প্ৰস্ৰাৱৰ দুৰ্গন্ধ, তেজ, ফেন… এয়া কি ৰোগৰ লক্ষণ? জানক

বৃক্কই প্ৰস্ৰাৱৰ জৰিয়তে আমাৰ শৰীৰৰ পৰা আৱৰ্জনা বাহিৰ কৰে। কিন্তু প্ৰস্ৰাৱ আমাৰ স্বাস্থ্যৰ দাপোন স্বৰূপ। প্ৰস্ৰাৱৰ ৰং, গোন্ধ আৰু পৰিমাণে আমাক বহুতো আভ্যন্তৰীণ স্বাস্থ্যজনিত সমস্যাৰ বিষয়ে সতৰ্ক কৰি দিব পাৰে। এই পৰিৱৰ্তনসমূহৰ প্ৰতি মনোযোগ দিলে আপুনি বহুতো স্বাস্থ্যজনিত সমস্যা আগতীয়াকৈ ধৰা পেলাব পাৰে।

প্ৰস্ৰাৱৰ পৰিৱৰ্তনে কি ইংগিত দিব পাৰে সেই বিষয়ে কৈছে পুষ্টিবিদ লিমা মহাজনে। প্ৰস্ৰাৱৰ জৰিয়তে কোনবোৰ সমস্যা সহজে ধৰা পেলাব পাৰি জানো আহক।

সঘনাই প্ৰস্ৰাৱ কৰা?

যদি প্ৰস্ৰাৱ কৰিবলৈ সঘনাই উঠিবলগীয়া হয় তেন্তে ইয়াক সহজভাৱে ল’ব নালাগে। এইটো ডায়েবেটিছৰ এটা মূল লক্ষণ হ’ব পাৰে, কিয়নো শৰীৰে অতিৰিক্ত চুগাৰ উলিয়াই দিবলৈ অধিক প্ৰস্ৰাৱ উৎপন্ন কৰে। তদুপৰি প্ৰস্ৰাৱৰ সংক্ৰমণ, প্ৰষ্টেট বৃদ্ধি, অতি সক্ৰিয় মূত্ৰাশয় আদি সমস্যাইও সঘনাই প্ৰস্ৰাৱ কৰাৰ কাৰণ হ’ব পাৰে।

প্ৰস্ৰাৱৰ ৰঙে কি সূচায়?

গাঢ় হালধীয়া ৰঙৰ প্ৰস্ৰাৱ – ই প্ৰায়ে  ডিহাইড্ৰেচন হোৱাৰ লক্ষণ। শৰীৰত তৰল পদাৰ্থৰ অভাৱ হ’লে প্ৰস্ৰাৱ ক’লা হৈ পৰে আৰু গাঢ় হালধীয়া হয়। কিন্তু প্ৰচুৰ পৰিমাণে পানী খোৱাৰ পিছতো যদি এই অৱস্থা থাকে তেন্তে ই যকৃতৰ ৰোগ বা জণ্ডিচৰ লক্ষণ হ’ব পাৰে।

পৰিষ্কাৰ প্ৰস্ৰাৱ – সাধাৰণতে আপুনি অধিক পানী খোৱাৰ লক্ষণ। কিন্তু কিছুমান ক্ষেত্ৰত ই বৃক্কৰ ক্ষতিৰ লক্ষণো হ’ব পাৰে, য’ত বৃক্কই প্ৰস্ৰাৱ সঠিকভাৱে কেন্দ্ৰীভূত কৰিব নোৱাৰে।

ডাৱৰীয়া প্ৰস্ৰাৱ – ডাৱৰীয়া ৰঙৰ প্ৰস্ৰাৱে সংক্ৰমণ বা অন্য সমস্যাৰ ইংগিত দিব পাৰে। প্ৰস্ৰাৱ নলীৰ সংক্ৰমণ, বৃক্কত পাথৰ, পানীলগা, বা ইউৰিক এচিডৰ মাত্ৰা অধিক হোৱাৰ ফলত ইয়াৰ সৃষ্টি হ’ব পাৰে।

জ্বলা আৰু দুৰ্গন্ধ

প্ৰস্ৰাৱ জ্বলা – প্ৰস্ৰাৱ কৰাৰ সময়ত জ্বলা বা বিষ হোৱাটো প্ৰস্ৰাৱৰ সংক্ৰমণৰ আটাইতকৈ সাধাৰণ লক্ষণ। বৃক্কৰ পাথৰ, পৰিষ্কাৰ-পৰিচ্ছন্নতাৰ অভাৱ, বা এছ টি ডি আদিও ইয়াৰ কাৰণ হ’ব পাৰে।

দুৰ্গন্ধযুক্ত প্ৰস্ৰাৱ – সাধাৰণ প্ৰস্ৰাৱত মৃদু গোন্ধ থাকে, কিন্তু প্ৰবল বা অস্বাভাৱিক গোন্ধ এটা চিন্তাৰ কাৰণ। ইয়াৰ দ্বাৰা ইউটিআই, মূত্ৰাশয়ৰ সংক্ৰমণ, ডিহাইড্ৰেচন, আনকি যকৃতৰ বিকলতাৰ দৰে গুৰুতৰ অৱস্থাৰ ইংগিত পোৱা যাব পাৰে।

প্ৰস্ৰাৱত ফেন বা তেজ থকাটোৱে কি সূচায়?

ফেনযুক্ত প্ৰস্ৰাৱ – ফেনযুক্ত প্ৰস্ৰাৱে প্ৰটিন ইউৰিয়াৰ ইংগিত দিব পাৰে। বৃক্কৰ ৰোগ, উচ্চ ৰক্তচাপ, বা মধুমেহ ৰোগৰ গুৰুতৰ লক্ষণ। কিন্তু উচ্চ প্ৰটিনযুক্ত খাদ্য বা ডিহাইড্ৰেচনৰ বাবেও এনে হ’ব পাৰে।

প্ৰস্ৰাৱত তেজ – এইটো এটা অতি গুৰুতৰ লক্ষণ যিটো কেতিয়াও আওকাণ কৰা উচিত নহয়। প্ৰস্ৰাৱত তেজ থকাটো বৃক্কৰ ক্ষতি, ইউটিআই, বৃক্কত পাথৰ হোৱা বা বৃক্ক, মূত্ৰাশয়, প্ৰষ্টেট কেন্সাৰৰ দৰে জীৱন সংকটজনক ৰোগৰ লক্ষণ হ’ব পাৰে। গতিকে, কেতিয়াও আওকাণ নকৰিব।

প্ৰস্ৰাৱৰ মিঠা দুৰ্গন্ধ

যদি প্ৰস্ৰাৱৰ গোন্ধ মিঠা বা ফলৰ দৰে হয় তেন্তে ই ডায়েবেটিছৰ সতৰ্কবাণী হ’ব পাৰে। শৰীৰত শক্তিৰ বাবে গ্লুক’জৰ সলনি চৰ্বি ব্যৱহাৰ কৰা বাবে শৰীৰত কিট’ন গঠন হ’বলৈ আৰম্ভ কৰিলে এনে হয়।

লগতে পঢ়ক: ডায়েবেটিছ নিয়ন্ত্ৰণৰ বাবে উপকাৰী এই ৪ বিধ পানীয়, জানক…