১ লাখ কোটি টকাৰ চুক্তি! অধিক শক্তিশালী হ’ব ভাৰতীয় নৌসেনা…
শক্তি বৃদ্ধি হ'ব ভাৰতীয় নৌসেনাৰ। অহা বছৰৰ মাজভাগত ভাৰতে কেইবাখনো নতুন চুক্তিত স্বাক্ষৰ কৰিব। যাৰ অধীনত কেইবাখনো চাবমেৰিন লাভ কৰিব।
ভাৰত মহাসাগৰত চীনৰ ক্ৰমবৰ্ধমান নৌসেনাৰ শক্তিক প্ৰতিহত কৰিবলৈ ভাৰতে এক বৃহৎ পদক্ষেপ গ্ৰহণ কৰিবলৈ সাজু হৈছে। প্ৰতিৰক্ষা মন্ত্ৰালয়ৰ সূত্ৰই জনোৱা মতে, অহা বছৰৰ মাজভাগৰ ভিতৰত প্ৰায় ১ লাখ কোটি টকাৰ এক ডাঙৰ চুক্তি চূড়ান্ত হ’ব। এই চুক্তি অনুসৰি ভাৰতে একাধিক চাবমেৰিন লাভ কৰিব। যদি চাবমেৰিনবোৰ ভাৰতৰ হাতলৈ আহে তেন্তে পানীৰ তলৰ শক্তিৰ ক্ষেত্ৰত ভাৰতে পাকিস্তান, চীন আদিক প্ৰত্যাহ্বান জনাব পাৰিব।
তথ্য অনুসৰি, প্ৰথম চুক্তিৰ মূল্য প্ৰায় ৩৬ হাজাৰ কোটি টকা। এই চুক্তিৰ অধীনত তিনিখন স্কোৰ্পিয়ন শ্ৰেণীৰ চাবমেৰিন নিৰ্মাণ কৰা হ’ব। চৰকাৰী কোম্পানী মাজাগন ডক লিমিটেড আৰু ফ্ৰান্সৰ কোম্পানী নেভাল গ্ৰুপে যৌথভাৱে এই চাবমেৰিনসমূহ নিৰ্মাণ কৰিব।
দ্বিতীয় প্ৰকল্পটো আৰু ডাঙৰ। ‘মেক ইন ইণ্ডিয়া’ নীতিৰ অধীনত প্ৰায় ৬৫ হাজাৰ কোটি টকা ব্যয়েৰে ৬খন অত্যাধুনিক ডিজেল-ইলেক্ট্ৰিক ষ্টেল্থ চাবমেৰিন ক্ৰয় কৰা হ’ব। জাৰ্মানীৰ থাইচেনক্ৰুপ মেৰিন চিষ্টেমছ (টিকেএমএছ) আৰু মাজাগন ডক লিমিটেডে এই প্ৰকল্পৰ বাবে ইতিমধ্যে সাজু হৈছে। ইয়াক ‘প্ৰজেক্ট ৭৫ ইণ্ডিয়া’ (P75-I) বুলি জনা যায়।
