ফেটি লিভাৰ যকৃতৰ কৰ্কট ৰোগৰ কাৰণ হ’ব পাৰে নেকি? কেনেকৈ প্ৰতিৰোধ কৰিব জানক…

যকৃতৰ সমস্যাৰ ক্ষেত্ৰত বয়সৰ কোনো সীমা নাই। অস্বাস্থ্যকৰ খাদ্যাভ্যাস থাকিলে যিকোনো বয়সতে এই সমস্যা হ’ব পাৰে। এই ক্ষেত্ৰত আটাইতকৈ সাধাৰণ সমস্যা হ’ল ফেটি লিভাৰ। প্ৰতিদিনে অত্যধিক তেলীয়া-মছলাযুক্ত খাদ্য, মদ্যপানৰ অভ্যাসৰ ফলত ফেটি লিভাৰ হোৱাৰ সম্ভাৱনা বৃদ্ধি পায়।

আৰম্ভণিতে ইয়াৰ ফলত কোনো ডাঙৰ সমস্যাৰ সৃষ্টি নহ’লেও ফেটি লিভাৰে সময়ৰ লগে লগে বিপদজনক ৰূপ ল’ব পাৰে। উদাহৰণস্বৰূপে, লিভাৰ চিৰ’ছিছ বা যকৃতৰ কৰ্কট ৰোগৰ দৰে জটিলতাও হ’ব পাৰে। যিটো অতি গুৰুতৰ হৈ পৰিলে মৃত্যুৰ কাৰণ পৰ্যন্ত হ’ব পাৰে।

চিকিৎসকে কয় যে যকৃতত অতিৰিক্ত চৰ্বি জমা হ’লে ফেটি লিভাৰৰ সমস্যা হয়। ফেটি লিভাৰ সাধাৰণতে ২ প্ৰকাৰৰ— এলক’হলিক আৰু নন-এলক’হলিক ফেটি লিভাৰ ডিজিচ (NAFLD)। আজিকালি অনিয়ন্ত্ৰিত জীৱনশৈলী আৰু খাদ্যাভ্যাসৰ বেয়াৰ বাবে NAFLD অধিক সাধাৰণ হৈ পৰিছে।

ইয়াৰ মূল কাৰণ হ’ল মেদবহুলতা, ডায়েবেটিছ, উচ্চ কলেষ্টেৰল, বহি থকা জীৱনশৈলী, তেলীয়া আৰু চেনিযুক্ত খাদ্য খোৱা, আনকি কিছুমান ক্ষেত্ৰতো ঔষধৰ পাৰ্শ্বক্ৰিয়া। সাধাৰণতে ইয়াৰ লক্ষণসমূহ হ’ল—অত্যধিক ক্লান্তি, সোঁ পেটৰ ওপৰৰ অংশত মৃদু বিষ বা গধুৰতা, ভোক কমি যোৱা, ওজন কমি যোৱা। এই ৰোগৰ জটিলতা বাঢ়িলে যকৃতৰ প্ৰদাহ (steatohepatitis), ফাইব্ৰ’ছিছ, চিৰ’ছিছ (যকৃতৰ গুৰুতৰ ক্ষতি), আনকি যকৃতৰ বিকলতা বা কেন্সাৰ আদিও হ’ব পাৰে।

লিভাৰ কেন্সাৰ কিয় হয়?

যকৃতৰ কোষবোৰ অস্বাভাৱিকভাৱে বৃদ্ধি পালে যকৃতৰ কৰ্কট ৰোগ হয়। আটাইতকৈ সাধাৰণ প্ৰকাৰ হ’ল হেপাটোচেলুলাৰ কাৰ্চিনোমা। কৰ্কট ৰোগ যকৃতৰ পৰা আৰম্ভ হৈ আন অংগৰ পৰা বিয়পিব পাৰে। ইয়াৰ আঁৰৰ মূল কাৰণসমূহ হ’ল— দীৰ্ঘদিনীয়া হেপাটাইটিছ বি বা চি সংক্ৰমণ, চিৰ’ছিছ, ফেটি লিভাৰৰ  চিকিৎসা নকৰা, অত্যধিক মদ্যপান, দীৰ্ঘদিনীয়া যকৃতৰ ক্ষতি আৰু এফ্লাটক্সিনৰ দৰে বিষাক্ত পদাৰ্থৰ সংস্পৰ্শ। লক্ষণসমূহ হ’ল—সোঁ পেটৰ ওপৰৰ অংশত বিষ হোৱা, ওজন কমি যোৱা, পেট ফুলা, চকু আৰু ছাল হালধীয়া হোৱা (জণ্ডিচ), ভোক কমি যোৱা, কম খাদ্য খোৱাৰ পিছত পূৰ্ণ অনুভৱ হোৱা ইত্যাদি।চিকিৎসা নকৰিলে কেন্সাৰ শৰীৰৰ আন অংশলৈ বিয়পিব পাৰে, আভ্যন্তৰীণ ৰক্তক্ষৰণ হ’ব পাৰে, বা যকৃত সম্পূৰ্ণৰূপে বিকল হ’ব পাৰে। পলমকৈ ধৰা পৰিলে চিকিৎসাও কঠিন হৈ পৰে। গতিকে সময় থকাৰ সময়ত সাৱধান হোৱাটো জৰুৰী।

ফেটি লিভাৰেও লিভাৰ কেন্সাৰ কৰিব পাৰেনে?

নন-এলক’হলিক ফেটি লিভাৰ চিৰ’ছিছ কেতিয়াবা লিভাৰ কেন্সাৰলৈ পৰিণত হ’ব পাৰে। চৰ্বিযুক্ত যকৃতৰ ফলত যকৃতত অবিৰত প্ৰদাহ হয়। ফলত ক্ৰমান্বয়ে ফাইব্ৰ’ছিছ জমা হয় আৰু পিছত চিৰ’ছিছ হোৱা দেখা যায়। এই স্থায়ী ক্ষতিৰ ফলত যকৃতত কোষৰ অস্বাভাৱিক বৃদ্ধিৰ সম্ভাৱনা বৃদ্ধি পায়, যিটো পিছলৈ কেন্সাৰলৈ পৰিণত হ’ব পাৰে। এই প্ৰদাহ যিমানেই বেছি দিন চলি থাকিব সিমানেই কেন্সাৰ হোৱাৰ সম্ভাৱনা বেছি।

NAFLD প্ৰতিৰোধৰ বাবে আৰু যকৃতক সুস্থ কৰি ৰাখিবলৈ কিছু জৰুৰী ব্যৱস্থা গ্ৰহণ কৰিব লাগিব। উপযুক্ত ওজন বজাই ৰখা, সতেজ ফলমূল, শাক-পাচলি আৰু গোটা শস্য বেছিকৈ খোৱা, জাংক আৰু তেলীয়া খাদ্য কমকৈ খাব লাগে, প্লাষ্টিকত ভৰোৱা আৰু প্ৰচেছড খাদ্য পৰিহাৰ কৰিব লাগে। ধূমপান আৰু মদ্যপান বন্ধ কৰক। যদি আপোনাৰ ডায়েবেটিছ, মেদবহুলতা বা পৰিয়ালৰ ইতিহাস আছে তেন্তে নিয়মীয়াকৈ লিভাৰ পৰীক্ষা কৰা উচিত। এতিয়া কোনো সমস্যা নাথাকিলেও ভৱিষ্যতে বিপদ হৈ পৰিব পাৰে। গতিকে সুস্থ জীৱনশৈলী আৰু স্বাস্থ্য পৰীক্ষা কৰি যকৃতৰ কৰ্কট ৰোগৰ পৰা আঁতৰি থাকিব পাৰে আৰু যকৃতক সুৰক্ষিত কৰিব পাৰে।

লগতে পঢ়ক: পুৱাৰ এই ৫টা অভ্যাসে নষ্ট কৰে আপোনাৰ দিনটো, স্বাস্থ্যৰ ওপৰটো পেলাই বেয়া প্ৰভাৱ…