শুভমন গিলৰ ঐতিহাসিক প্ৰদৰ্শনৰ পাছতেই আচিচিৰ গুৰুত্বপূৰ্ণ সিদ্ধান্ত, গিলৰ সমুখত সোণালী সুযোগ
জুলাই মাহত ইংলেণ্ডৰ বিৰুদ্ধে তিনিখন টেষ্ট মেচত গিলে গড়ে ৯৪.৫০ ৰান কৰি ৫৬৭ ৰান সংগ্ৰহ কৰে। এডজবেষ্টনত ইংলেণ্ডৰ বিৰুদ্ধে খেলা দ্বিতীয়খন টেষ্ট মেচত প্ৰথম ইনিংছত ২৬৯ ৰান সংগ্ৰহ কৰাৰ বিপৰীতে দ্বিতীয় ইনিংছত ১৬১ ৰান সংগ্ৰহ কৰে।
ইংলেণ্ডৰ বিৰুদ্ধে পাঁচখনীয়া টেষ্ট শৃংখলাত ভাৰতীয় দলৰ অধিনায়ক শুভমন গিলে উজ্জ্বল প্ৰদৰ্শন আগবঢ়ায়। এই শৃংখলাত তেওঁ আছিল সৰ্বাধিক ৰান সংগ্ৰহকাৰী। এই প্ৰদৰ্শনৰ বাবেই তেওঁ এতিয়া আই চি চিৰ বিশেষ বঁটাৰ বাবে মনোনীত হৈছে। ভাৰত আৰু ইংলেণ্ডৰ মাজত খেলা টেষ্ট শৃংখলাৰ পিছতে আইচিচিয়ে এই মনোনয়ন প্ৰকাশ কৰে য’ত তিনিজন খেলুৱৈক অন্তৰ্ভুক্ত কৰা হৈছে। শুভমন গিলো এই তিনিগৰাকী খেলুৱৈৰ ভিতৰত অন্যতম।
শুভমন গিল মনোনীত
আইচিচিয়ে ২০২৫ চনৰ জুলাই মাহৰ পুৰুষৰ শ্ৰেষ্ঠ খেলুৱৈৰ বাবে মনোনীতসকলৰ নাম প্ৰকাশ কৰিছে। এই তালিকাত তিনিগৰাকী খেলুৱৈক অন্তৰ্ভুক্ত কৰা হৈছে। শুভমন গিলৰ উপৰিও ইংলেণ্ড টেষ্ট দলৰ অধিনায়ক বেন ষ্ট’কছ আৰু দক্ষিণ আফ্ৰিকাৰ ডেছিং অল ৰাউণ্ডাৰ উইয়ান মুল্ডাৰকো মনোনীত কৰা হৈছে।
শুভমন গিলৰ কথা ক’বলৈ গ’লে জুলাই মাহত ইংলেণ্ডৰ বিৰুদ্ধে তিনিখন টেষ্ট মেচত গড়ে ৯৪.৫০ ৰান কৰি ৫৬৭ ৰান সংগ্ৰহ কৰে। এডজবেষ্টনত ইংলেণ্ডৰ বিৰুদ্ধে খেলা দ্বিতীয়খন টেষ্ট মেচত প্ৰথম ইনিংছত ২৬৯ ৰান সংগ্ৰহ কৰাৰ বিপৰীতে দ্বিতীয় ইনিংছত ১৬১ ৰান সংগ্ৰহ কৰে।
কেৱল এয়াই নহয়, চতুৰ্থ টেষ্টত তেওঁ ১০৩ ৰান সংগ্ৰহ কৰে যাৰ বাবে ইংলেণ্ডৰ বিৰুদ্ধে টিম ইণ্ডিয়াই খেলখন ড্ৰ’ কৰে। এতিয়ালৈকে গিলে তিনিবাৰকৈ আইচিচিৰ মাহেকীয়া শ্ৰেষ্ঠ খেলুৱৈৰ বঁটা লাভ কৰিছে। ইয়াৰ পূৰ্বে ২০২৩ চনৰ জানুৱাৰী, ২০২৩ চনৰ ছেপ্টেম্বৰ আৰু ২০২৫ চনৰ ফেব্ৰুৱাৰী মাহত তেওঁ এই বঁটা লাভ কৰিছিল। এতিয়া তেওঁৰ চকু চতুৰ্থবাৰৰ বাবে এই বঁটা লাভ কৰাৰ ওপৰত থাকিব।
দক্ষিণ আফ্ৰিকাৰ উইয়ান মুল্ডাৰৰ কথা ক’বলৈ গ’লে জিম্বাবুৱেৰ বিৰুদ্ধে দুখন মেচৰ টেষ্ট শৃংখলাত বিস্ফোৰকভাৱে বেটিং কৰাৰ সময়ত তেওঁ গড়ে ২৬৫.৫০ ৰানত ৫৩১ ৰান সংগ্ৰহ কৰে। প্ৰথম টেষ্ট মেচৰ দ্বিতীয় ইনিংছত ১৪৭ ৰান সংগ্ৰহ কৰাৰ বিপৰীতে দ্বিতীয় টেষ্ট মেচত দক্ষিণ আফ্ৰিকাৰ দলৰ অধিনায়কত্বৰ সময়ত ৩৬৭ ৰানৰ অপৰাজিত ইনিংছ খেলিছিল।
দক্ষিণ আফ্ৰিকাৰ হৈ টেষ্ট ক্ৰিকেটত সৰ্বাধিক ব্যক্তিগত স্ক’ৰ কৰিছে মুল্ডাৰে। ইয়াৰ উপৰিও তেওঁ বলিংতো উৎকৃষ্ট প্ৰদৰ্শন দেখুৱাই ৭টা উইকেট দখল কৰে। প্ৰথমখন টেষ্ট মেচত তেওঁ চাৰিটা উইকেট লয়। অল-ৰাউণ্ডৰ উৎকৃষ্ট প্ৰদৰ্শনৰ বাবে মুল্ডাৰে প্লেয়াৰ অৱ দ্য ছিৰিজৰ বঁটাও লাভ কৰে।
বেন ষ্ট’কছকো মনোনীত কৰা হৈছিল
ইংলেণ্ড টেষ্ট দলৰ অধিনায়ক বেন ষ্ট’কছে ভাৰতৰ বিৰুদ্ধে টেষ্ট শৃংখলাত ভাল প্ৰদৰ্শন আগবঢ়ায়। জুলাই মাহত তেওঁ তিনিখন টেষ্ট মেচ খেলিছিল য’ত অভিজ্ঞ খেলুৱৈগৰাকীয়ে গড়ে ৫০.২০ত ২৫১ ৰান সংগ্ৰহ কৰিছিল আৰু গড়ে ২৬.৩৩ ৰানত ১২টা উইকেট দখল কৰিছিল। লৰ্ডছ আৰু মানচেষ্টাৰ টেষ্টতো প্লেয়াৰ অৱ দ্য মেচৰ বঁটা লাভ কৰে ষ্ট’কে।
