Krishna Janmashtami 2025: ভগৱান শ্ৰীকৃষ্ণৰ জন্ম কেনেকৈ হৈছিল? জন্মাষ্টমী কেতিয়া আৰু ইয়াৰ তাৎপৰ্য কি জানক
কাইলৈ শ্ৰীকৃষ্ণৰ জন্মাষ্টমী। বৃন্দাবনৰ লগতে দেশৰ ভিন্ন প্ৰান্তত বিভিন্ন কাৰ্যসূচীৰে পালন কৰা হয়। এই শুভ অনুষ্ঠানটো ভগৱান শ্ৰীকৃষ্ণৰ জন্মবাৰ্ষিকী হিচাপে পালন কৰা হয়। অৱশ্যে অসমীয়া কেলেণ্ডাৰ অনুসৰি কাইলৈ অসমত পালন নকৰে জন্মাষ্টমী।
অসমীয়া পঞ্জিকা আৰু কেলেণ্ডাৰ অনুসৰি, ভাদ মাহৰ কৃষ্ণপক্ষৰ অষ্টমী তিথিহে জন্মাষ্টমী পালন কৰাৰ নিয়ম আছে। শাওণ মাহত অসমত জন্মাষ্টমী পালন নকৰে। দেশৰ ভিন্ন প্ৰান্তৰ জন্মাষ্টমীৰ লগত অসমত পালন কৰাৰ নিয়ম আৰু তাৰিখৰ কিছু অমিল আছে।
পঞ্চাঙৰ তথ্য অনুসৰি ভদ্ৰপদ মাহৰ কৃষ্ণ পক্ষৰ অষ্টমী তিথি অহা ১৫ আগষ্টৰ নিশা ১১:৪৯ বজাৰ পৰা আৰম্ভ হ’ব। আনহাতে, এই তিথি ১৬ আগষ্টৰ নিশা ৯:৩৪ বজাত শেষ হ’ব। এনে ক্ষেত্ৰত যদি উদয় তিথিৰ আধাৰত দেখা যায় তেন্তে জন্মাষ্টমী ১৬ আগষ্ট। জন্মাষ্টমীৰ পূজাৰ শুভ সময় ১৬ আগষ্টৰ পুৱা ১২:০৪ বজাৰ পৰা আৰম্ভ হ’ব আৰু পুৱা ১২:৪৭ বজালৈকে চলিব। এনে ক্ষেত্ৰত পূজাৰ বাবে মুঠ ৪৩ মিনিট সময় পাব।
পৌৰাণিক বিশ্বাস অনুসৰি, ৰোহিনী নক্ষত্ৰত অষ্টমী তিথিৰ দিনা মাজনিশা ভগৱান শ্ৰীকৃষ্ণৰ জন্ম হৈছিল। সেইবাবেই মাজনিশা অষ্টমী তিথি পৰে সেইদিনা উপবাস পালন আৰু জন্মাষ্টমী পূজা কৰাটো শুভ। অৱশ্যে আপোনাৰ পৰম্পৰা আৰু বিশ্বাস অনুসৰি ১৫ বা ১৬ আগষ্টত জন্মাষ্টমী পালন কৰিব পাৰি।
অৱশ্যে ১৬ আগষ্টত অসমত জন্মাষ্টমী পালন কৰা নহয়। কালচক্ৰ পুৰ্ণাংগ পঞ্জিকা অনুসৰি অসমত ২৮ ভাদত পালন কৰা হ’ব শ্ৰীকৃষ্ণৰ জন্মাষ্টমী। ইংৰাজীৰ তাৰিখ অনুসৰি ১৪ ছেপ্তেম্বৰ, এই দিনটোত ৰাজ্য চৰকাৰেও চৰকাৰী বন্ধ ঘোষণা কৰিছে। ১৬ আগষ্ট শনিবাৰে বৃন্দাবনকে ধৰি ব্ৰজধামত কৃষ্ণ জন্মাষ্টমী উৎসৱ অতি আনন্দৰে পালন কৰা হ’ব।
মহত্ব
পৌৰাণিক বিশ্বাস অনুসৰি ভগৱান শ্ৰীকৃষ্ণৰ জন্মৰ সময়ত বাসুদেৱে তেওঁক নিজৰ মামাক কংসৰ পৰা বচাবলৈ যমুনা নদীৰ সিপাৰে গোকুলৰ নন্দ বাবা আৰু যশোদাৰ ওচৰত থৈ আহিছিল। সমগ্ৰ দেশতে অতি আড়ম্বৰেৰে পালন কৰা হিন্দু ধৰ্মৰ অন্যতম প্ৰধান উৎসৱ কৃষ্ণ জন্মাষ্টমী।
শ্ৰীকৃষ্ণ ত্ৰিদেৱৰ ভিতৰত অন্যতম ভগৱান বিষ্ণুৰ অৱতাৰ। কৃষ্ণৰ আশীৰ্বাদ আৰু কৃপা পাবলৈ মানুহে প্ৰতি বছৰে এই দিনটোত উপবাস পালন কৰি মাজনিশা পূৰ্ণ ৰীতি-নীতিৰে প্ৰাৰ্থনা কৰে। এই দিনটোত ভজন আৰু কীৰ্তন কৰা হয় আৰু জন্ম বাৰ্ষিকী পালন কৰে। এই দিনটোৰ বাবে মন্দিৰসমূহ বিশেষভাৱে সজাই তোলা হয়। কোনো কোনো ঠাইত জন্মাষ্টমীৰ দিনাও দহি-হান্দি পালন কৰা হয়।
কৃষ্ণৰ জন্মৰ কাহিনী
শাস্ত্ৰীয় বিবৰণ আৰু জ্যোতিষ গণনাৰ ভিত্তিত লোকবিশ্বাস অনুযায়ী কৃষ্ণৰ জন্ম হৈছিল ৩২২৮ খ্ৰীষ্টপূৰ্বাব্দৰ ১৮ অথবা ২১ জুলাইত। কৃষ্ণৰ জন্মদিনটোক কৃষ্ণ জন্মাষ্টমী বা জন্মাষ্টমী নামেৰে পালন কৰা হয়।কৃষ্ণ যাদৱ-ৰাজধানী মথুৰাৰ ৰাজপৰিয়ালৰ সন্তান। তেওঁ বসুদেব আৰু দৈৱকীৰ অষ্টম পুত্ৰ। তেওঁৰ পিতামাতা উভয়ৰে যাদৱবংশীয়। দৈৱকীৰ ককায়েক কংসই তেওঁলোকৰ পিতা উগ্ৰসেনক বন্দী কৰি সিংহাসনত আৰোহণ কৰে। এক দৈৱবাণীৰ মাধ্যমেৰে তেওঁ জানিব পাৰে যে দৈৱকীৰ গৰ্ভৰ অষ্টম সন্তানৰ হাতত তেওঁৰ মৃত্যু হ’ব। এই কথা শুনি তেওঁ দৈৱকী আৰু বসুদেবক কাৰাৰুদ্ধ কৰে আৰু তেওঁলোকৰ প্ৰথম ছয় পুত্ৰক হত্যা কৰে। দৈৱকীয়ে তেওঁৰ সপ্তম গৰ্ভ ৰোহিণীক প্ৰদান কৰাত, বলৰামৰ জন্ম হয়। ইয়াৰ পাছত কৃষ্ণই জন্মগ্ৰহণ কৰে।
কৃষ্ণৰ জীৱন বিপন্ন বুলি জানি জন্মৰ নিশাতেই দৈৱৰ সহায়ত কাৰাগাৰৰ পৰা মুক্ত হৈ বসুদেবে তেওঁক গকুলত তেওঁৰ পালক মাতাপিতা যশোদা আৰু নন্দৰ কাষত থৈ আহে। কৃষ্ণৰ উপৰি বসুদেবৰ আৰু দুই সন্তানৰ প্ৰাণৰক্ষা হৈছিল। প্ৰথমজন বলৰাম (যি বসুদেবৰ প্ৰথমা স্ত্ৰী ৰোহিণীৰ গৰ্ভত জন্মগ্ৰহণ কৰে) আৰু সুভদ্ৰা (বসুদেব আৰু ৰোহিণীৰ কন্যা, যি বলৰাম আৰু কৃষ্ণৰ জন্মৰ অনেক পাছত জন্মগ্ৰহণ কৰে)। ভাগৱত পুৰাণ অনুযায়ী, কোনো প্ৰকাৰ যৌনসংগম ব্যতিৰেকেই কেবলমাত্ৰ “মানসিক যোগৰ” ফলত কৃষ্ণৰ জন্ম হৈছিল। হিন্দুসকলে বিশ্বাস কৰে, সেইযুগত এই ধৰণৰ যোগ সম্ভব আছিল।
লগতে পঢ়ক- অসমত কেতিয়া শ্ৰীকৃষ্ণৰ জন্মাষ্টমী পালন কৰিব?
