“এয়া কেৱল ৰে’ল সংযোগ নহয়, ই পৰিবহনৰ জীৱনৰেখা”, আইজললৈ ৰেলসেৱা উদ্বোধন কৰি মোদীয়ে ক’লে
ভৈৰৱী-ছাইৰাং সংযোগী মিজোৰামৰ প্ৰথমটো ৰেলপথ মিজোৰামবাসীৰ বাবে উৎসৰ্গা কৰে প্ৰধানমন্ত্ৰীয়ে। নৰেন্দ্ৰ মোদীয়ে কয় যে আজিৰ পৰা আইজলে ভাৰতৰ ৰে’লৱে মেপত নিজৰ স্থান সগৌৰৱেৰে বিচাৰি পাব...কঠিন ভূখণ্ডকে ধৰি অসংখ্য প্ৰত্যাহ্বানৰ মাজতো ভৈৰৱী-ছাইৰাং ৰে’ল লাইন এতিয়া বাস্তৱত পৰিণত হৈছে।
শনিবাৰৰ পৰা আৰম্ভ হৈছে প্ৰধানমন্ত্ৰী নৰেন্দ্ৰ মোদীৰ পাঁচ ৰাজ্য ভ্ৰমণ। প্ৰথমে তেওঁ উপস্থিত হয় উত্তৰ-পূবৰ অন্যতম ৰাজ্য মিজোৰামত। ভৈৰৱী-ছাইৰাং সংযোগী মিজোৰামৰ প্ৰথমটো ৰেলপথ মিজোৰামবাসীৰ বাবে উৎসৰ্গা কৰে প্ৰধানমন্ত্ৰীয়ে। এই লাইনটোৱে মানুহক উন্নত সেৱাৰ সুবিধা লাভ কৰাত সহায় কৰি কেনেদৰে “পৰিৱৰ্তনৰ জীৱনৰেখা” হ’ব আৰু স্থানীয় ব্যৱসায়ীসকলে দেশৰ বাকী অংশলৈ যাবলৈ সুবিধা লাভ কৰিব, সেই বিষয়ে আলোকপাত কৰে মোদীয়ে।
প্ৰধানমন্ত্ৰী মোদীয়ে কয়, “এয়া কেৱল ৰে’ল সংযোগ নহয়, ই পৰিবহনৰ জীৱনৰেখা। ই মিজোৰামৰ মানুহৰ জীৱন আৰু জীৱিকাত এক বৈপ্লৱিক পৰিৱৰ্তন আনিব। মিজোৰামৰ কৃষক আৰু ব্যৱসায়ীসকলে সমগ্ৰ দেশতে অধিক বজাৰ লাভ কৰিব পাৰিব।”
প্ৰতিকূল বতৰৰ বাবে লেংপুই বিমানবন্দৰৰ পৰাই আইজৱলত অনুষ্ঠিত সভাক সম্বোধন কৰা প্ৰধানমন্ত্ৰী মোদীয়ে উদ্বোধনী স্থানত উপস্থিত থাকিব নোৱৰাৰ বাবে ক্ষমা বিচাৰিলে।
তেওঁ নিজৰ ভাষণ আৰম্ভ কৰি কয়, “নীলা পাহাৰৰ এই সুন্দৰ ভূমি চোৱাচিতা কৰা পৰম ঈশ্বৰ পাথিয়ানক মই প্ৰণাম জনালোঁ। মই ইয়াত মিজোৰামৰ লেংপুই বিমানবন্দৰত আছো, বেয়া বতৰৰ বাবে। আপোনালোকৰ লগত আইজলত যোগ দিব নোৱাৰাৰ বাবে মই দুখী। কিন্তু এই মাধ্যমৰ পৰাই আপোনালোকৰ মৰম আৰু চেনেহ অনুভৱ কৰিব পাৰিছো। বন্ধুসকল, স্বাধীনতা আন্দোলনেই হওক বা জাতি গঠনৰ কামেই হওক, মিজোৰামৰ জনসাধাৰণে সদায় সাহস আৰু সমৰ্পণেৰে আগবাঢ়ি আহিছে। লালনু ৰপুইলিয়ানী আৰু পছালথা খুৱাংচেৰাৰ দৰে মহান ব্যক্তিৰ আদৰ্শই কেৱল মিজোৰামক নহয়, সমগ্ৰ দেশকেই অনুপ্ৰাণিত কৰি আহিছে।”
A landmark day for Mizoram as it joins India’s railway map! Key infrastructure projects are also being initiated. Speaking at a programme in Aizawl. https://t.co/MxM6c2WZHZ
— Narendra Modi (@narendramodi) September 13, 2025
ৰেল লাইন উদ্বোধনক “ঐতিহাসিক দিন” বুলি অভিহিত কৰি প্ৰধানমন্ত্ৰী মোদীয়ে কয়, “এইটো এটা ঐতিহাসিক দিন, বিশেষকৈ মিজোৰামৰ জনসাধাৰণৰ বাবে। আজিৰ পৰা আইজল ভাৰতৰ ৰে’ল মেপত থাকিব। কেইবছৰমানৰ আগতে আইজল ৰে’ল লাইনৰ আধাৰশিলা স্থাপন কৰাৰ সুযোগ পাইছিলোঁ। আজি আমি গৌৰৱেৰে দেশৰ জনসাধাৰণৰ বাবে উৎসৰ্গা কৰিছো।”
তেওঁ অভিযন্তা আৰু শ্ৰমিকসকলৰ মনোভাৱক প্ৰশংসা কৰে যিয়ে প্ৰত্যাহ্বানমূলক ভূখণ্ডত সাহস কৰি একাধিক দলং আৰু সুৰংগ নিৰ্মাণ কৰিছিল, যিয়ে শেষত মিজোৰামক দিল্লীৰ সৈতে ৰেলযোগে সংযোগ কৰিলে।
“আমাৰ অভিযন্তাসকলৰ দক্ষতা আৰু আমাৰ কৰ্মীসকলৰ মনোভাৱেই এই কাম সম্ভৱ কৰি তুলিছিল। বন্ধুসকল, আমাৰ হৃদয় সদায় ইজনে সিজনৰ সৈতে প্ৰত্যক্ষভাৱে সংযুক্ত হৈ আহিছে, এতিয়া প্ৰথমবাৰৰ বাবে মিজোৰামৰ ছাইৰাঙক ৰাজধানী এক্সপ্ৰেছৰ জৰিয়তে দিল্লীৰ সৈতে পোনপটীয়াকৈ সংযোগ কৰা হ’ব।” মোদীয়ে কয়।
তেওঁ লগতে কয় যে মানুহে শিক্ষা আৰু স্বাস্থ্যসেৱাৰ বাবে অধিক বিকল্প লাভ কৰিব পাৰিব। ইয়াৰ ফলত পৰ্যটন, পৰিবহন আৰু আতিথ্য খণ্ডতো সুযোগৰ সৃষ্টি হ’ব। তদুপৰি প্ৰধানমন্ত্ৰীয়ে কয় যে ভাৰতৰ উন্নয়নৰ যাত্ৰাত মিজোৰামে গুৰুত্বপূৰ্ণ ভূমিকা পালন কৰি আছে। দেশৰ বাবে বিশেষকৈ মিজোৰামৰ জনসাধাৰণৰ বাবে এয়া এক ঐতিহাসিক দিন।
প্ৰধানমন্ত্ৰী মোদীয়ে কয় যে ভাৰতৰ ‘এক্ট ইষ্ট’ নীতিত ৰাজ্যখনে মুখ্য ভূমিকা পালন কৰিব। কালাদান মাল্টিম’ডাল ট্ৰেনজিট প্ৰকল্প আৰু মিজোৰামক দক্ষিণ-পূব এছিয়াৰ সৈতে সংযোগ কৰিব পৰা নতুন ৰে’লপথৰ ওপৰত আলোকপাত কৰি মোদীয়ে এনেদৰে কয়।
তেওঁ লগতে কয় যে উত্তৰ-পূৰ্বাঞ্চল দ্ৰুতগতিত উদ্যোগীকৰণৰ এক প্ৰধান কেন্দ্ৰলৈ পৰিণত হৈছে, ইতিমধ্যে এই অঞ্চলত ৪৫০০ টা ষ্টাৰ্টআপ আৰু ২৫টা ইনকিউবেটৰ চলি আছে।
কিছুমান ৰাজনৈতিক দলে ভোট বেংকৰ ৰাজনীতি কৰাৰ বাবে লক্ষ্য কৰি লোৱা আৰু কেৱল লোকসভাত অধিক আসন থকা ঠাইত গুৰুত্ব দিয়াৰ ফলত উত্তৰ-পূবৰ ৰাজ্যসমূহ অৱহেলিত হৈ আহিছিল।
“দীৰ্ঘদিন ধৰি দেশৰ একাংশ ৰাজনৈতিক দলে ভোট বেংকৰ ৰাজনীতি চলাইছিল। তেওঁলোকৰ গুৰুত্ব সদায় সেইবোৰ ঠাইত আছিল যিবোৰ ঠাইত ভোট আৰু আসন বেছি আছিল। এই মনোভাৱৰ বাবে মিজোৰামৰ দৰে ৰাজ্যকে ধৰি সমগ্ৰ উত্তৰ-পূৰ্বাঞ্চলৰ যথেষ্ট ক্ষতি হৈছিল। কিন্তু আমাৰ দৃষ্টিভংগী বহুত বেলেগ। আগতে যিসকলক অৱহেলিত কৰা হৈছিল তেওঁলোক এতিয়া আগৰণুৱা হৈছে। যিসকলক প্ৰান্তীয়কৰণ কৰা হৈছিল তেওঁলোক এতিয়া মূলসুঁতিলৈ আহিছে” প্ৰধানমন্ত্ৰীয়ে কয়।
নৰেন্দ্ৰ মোদীয়ে কয় যে আজিৰ পৰা আইজলে ভাৰতৰ ৰে’লৱে মেপত নিজৰ স্থান সগৌৰৱেৰে বিচাৰি পাব…কঠিন ভূখণ্ডকে ধৰি অসংখ্য প্ৰত্যাহ্বানৰ মাজতো ভৈৰৱী-ছাইৰাং ৰে’ল লাইন এতিয়া বাস্তৱত পৰিণত হৈছে। অধ্যৱসায়, দৃঢ়তা, আৰু সামূহিকভাৱে আগবাঢ়ি যোৱাৰ ইচ্ছাৰ প্ৰমাণ এয়া।
ৰে’ল মন্ত্ৰী অশ্বিনী বৈষ্ণৱে জনোৱা মতে, ভৈৰৱী-ছাইৰাঙৰ মাজত ৫১ কিলোমিটাৰ দৈৰ্ঘ্যৰ ৰেলপথত ৪৫টা সুৰংগ আৰু ৪৫খন দলং আছে। উদ্বোধনী অনুষ্ঠানত মন্ত্ৰী বৈষ্ণৱে আলোকপাত কৰে যে কেনেদৰে প্ৰধানমন্ত্ৰী মোদীৰ নেতৃত্বত উত্তৰ-পূবৰ ৰে’লৱেৰ বাজেট পাঁচগুণ বৃদ্ধি পাইছে।
উদ্বোধনী কাৰ্যসূচীৰ সময়ত বৈষ্ণৱে কয়, “২০১৪ চনৰ আগতে উত্তৰ-পূবৰ বাবে ৰে’লৱেৰ বাজেট আছিল মাত্ৰ ২০০০ কোটি, মোদীজীৰ দিনত ই পাঁচগুণ বৃদ্ধি পাই ১০ হাজাৰ কোটি হৈছিল। সেয়াই হৈছে মোদী জীৰ এক্ট ইষ্ট নীতি। আজি ৭৭ হাজাৰ কোটিৰ ৰে’ল প্ৰকল্প এতিয়া চলি আছে।”
ৰেল লাইনৰ উপৰিও প্ৰধানমন্ত্ৰীয়ে একাধিক পথ প্ৰকল্পৰ আধাৰশিলা স্থাপন কৰে। ইয়াৰ ভিতৰত আছে আইজল বাইপাছ ৰোড, থেনজাল-চিয়ালছুক ৰোড আৰু খানকাউন-ৰংগুৰা ৰোড।
১৩ ছেপ্টেম্বৰৰ পৰা ১৫ ছেপ্টেম্বৰলৈ ৫ খন ৰাজ্য মিজোৰাম, মণিপুৰ, অসম, পশ্চিম বংগ আৰু বিহাৰ ভ্ৰমণ কৰি ৭১,৮৫০ কোটি টকাৰ প্ৰকল্পৰ উদ্বোধন আৰু আধাৰশিলা স্থাপন কৰিব প্ৰধানমন্ত্ৰী মোদীয়ে।
প্ৰধানমন্ত্ৰীয়ে আজি দীৰ্ঘ দূৰত্বৰ তিনিখন ৰে’লৰ চলাচল উদ্বোধন কৰে। এই তিনিখন ৰেল হৈছে ক্ৰমে- আইজল (ছাইৰাং) আৰু দিল্লী (আনন্দ বিহাৰ) ৰাজধানী এক্সপ্ৰেছ, আইজল (ছাইৰাং) আৰু গুৱাহাটী সংযোগী এক্সপ্ৰেছ, আইজল (ছাইৰাং) আৰু কলকাতা সংযোগী এক্সপ্ৰেছ ৰে’ল।
