পুনৰ ভাৰতত উপলব্ধ হ’ব নেকি TikTok ? আৰম্ভ হৈছে কোম্পানীৰ নিযুক্তি প্ৰক্ৰিয়া…
পুনৰ ভাৰতলৈ ঘূৰি আহিব নেকি টিকটক? জানিব পৰা মতে, শেহতীয়াকৈ ভাৰতত থকা টিকটকৰ কাৰ্যালয়ে নিযুক্তি প্ৰক্ৰিয়া আৰম্ভ কৰিছে। যাৰ বাবে একাংশই কৈছে যে পুনৰ টিকটিক ঘূৰি আহিব পাৰে।
আমেৰিকাৰ শুল্ক ভাবুকিৰ পাছে বৃদ্ধি পাইছে ভাৰত-চীনৰ ঘনিষ্ঠতা। এনে ক্ষেত্ৰত যোৱা কেইটামান দিনত এটা খবৰে তীব্ৰ চৰ্চা লাভ কৰিছে যে ভাৰতলৈ পুনৰ ঘূৰি আহিব টিকটক। অৱশ্যে টিকটক ঘূৰি আহিব বুলি কোম্পানীটোৱে আনুষ্ঠানিক ঘোষণা কেতিয়াও কৰা নাই। এয়া মাঁথো একাংশৰ জল্পনা-কল্পনা। কিন্তু শেহতীয়াকৈ এক ঘটনাই মানুহৰ দৃষ্টি আকৰ্ষণ কৰিছে। কোম্পানীৰ গুৰুগ্ৰাম অফিচত আৰম্ভ হৈছে নতুন নিযুক্তি। গতিকে প্ৰশ্ন হয়, সঁচাকৈ টিকটক পুনৰ ঘূৰি আহিব নেকি?
বৰ্তমান ভাৰতত নিষিদ্ধ
টিকটকৰ মূল কোম্পানী বাইটডান্স আৰু ভাৰত চৰকাৰে ইতিমধ্যে স্পষ্ট কৰি দিছে যে, বৰ্তমান টিকটক এপ ভাৰতত নিষিদ্ধ হৈ আছে। ইয়াৰোপৰি এই এপটো ঘূৰি অহাৰ সম্ভাৱনা বৰ্তমান নাই। ভাৰত চৰকাৰৰ মতে, TikTok ক আনব্লক কৰাৰ কোনো নিৰ্দেশ এতিয়ালৈকে দিয়া নাই। এই এপটো বৰ্তমান সময়ত Google Play Store আৰু Apple App Store উপলব্ধ নাই। গতিকে টিকটক ঘূৰি অহা বুলি যি খবৰ প্ৰচাৰিত হৈ আছে সেই সকলোবোৰ উৰাবাতৰি।
নিযুক্তি
এই সকলোবোৰৰ মাজতে শেহতীয়াকৈ ভাৰতৰ গুৰুগ্ৰামত থকা টিকটকৰ কাৰ্যলয়ে নতুন চাকৰিৰ বাবে আবেদন আহ্বান কৰিছে। ইয়াৰ ভিতৰত আছে কন্টেন্ট মডাৰেটৰ (বাংলা ভাষা),ৱেলবিয়িং পাৰ্টনাৰশ্বিপ এণ্ড অপাৰেচন লিড। এই নিযুক্তিসমূহৰ বাবে আবেদন LinkedIn আৰু অন্য পেছাদাৰী চাইটত আহ্বান কৰা হৈছে। যাৰ বাবে একাংশই ভাবিছে যে টিকটক পুনৰ ভাৰতলৈ ঘূৰি আহিব।
ঘূৰি আহিব নেকি
ভাৰতত টিকটকৰ কাৰ্যালয়ৰ বাবে নিযুক্তি দিয়া প্ৰক্ৰিয়াটোৱে ইংগিত দিছে যে, কোম্পানীটোৰ চকু ভাৰতীয় বজাৰৰ ওপৰত। সম্ভৱত ভাৰতত টিকটক পুনৰ ঘূৰি অহা বাবে এটা স্থানীয় ডাটা চাৰ্ভাৰ তৈয়াৰ কৰিব লাগিব। চৰকাৰৰ পৰা অনুমোদনৰ লগতে চৰ্ত মানি চলিব লাগিব। ইয়াৰ পূৰ্বে Krafton য়ে BGMI (PUBG Mobile)ক উভতাই আনিবলৈ কিছুমান নিয়ম মানিবলগীয়া হৈছিল।
এতিয়ালৈকে এই ক্ষেত্ৰত কোনো আনুষ্ঠানিক ঘোষণা হোৱা নাই। কিন্তু নিযুক্তি প্ৰক্ৰিয়া চাই ক’ব পাৰি যে সম্ভৱতঃ ভৱিষ্যতে টিকটকৰ ক্ষেত্ৰত সামাজিক মাধ্যম ব্যৱহাৰকাৰীসকলে কোনো খবৰ লাভ কৰিব পাৰে।
উল্লেখ্য যে, ২০২০ চনৰ জুন মাহত ভাৰত চৰকাৰে টিকটককে ধৰি ৫৯টা চীনা এপ নিষিদ্ধ কৰিছিল। চৰকাৰে কৈছিল যে, ৰাষ্ট্ৰীয় নিৰাপত্তাৰ খাতিৰত এই সিদ্ধান্ত লোৱা হৈছে। ভাৰতে আশংকা কৰিছিল যে ইয়াৰ জৰিয়তে গোপন তথ্য চীনলৈ প্ৰেৰণ কৰা হৈছিল। কিন্তু এতিয়া ভাৰতৰ সৈতে চীনৰ সম্পৰ্ক উন্নত হোৱাত একাংশই আশা কৰিছে যে এই এপটো পুনৰ ভাৰতত উপলব্ধ হ’ব।
অন্য খবৰ পঢ়কঃ AADHAAR Card: আধাৰ কাৰ্ডত ভুল হৈ আছে নেকি ঠিকনা? ঘৰতে বহি এনেকৈ কৰক ঠিক, জানক সকলো প্ৰক্ৰিয়া…
