শেহতীয়া খবৰঅসমভাৰতমনোৰঞ্জনব্যৱসায়শিক্ষাখেলজীৱনশৈলীবিশ্বপ্ৰযুক্তিৱেব ষ্ট'ৰীফটোVideos

গৰু বিহুক লৈ মুখ্যমন্ত্ৰীৰ বিশেষ পোষ্ট, কি ক’লে হিমন্ত বিশ্ব শৰ্মাই…

Rongali Bihu: ৰঙালী বিহুৰ আৰম্ভণিৰ আজিৰ দিনটোত প্ৰতিগৰাকী অসমীয়াই পুৱাই উঠি নদীৰ পাৰলৈ গৰু নি গা-পা ধুৱাই গৰু বিহু পালন কৰিছে। ইয়াৰ পাছতে কাইলৈ সকলোৱে পালন কৰিব মানুহ বিহু।

গৰু বিহুক লৈ মুখ্যমন্ত্ৰীৰ বিশেষ পোষ্ট, কি ক’লে হিমন্ত বিশ্ব শৰ্মাই…
হিমন্ত বিশ্ব শৰ্মাImage Credit source: Facebook (himanta biswa sarma)
barasha-sarma
Barasha Sarma | Published: 14 Apr 2025 18:03 PM
আজি সমূহ অসমবাসীয়ে পালন কৰিছে গৰু বিহু। ৰঙালী বিহুৰ আৰম্ভণিৰ আজিৰ দিনটোত প্ৰতিগৰাকী অসমীয়াই পুৱাই উঠি নদীৰ পাৰলৈ গৰু নি গা-পা ধুৱাই গৰু বিহু পালন কৰিছে। ইয়াৰ পাছতে কাইলৈ সকলোৱে পালন কৰিব মানুহ বিহু। আজি গৰু বিহুৰ ক্ষণত মুখ্যমন্ত্ৰী হিমন্ত বিশ্ব শৰ্মাই সামাজিক মাধ্যমত এক বিশেষ পোষ্ট কৰে। সেই লেখাটো অ-সম্পাদিত ৰূপত প্ৰকাশ কৰা হ’ল-

“গৰু বিহু : ব’হাগ বিহুৰ সৈতে সম্পৃক্ত গৰু বিহুত সমৃদ্ধ আমাৰ জাতীয় জীৱনৰ এক সুকীয়া তাৎপৰ্য৷ আৰু সেইবাবে আমি প্ৰতিগৰাকী অসমীয়াই পৱিত্ৰ গৰু বিহু আজি উদযাপন কৰিছোঁ৷ আজিৰ দিনটোত অসমবাসীয়ে অতি পৱিত্ৰ আৰু গভীৰ অৰ্থৱহ পৰম্পৰা পালন কৰি আহিছোঁ৷ ৰঙালী বিহুৰ আৰম্ভণিৰ আজি প্ৰথম আৰু আধ্যাত্মিকভাৱে তাৎপৰ্যপূৰ্ণ দিনটো আমাৰ সভ্যতাত মাতৃত্ব, জীৱিকা, পৱিত্ৰতাৰ প্ৰতীক, চিৰপালক হিচাপে ঐশ্বৰিক স্থান দখল কৰা গৰুৰ সেৱাৰ বাবে উৎসৰ্গিত কৰা হয়।

গৰু বিহুক আৰু অতি বিশেষ কৰি তোলা কথাটো হ’ল– এই বিহুটিয়ে প্ৰকৃত আৰম্ভণিৰ সূচনা কৰে ব’হাগ বিহুৰ। আজিৰ দিনটোত সভক্তি আৰু আন্তৰিক কৃতজ্ঞতাৰে গৰুক সেৱা কৰাৰ পাছতহে জাতীয় জীৱনৰ প্ৰতি পৰিয়ালসমূহে মানুহ বিহু আৰু তাৰ পাছৰ আনন্দময় উৎসৱ উদযাপন কৰিবলৈ আগবাঢ়ে। সেইবাবেই গৰু বিহুক সমগ্ৰ ৰঙালী বিহুৰ আধ্যাত্মিক ভেটি হিচাপেও মান্যতা দিয়া হয়” ৷

শ্ৰদ্ধা আৰু প্ৰেমৰ পৰম্পৰা আৰু আচাৰ-নীতি

পুৱাৰ ভাগত গৰুক নদী, পুখুৰী বা বিশেষভাৱে প্ৰস্তুত কৰা গা ধোৱা ঠাইলৈ প্ৰথমতে লৈ যোৱা হয়। অতি ঔষধি তথা বিশুদ্ধকৰণ গুণৰ বাবে জনাজাত পৰম্পৰাগত উপাদান কেচাঁ হালধি আৰু মাটি মাহৰ সংমিশ্ৰণ সানি গোধনক গা ধুওৱা হয়। এই সময়তে পৰম্পৰাগতভাৱে চলি অহা ৰীতি-নীতি, আচাৰ-নিয়মেৰে কৃষকে গৰুক সেৱা জনাই কৃতজ্ঞতা প্ৰকাশ কৰি আনন্দেৰে আমাৰ চহকী বিহুনাম জোৰে৷

গা ধোৱাৰ পাছত গৰুক লাউ, বেঙেনা, কেতুৰি আদিৰ দ্বাৰা খুব সুন্দৰকৈ গঁথা মালাৰে সজাই তোলা হয়। লগতে গোধনৰ শিংবোৰ মিঠাতেলেৰে চিকচিকিয়া কৰি সানি দিয়া হয়৷ ঘৰতে বনোৱা পিঠা, গুড়, সেউজীয়া ঘাঁহ-বন গৰুলৈ আগবঢ়োৱা হয়। প্ৰতিখন ঘৰৰ গৃহস্থই গোধনৰ স্বাস্থ্যৰ বাবে, ভাল শস্যৰ বাবে আৰু অনাগত বছৰটিত সমন্বয়-সম্প্ৰীতিৰ বাবে প্ৰাৰ্থনা জনায়৷

ইয়াৰ পাছত দীঘলতি আৰু মাখিয়তি আদি বনৌষধি গছৰ ডাল-পাতেৰে প্ৰতীকীভাৱে গৰুক আলফুলে কোবোৱা হয়৷ এই পৰম্পৰাৰ দ্বাৰা বুজি উঠা যায় যে আহিবলগীয়া দিনসমূহত যাতে পোক-পৰুৱা আৰু ৰোগ-ব্যাধি, অশুভ শক্তি আদিৰ পৰা গোধনৰ লগতে গোটেই পৰিয়ালটো মুক্ত হৈ থাকিব পাৰে৷ ইয়াতেই লুকাই আছে পৰিৱেশ সচেতনতাকে ধৰি আধ্যাত্মিক বিশ্বাস আদি৷

প্ৰাচীন কালৰ পৰা শিপাই থকা গভীৰ প্ৰজ্ঞা…
অসমৰ গৰু বিহু যুগ যুগ ধৰি প্ৰবাহিত হৈ থকা ধাৰাবাহিকতা, য’ত গৰুক পৱিত্ৰ আৰু আমাৰ জীৱনৰ বাবে অপৰিহাৰ্য বুলি শ্ৰদ্ধা কৰা হয়। প্ৰজন্মৰ পাছত প্ৰজন্ম ধৰি অসমীয়া মানুহে গৰুক কেৱল পশুধন হিচাপে নহয়, ঘৰৰ এগৰাকী পূজ্য সদস্য হিচাপেহে মান্যতা দি আহিছে, সন্মান জনাই আহিছে আৰু সেৱা কৰি আহিছে৷
আজিৰ বাবে এটি বাৰ্তা…
প্ৰকৃতি আৰু পৰম্পৰাগত মূল্যবোধৰ সৈতে ক্ৰমাৎ বিচ্ছিন্ন হৈ পৰা সময়ত গৰু বিহু চাৰিওদিশে অতি সন্মানেৰে উদযাপন কৰাটোৱে প্ৰতিটো নতুন সময়ক কৃতজ্ঞতা আৰু শ্ৰদ্ধাৰে আৰম্ভ কৰিবলৈ আমাক সোঁৱৰাই দিছে। কৃষি কৰ্ম আৰু অন্যান্য ক্ষেত্ৰত গোধনে অসমীয়া সমাজখনক উপকৃত কৰি আহিছে আৰু আমি যিকোনো উৎসৱ উদযাপনৰ পূৰ্বে প্ৰথমে নিস্বাৰ্থভাৱে আমাৰ সেৱা কৰাসকলক সন্মান-কৃতজ্ঞতা জনোৱা উচিত” ৷