নেপালত ভয়ংকৰ ৰূপ লৈছে প্ৰতিবাদে, এদিনতে ১৯ গৰাকী প্ৰতিবাদকাৰীৰ মৃত্যু

কেবাটাও ছ’চিয়েল মিডিয়া প্লেটফৰ্ম নিষিদ্ধ ঘোষণা কৰাৰ বিৰুদ্ধে নেপালত Gen-Z বা নৱ প্ৰজন্মৰ যুৱক-যুৱতীৰ ব্যাপক প্ৰতিবাদ। নেপালৰ বিভিন্ন জিলাত নিৰাপত্তা বাহিনীয়ে প্ৰতিবাদকাৰীৰ ওপৰত গুলীচালনা কৰাত এদিনতে কমেও ১৯ জন প্ৰতিবাদকাৰী নিহত হয়। ২০০৬ চনত ৰজা জ্ঞানেন্দ্ৰক উৎখাত কৰা আন্দোলনৰ পিছত সৰ্বাধিক মৃত্যু হোৱা প্ৰতিবাদ হিচাপে চিহ্নিত হৈছে এই প্ৰতিবাদ।

২০০৬ চনত কেইবা সপ্তাহ ধৰি চলি থকা প্ৰতিবাদত মুঠ ১৮ জন লোকৰ মৃত্যু হৈছিল, যিয়ে অৱশেষত নেপালত শতিকাজুৰি চলি অহা ৰাজতন্ত্ৰৰ অন্ত পেলাই হিমালয় দেশখনক গণতান্ত্ৰিক গণৰাজ্য হোৱাৰ পথ প্ৰশস্ত কৰিছিল।

ইফালে স্বাস্থ্য আৰু জনসংখ্যা মন্ত্ৰালয়ৰ এক আপডেট অনুসৰি সমগ্ৰ হিমালয় ৰাষ্ট্ৰত চলা ধাৰাবাহিক প্ৰতিবাদত আজি আৰক্ষীৰ গুলীচালনাত ১২ বছৰীয়া শিশুকে ধৰি ১৯ জন প্ৰতিবাদকাৰীৰ মৃত্যু হয়। ছ’চিয়েল মিডিয়া নিষেধাজ্ঞাক অৱমাননা কৰি অবাধ দুৰ্নীতিৰ ওপৰত আলোকপাত কৰিবলৈ প্ৰতিবাদকাৰীসকলে ছ’চিয়েল মিডিয়াত প্ৰতিবাদ সাব্যস্ত কৰিবলৈ আহ্বান জনাইছিল।

স্বাস্থ্য মন্ত্ৰালয়ে প্ৰকাশ কৰা তথ্য অনুসৰি ৰাষ্ট্ৰীয় ট্ৰমা চেণ্টাৰত ৮ জন, এভাৰেষ্ট হাস্পতাল আৰু অসামৰিক চিকিৎসালয়ত তিনিজন, ত্ৰিভুৱন বিশ্ববিদ্যালয়ৰ চিকিৎসালয়ত এজন আৰু কাঠমাণ্ডু চিকিৎসা মহাবিদ্যালয়ত ২ জন প্ৰতিবাদকাৰীৰ মৃত্যু হৈছে। তদুপৰি সুনছাৰী জিলাৰ ইটাহাৰী চহৰত আন দুজন লোকৰ মৃত্যু হয়।

“মোৰ কলেজখন প্ৰথমে প্ৰতিবাদ আৰম্ভ হোৱা ঠাইখনৰ ঠিক ওচৰতে। বাহিৰলৈ ওলাই যাওঁতে বহু লোকে প্ৰতিবাদ কৰা দেখিছিলো। এজন ব্যক্তি হিচাপে, এজন নেপালী নাগৰিক হিচাপে কিবা এটাই মোক বাধ্য কৰাইছিল, আৰু মোৰ বন্ধু-বান্ধৱীৰ সৈতে ময়ো প্ৰতিবাদত যোগদান কৰিছিলো। প্ৰতিবাদলৈ অহাৰ আগতে মই অনুভৱ কৰিছিলো যে যি হৈ আছে তাৰ সাক্ষী হৈ মই বেলেগ অৰ্থত এক বেলেগ মানুহ হৈ পৰিছো। আমাৰ বিষয়ে প্ৰতিবাদ কৰি থকা লোকসকলক কেনেদৰে গুৰুত্ব নিদিয়ে, সেয়া দেখি মোৰ দুখ লাগে।” মৃত্যুৰ সংখ্যা বৃদ্ধিৰ পিছত এএনআইক এইদৰে কয় এজন প্ৰতিবাদকাৰীয়ে।

সোমবাৰৰ প্ৰতিবাদৰ সময়ত আৰক্ষীয়ে বিক্ষোভকাৰীৰ বিৰুদ্ধে পানী হিলৈ, কন্দুৱা গেছ, গোলাবাৰুদ ব্যৱহাৰ কৰে। সংসদ ভৱনৰ ভিতৰৰ পৰা গুলীচালনা কৰে যদিও প্ৰতিবাদকাৰীয়ে প্ৰৱেশদ্বাৰত জুই লগাই দিয়ে। সমগ্ৰ কাঠমাণ্ডু আৰু অন্যান্য ডাঙৰ চহৰত বিক্ষোভ অব্যাহত আছে, ছ’চিয়েল মিডিয়াৰ নিষেধাজ্ঞা আৰু চৰকাৰী দুৰ্নীতিৰ বিৰুদ্ধে প্ৰতিবাদকাৰীয়ে একত্ৰিত হৈছে।

আন এজন প্ৰতিবাদকাৰীয়ে এএনআইক কয় যে, “আমি ইয়াত দুৰ্নীতি আৰু ছ’চিয়েল মিডিয়া নিষেধাজ্ঞাৰ বিৰুদ্ধে প্ৰতিবাদ কৰিবলৈ আহিছো। ৰাজপথত মানুহৰ মৃত্যু হৈছে; ১৫ জনতকৈ অধিক লোকক গুলীয়াই হত্যা কৰা দেখিছো। পৰ্যাপ্ত এম্বুলেন্স নাই, আৰু চিকিৎসালয়ৰ সম্পদ শেষ হৈ গৈছে। চৰকাৰে আমাৰ প্ৰতি কোনো গুৰুত্ব নিদিয়ে; তেওঁলোকে শিশু, আইডি কাৰ্ড লৈ স্কুলৰ ইউনিফৰ্ম পিন্ধা ছাত্ৰ-ছাত্ৰীক হত্যা কৰিছে। এই চৰকাৰে আমাৰ প্ৰতি কোনো গুৰুত্ব নিদিয়ে।”

আৰক্ষীৰ বৰ্বৰতাৰ বাবে এদিনত সৰ্বাধিক মৃত্যু ঘটাৰ পিছতে ৰাষ্ট্ৰীয় মানৱ অধিকাৰ আয়োগে প্ৰতিবাদ চম্ভালিবলৈ কৰ্তৃপক্ষক সংযম কৰিবলৈ আহ্বান জনাইছে।

কাঠমাণ্ডুত সংসদ ভৱনত প্ৰৱেশৰ প্ৰয়াস কৰি মৈতঘৰৰ পৰা নতুন বানেশ্বৰলৈ প্ৰতিবাদ সাব্যস্ত কৰে। এন এইচ আৰ চিয়ে নেপালৰ সংবিধান আৰু আন্তঃৰাষ্ট্ৰীয় মানৱ অধিকাৰ আইন অনুসৰি শান্তিপূৰ্ণ মতানৈক্যৰ অধিকাৰ নিশ্চিত কৰা বুলি উল্লেখ কৰি ভাঙি-ছিঙি পেলোৱাৰ ৰূপ আৰু নিৰাপত্তাৰক্ষীয়ে অত্যধিক বল প্ৰয়োগ কৰাটো “আক্ষেপজনক” বুলি অভিহিত কৰে।

অধিক ক্ষতি ৰোধ কৰিবলৈ, ভুক্তভোগীৰ পৰিয়ালক সকাহ আৰু ক্ষতিপূৰণ প্ৰদান কৰিবলৈ, আহতসকলৰ বিনামূলীয়া চিকিৎসা নিশ্চিত কৰিবলৈ, অপৰাধীক জবাবদিহি কৰিবলৈ ন্যায্য আৰু পুংখানুপুংখ তদন্ত চলাবলৈ আয়োগে চৰকাৰক নিৰ্দেশ দিয়ে। প্ৰতিবাদকাৰীসকলক শান্তিপূৰ্ণ আৰু অনুশাসিত বিক্ষোভ বজাই ৰাখিবলৈও আহ্বান জনোৱা হয়।