভাটিয়াই জনোৱা মতে, YEIDA-এ এই প্ৰস্তাৱৰ বিষয়ে পতঞ্জলিৰ সৈতে আলোচনা কৰিছে আৰু কোম্পানীটোৰ স্থিতি এতিয়াও চূড়ান্ত হোৱা নাই। ইয়াৰ বাবে পতঞ্জলিৰ সৈতে যোগাযোগ কৰিছে কৰ্তৃপক্ষই। ইতিমধ্যে পতঞ্জলিৰ ২৪এ খণ্ডত বৃহৎ আবণ্টিত প্লট আছে আৰু ইয়াৰ প্ৰকল্পৰ চৰ্ত অনুসৰি ২০% পৰ্যন্ত মাটি চাবলিজত লোৱাৰ অধিকাৰ আছে। এই ভূমি উপযুক্ত স্থানত অৱস্থিত আৰু ইতিমধ্যে কৃষি প্ৰক্ৰিয়াকৃত কামৰ বাবে নিৰ্দিষ্ট কৰা হৈছে। যদি পতঞ্জলিয়ে এই মাটি ফুড পাৰ্কৰ বাবে চাবলিজত লয় তেন্তে ইয়াৰ প্ৰকল্পটোৱে উদগনি লাভ কৰিব।

এই প্ৰস্তাৱত ইতিমধ্যে অনুমোদন জনাইছে উত্তৰ প্ৰদেশৰ কেবিনেটে। ইয়াৰ উপৰিও ই বিশ্ব বেংক আৰু ইউ পি কৃষি উন্নয়ন আৰু গ্ৰাম্য উদ্যোগ পৰিৱেশ তন্ত্ৰ শক্তিশালীকৰণ প্ৰকল্পৰ অংশ। এই প্ৰকল্পটো ফাৰ্ম-টু-মাৰ্কেট সংযোগ প্ৰসাৰ আৰু খণ্ডটোৰ মূল লজিষ্টিক কেন্দ্ৰ জেৱাৰ বিমানবন্দৰৰ ওচৰত কৃষি ৰপ্তানি আন্তঃগাঁথনি বৃদ্ধিৰ বাবে ৰচনা কৰা হৈছে। অৱশ্যে পতঞ্জলিয়ে এতিয়াও কোনো আনুষ্ঠানিক বিবৃতি প্ৰকাশ কৰা নাই।

খাদ্য উদ্যানখনৰ লক্ষ্য হৈছে কৃষি আৰু উদ্যান শস্যৰ সামগ্ৰী পৰীক্ষা, গ্ৰেডিং, আৰু ৰপ্তানিৰ বাবে পেকেজিঙৰ বাবে অত্যাধুনিক সুবিধা প্ৰদান কৰা। বিমানবন্দৰৰ কাৰ্গো টাৰ্মিনেলৰ পৰা প্ৰায় ১০ কিলোমিটাৰ দূৰত্বত অৱস্থিত হোৱা বাবে মধ্যপ্ৰাচ্য, ইউৰোপ, ৰাছিয়াকে ধৰি আন্তঃৰাষ্ট্ৰীয় বজাৰলৈ কৃষিজাত সামগ্ৰীৰ প্ৰত্যক্ষ ৰপ্তানি সক্ষম কৰিব, যাৰ ফলত ট্ৰেনজিট সময় আৰু লজিষ্টিক খৰচ হ্ৰাস পাব।

২০১৭ চনত ৰাজ্য চৰকাৰে ২৪ নং ছেক্টৰৰ পতঞ্জলি গ্ৰুপক ৪৩০ একৰ মাটি আবণ্টন দি এখন খাদ্য আৰু বনৌষধি উদ্যান গঢ়ি তুলিছিল। ইয়াৰে ৩০০ একৰ মাটি পতঞ্জলি ফুড এণ্ড হাৰ্বেল পাৰ্ক নয়ডা প্ৰাইভেট লিমিটেড আৰু ১৩০ একৰ মাটি পতঞ্জলি আয়ুৰ্বেদ লিমিটেডক আবণ্টন দিয়া হয়। যদি পতঞ্জলিয়ে সন্মতি দিয়ে তেন্তে ৫০ একৰ ভূমিৰ উপ-লিজে ইনোভাক কৃষি ৰপ্তানি কেন্দ্ৰ স্থাপন কৰাত সহায় কৰিব। যাৰ ফলত অঞ্চলটোৰ কৃষি উৎপাদিত সামগ্ৰীক বিশ্বৰ বজাৰৰ সৈতে পোনপটীয়াকৈ সংযোগ কৰি পশ্চিম উত্তৰ প্ৰদেশক এক প্ৰধান কৃষি ৰপ্তানি অঞ্চল হিচাপে প্ৰতিষ্ঠা কৰিব।