একেখন মেচতে দুটাকৈ অভিলেখ ৰোহিত শৰ্মাৰ, ৩০০ ছিক্সাৰ আৰু ৭০০০ ৰান সম্পূৰ্ণ আই পি এলত

ৰান সংগ্ৰহৰ তাৰণা কমি গৈছে নেকি ৰোহিত শৰ্মাৰ? টেষ্ট ক্ৰিকেটৰ পৰা অৱসৰৰ পাচত আলোচনা হৈছিল ৰোহিতৰ ফৰ্মক লৈ । প্ৰাক্তন ক্ৰিকেটাৰসকলৰ বহুতৰ মনতেই এনে ভাব হৈছিল । বিশ্ব ক্ৰিকেট তথা আইপিএলত ৰোহিত শৰ্মাই যি খ্যাতি অৰ্জন কৰিছে, তাৰ পাছত তেওঁৰ আৰু কি প্ৰত্যাশা থাকিব পাৰে? হ’লেও বিষয়টো কিন্তু উলাই কৰিব নোৱাৰি ।

অষ্ট্ৰেলিয়াত অনুষ্ঠিত বৰ্ডাৰ-গাভাস্কাৰ ট্ৰফীৰ অন্তিমখন মেচত যেতিয়া তেওঁ নিজেই থিয় দিছিল, তেতিয়া এনে লাগিছিল যেন তেওঁ টেষ্টৰ পৰা অৱসৰ ল’ব । কিন্তু তাৰ পিছত তেওঁ স্পষ্ট কৰি দিলে যে তেওঁ টেষ্ট ক্ৰিকেটৰ পৰা নহয়, এখন মেচৰ পৰাহে অব্যাহতি লৈছিল । কেৱল সেয়াই নহয় ঘৰলৈ উভতি আহি ৰঞ্জী ট্ৰফীও খেলিছিল । লক্ষ্য আছিল ইংলেণ্ডৰ খেলপথাৰত নতুন আৰম্ভণি । ইয়াৰ মাজতে তেওঁ আই চি চি চেম্পিয়নছ ট্ৰফীও জয় কৰে । তথাপিও তেওঁ টেষ্টৰ পৰা অৱসৰ ল’লে । প্ৰশ্ন কৰাটো স্বাভাৱিক । আই পি এললৈ উভতি যাওঁ আহক ।

ইণ্ডিয়ান প্ৰিমিয়াৰ লীগত ৰোহিত শৰ্মাৰ আছে বহু অভিলেখ । মুঠতে তেওঁ আই পি এলত প্ৰায় আধা ডজন ট্ৰফী লাভ কৰিছে । অধিনায়ক হিচাপে তেওঁ মুম্বাই ইণ্ডিয়ানছৰ হৈ ৫টা ট্ৰফী লাভ কৰিছে । কাগজে-কলমে তেওঁ এতিয়া মুম্বাই ইণ্ডিয়ানছৰ অধিনায়ক নহয় । কোৱা বাহুল্য যে তেওঁ এজন নেতা । এটা বা আনটো অভিলেখত অহৰহ সংযোজন হৈ আছে ৰোহিতৰ নাম । আই পি এলৰ মঞ্চত গুজৰাট টাইটানছৰ বিৰুদ্ধে দ্বৈত কৃতিত্ব অৰ্জন ৰোহিত শৰ্মাৰ । এটা ক্ষেত্ৰত বিৰাট কোহলি তেওঁৰ আগত, আন এক ক্ষেত্ৰত তেওঁ বিৰাটতকৈ আগত ।

আই পি এলৰ ইতিহাসত ৭ হাজাৰ ৰানৰ মাইলৰ খুঁটি অতিক্ৰম কৰা দ্বিতীয়জন বেটছমেন হিচাপে পৰিগণিত হৈছে ৰোহিত শৰ্মা । তেওঁৰ আগত আছে বিৰাট কোহলি । আই পি এলত সৰ্বাধিক ৰান সংগ্ৰহৰ অভিলেখ বিৰাট কোহলিৰ । ৮৫০০ৰো অধিক ৰান । ইয়াতো ৰো-কো যুটিৰ প্ৰভাৱ আছে । টাইটানছৰ বিৰুদ্ধে আন এক কৃতিত্বও অৰ্জন কৰিছে হিটমেনে । ছিক্সাৰ কোবোৱাৰ অভিলেখ। যিসকলে ৰোহিতৰ ৰানৰ ক্ষুধা কমিছে বুলি ভাবে, তেওঁলোকৰ বাবে টাইটানছৰ বিৰুদ্ধে বিধ্বংসী ইনিংছ যেন এক বাৰ্তা ।

আই পি এলৰ ইতিহাসত তিনিশ বা তাতকৈ অধিক ছিক্সাৰ কোবোৱাৰ একমাত্ৰ অভিলেখ আছিল ক্ৰীছ গেইলৰ হাতত । কেৰিবিয়ানৰ কিংবদন্তিগৰাকীয়ে ৩৫৭টা ছয় কোবাইছে । ৰোহিত শৰ্মা হৈছে বিশ্বৰ দ্বিতীয় আৰু প্ৰথমজন ভাৰতীয় বেটছমেন যিয়ে ৩০০ ছিক্সাৰ কোবাইছে আইপিএলত । গুজৰাটৰ বিৰুদ্ধে খেলখনৰ পূৰ্বে আই পি এলত ৰোহিতৰ ছিক্সাৰৰ সংখ্যা আছিল ২৯৮ টা । অৰ্ধশতক অৰ্জনৰ পথত দুটা ছিক্সাৰ কোবাই ৩০০ টা ছয়ৰ অভিলেখ গঢ়িলে হিটমেনে । ৮১ ৰানৰ ইনিংছটোত ৪টা ছয় কোবায় ৰোহিতে ।

আই পি এলত ছিক্সাৰ কোবোৱাৰ ক্ষেত্ৰত ৰোহিত শৰ্মাৰ অংশীদাৰ হৈছে বিৰাট কোহলি । ৰোহিতৰ পিছতে আছে কিং কোহলি আছে । বিৰাটে ২৯১টা ছয় কোবাইছে । এতিয়াও আহি আছে আই পি এলৰ ফাইনেল । গতিকে সেই দূৰত্ব কিছু কম হোৱাৰ সুযোগ আছে । সক্ৰিয় ক্ৰিকেটাৰসকলৰ ভিতৰত ছিক্সাৰ কোবোৱাৰ ক্ষেত্ৰত ৰোহিতৰ পিচতেই আছে ঘনিষ্ঠ বিৰাট কোহলি ।