ছালত কিয় বগা দাগ পৰে? এয়া সাধাৰণ নে দুৰাৰোগ্য ৰোগৰ লক্ষণ, চিকিৎসা পদ্ধতি জানক…
যদি আপোনাৰ বা আপোনাৰ ওচৰৰ কাৰোবাৰ শৰীৰত বগা দাগ আছে , তেন্তে আতংকিত নহ’ব। এই ৰোগ স্পৰ্শ কৰি বিয়পি নাযায়। কিন্তু সময়মতে পৰীক্ষা কৰাটো প্ৰয়োজনীয়। শৰীৰত বগা দাগ কিয় দেখা দিয়ে জানেনে?
যদি হঠাতে মুখমণ্ডল বা শৰীৰৰ যিকোনো অংশত বগা দাগ ওলায়, তেন্তে চিন্তা হোৱাটো স্বাভাৱিক। বহুতে ইয়াক গুৰুতৰ ৰোগ বুলি গণ্য কৰে। বহু সময়ত ইয়াৰ বাবে সমাজত ভুল ধাৰণা গঢ় লৈ উঠে আৰু মানুহে ইয়াৰ পৰা দূৰত্ব বজাই ৰাখিবলৈ আৰম্ভ কৰে। কিন্তু বগা দাগ সঁচাকৈয়ে এটা ডাঙৰ ৰোগ নেকি? স্পৰ্শ কৰিলে এই ৰোগ বিয়পে নেকি? নে ই কেৱল ছালৰ সাধাৰণ সমস্যা?
বগা দাগবোৰক চিকিৎসা ভাষাত ভিটিলিগো বা হাইপ’পিগমেণ্টেচন বুলিও কোৱা হয়। আমাৰ ছালত ৰং দিয়া মেলানিন ৰঞ্জক পদাৰ্থ গঠন বন্ধ হৈ গ’লে এনে হয়। মেলানিনে আমাৰ ছালখনক ৰং প্ৰদান কৰে। যেতিয়া এই কোষবোৰ মৰিবলৈ আৰম্ভ কৰে বা শৰীৰৰ কোনো অংশত সক্ৰিয় নহয়, তেতিয়া তাত বগা দাগ ওলাবলৈ আৰম্ভ কৰে।
ভিটিলিগো সংক্ৰামক নহয় – আৰম্ভণিতে এই দাগবোৰ সৰু আৰু এটা ঠাইত দেখা যায়। কিন্তু সময়মতে গুৰুত্ব নিদিলে তেতিয়া গোটেই শৰীৰত বিয়পিব পাৰে। এই ক্ষেত্ৰত জ্বলা-পোৰাৰ সমস্যা নাথাকে, কষ্টোও নাপায়। মাত্ৰ ৰঙটোহে পাতল হৈ পৰে। কিন্তু এই বস্তুটোৱে মানুহক ভয় খুৱাবলৈ আৰম্ভ কৰে যে এইটো এটা দুৰাৰোগ্য ৰোগ নেকি? বহুতে ইয়াক কুষ্ঠ বা আন কোনো সংক্ৰামক ৰোগ বুলি গণ্য কৰাৰ ভুল কৰে। কিন্তু সেয়া একেবাৰেই শুদ্ধ নহয়। বগা দাগ কোনো সংক্ৰামক ৰোগ নহয় আৰু আন কাৰোবাক স্পৰ্শ কৰিলেও বিয়পি নাযায়।
ভিটিলিগো কিয় হয়?
ইয়াৰ কোনো এটা বিশেষ কাৰণ নাই। কিছুমান ক্ষেত্ৰত ই জিনীয়, অৰ্থাৎ পৰিয়ালৰ কোনোবা এজনৰ যদি এই সমস্যা হয়, তেন্তে পৰৱৰ্তী প্ৰজন্মতো ইয়াৰ আশংকা বৃদ্ধি পায়। ইয়াৰ উপৰিও ইমিউন চিষ্টেম ডিছঅৰ্ডাৰ, অত্যধিক চিন্তা, ছালত সঘনাই আঘাত পোৱা, ৰাসায়নিক পদাৰ্থ বা থাইৰয়ডৰ প্ৰতি ছালৰ প্ৰতিক্ৰিয়া আদি সমস্যাও ইয়াৰ কাৰণ হ’ব পাৰে।
কেতিয়াবা শৰীৰৰ ভিতৰত চলি থকা যিকোনো অটোইম্যুন ৰোগৰ লক্ষণ। অৰ্থাৎ শৰীৰৰ প্ৰতিৰক্ষা ব্যৱস্থাই ভুলতে ছালৰ ক্ষতি কৰিবলৈ আৰম্ভ কৰে। এই কাৰণেই ইয়াক কেৱল বাহ্যিক ছালৰ সমস্যা বুলি গণ্য কৰাটো সঠিক নহয়।
ভিটিলিগোৰ নিৰাময় আছেনে?
যদি প্ৰাৰম্ভিক পৰ্যায়ত চিনাক্ত হয়, তেন্তে ঔষধ আৰু কিছুমান স্থানীয় ক্ৰীমৰ দ্বাৰা চিকিৎসা কৰা সম্ভৱ। ষ্টেৰইড ক্ৰীম, ফটোথেৰাপি বা ছালৰ গ্ৰাফ্টিঙৰ দৰে কৌশলেৰে চিকিৎসকে বগা দাগ বহু পৰিমাণে নিয়ন্ত্ৰণ কৰিব পাৰে।
খাদ্যাভ্যাসৰ পৰিৱৰ্তন কৰক
কেতিয়াবা ভিটামিন বি ১২ আৰু ফলিক এচিডৰ অভাৱৰ বাবেও এনেকুৱা হয়। সেইবাবেই চিকিৎসকৰ পৰামৰ্শ মতে এনেবোৰ বস্তু খাদ্যত অন্তৰ্ভুক্ত কৰক যিবোৰত ভিটামিন বি১২ বা ফলিক এচিড প্ৰচুৰ পৰিমাণে থাকে। যদি হঠাতে ছালত বগা দাগ ওলাবলৈ আৰম্ভ কৰে তেন্তে আতংকিত নহ’ব। পলম নকৰাকৈ ছালৰ বিশেষজ্ঞক লগ কৰক। ঘৰুৱা ঔষধৰ ফান্দত নাপৰিব কাৰণ ইয়াৰ ফলত অৱস্থা আৰু বেয়া হ’ব পাৰে।
লগতে পঢ়ক: ভাগৰ, খং, অনিদ্ৰা…এয়া অকালতে মগজু বুঢ়া হোৱাৰ লক্ষণ নেকি? জানক…
