সকলো সময়তে হাত-ভৰি ঠাণ্ডা হৈ থাকে নেকি? ই কি ৰোগৰ লক্ষণ, জানক বিশেষজ্ঞৰ পৰা…

বহু মানুহৰে হাত-ভৰি সাধাৰণতকৈ ঠাণ্ডা হৈ থকা দেখা যায়। বহুতে অভিযোগ কৰে যে তেওঁলোকৰ হাত-ভৰি সকলো সময়তে ঠাণ্ডা হৈ থাকে। ঠাণ্ডা বতৰ হওক বা গৰম, সকলো সময়তে হাতৰ তলুৱা, ভৰিৰ আঙুলি, ভৰিৰ পতা আদি ঠাণ্ডা অনুভৱ কৰে। বহুতে ভাবে এয়া সাধাৰণ, গতিকে তেওঁলোকে এইবোৰ আওকান কৰি চলে। কিন্তু যদি দীৰ্ঘদিন ধৰি এনে সমস্যা হৈ থাকে তেন্তে ই শৰীৰৰ কিছুমান সমস্যাৰ লক্ষণ হ’ব পাৰে।

হাত-ভৰি ঠাণ্ডা হোৱাৰ আটাইতকৈ ডাঙৰ কাৰণ হ’ল ৰক্ত সঞ্চালন বেয়া হোৱা। যেতিয়া হৃদযন্ত্ৰৰ পৰা তেজ সঠিকভাৱে অংগসমূহলৈ প্ৰৱাহিত হ’ব নোৱাৰে তেতিয়া হাত-ভৰিৰ উষ্ণতা কমি যায়। যাৰ বাবে হাত-ভৰি ঠাণ্ডা হৈ পৰে। অৱশ্যে কেতিয়াবা ই স্বাভাৱিক হ’ব পাৰে। যেনে- বেছি ঠাণ্ডা, বহু সময় বহি বা শুই থকা আদি। কিন্তু বাৰে বাৰে হৈ থাকিলে ই সমস্যাৰ কাৰণ হ’ব পাৰে।

কিহৰ লক্ষণ হব পাৰে?

ৰক্তহীনতা (তেজৰ অভাৱ)– যেতিয়া শৰীৰত হিম’গ্লবিন কম হয় তেতিয়া ৰক্তহীনতা বা এনিমিয়া হয়। এই অৱস্থাত শৰীৰে অক্সিজেন সঠিকভাৱে লাভ নকৰে। যাৰ বাবে হাত-ভৰি ঠাণ্ডা হৈ থাকে।

থাইৰয়ডৰ সমস্যা-  থাইৰয়ড দুই প্ৰকাৰৰ। হাইপোথাইৰয়ডিজম (থাইৰয়ডৰ কাৰ্যক্ষমতা কম) হ’লে শৰীৰৰ বিপাকীয় ক্ৰিয়া লেহেমীয়া হয়। তেনে অৱস্থাত ৰোগীৰ হাত-ভৰি ঠাণ্ডা হৈ পৰে।

ডায়েবেটিছ- আজিৰ সময়ত ডায়েবেটিছ এক গুৰুত্বৰ ৰোগ। প্ৰায়ভাগ মানুহে এই সমস্যাত ভোগা দেখা যায়। ডায়েবেটিছত স্নায়ুৰ ক্ষতি হ’ব পাৰে। এনে অৱস্থাত হাত-ভৰিত তেজৰ সোঁতত প্ৰভাৱ পৰে। এনে ক্ষেত্ৰত হাত-ভৰি ঠাণ্ডা হৈ পৰে।

নিম্ন ৰক্তচাপ বা হৃদযন্ত্ৰৰ সমস্যা- যদি হৃদযন্ত্ৰই সঠিকভাৱে  কাম নকৰে বা নিম্ন ৰক্তচাপ হয় তেতিয়া হাত-ভৰি ঠাণ্ডা হোৱাৰ সমস্যা হ’ব পাৰে।

ৰেন’ড ৰোগ– এই ৰোগত ঠাণ্ডা বা মানসিক চাপৰ ফলত হাত-ভৰিৰ আঙুলিৰ ৰক্তবাহী নলী সংকুচিত হয়। যাৰ বাবে আঙুলিবোৰ প্ৰথমে বগা, পাছত নীলা আৰু পাছত ৰঙা হৈ পৰে।

আন কাৰণ-ইয়াৰোপৰি খাদ্যৰ অভাৱ, ধূমপান, মানসিক চাপ, চৰ্দি আদিৰ বাবেও এই সমস্যা হোৱাৰ সম্ভাৱনা থাকে।

বিশেষজ্ঞৰ পৰামৰ্শ কেতিয়া ল’ব

যেতিয়া হাত-ভৰি ঠাণ্ডা হোৱাৰ লগতে সঘনাই অজ্ঞান বা টিংটিং, ছালৰ ৰং সলনি হোৱা (বগা/নীলা/ৰঙা), ঘা বা কাটি যোৱা অংশ সোনকালে ভাল নোহোৱা, দুৰ্বলতা,  ভাগৰুৱা, মূৰ ঘূৰোৱা, ওজন কমি যোৱা আদি সমস্যাই দেখা দিয়ে তেতিয়া বিশেষজ্ঞৰ পৰামৰ্শ লোৱা প্ৰয়োজন।

পৰিত্ৰাণৰ উপায়

• গৰম কাপোৰ পৰিধান কৰিব লাগে।
• ব্যায়াম কৰক।
• ধূমপান, মদৰ পৰা আঁতৰি থাকক।
• ভাল খাদ্য গ্ৰহণ কৰক।
• আইৰণ, ভিটামিন বি ১২ আৰু ফলিক এচিড আদি অন্তৰ্ভুক্ত কৰক।
• সমস্যা দীৰ্ঘদিন থাকিলে স্বাস্থ্য পৰীক্ষা কৰক।

অন্য খবৰ পঢ়কঃ Urine infection cause: মহিলাসকলৰ এই ৫টা অভ্যাস হ’ব পাৰে প্ৰস্ৰাৱ সংক্ৰমণৰ মূল কাৰণ! জানক সকলো…