কাশ্মীৰত প্ৰধানমন্ত্ৰী মোদী: ৰে’লৱে উন্নয়নৰ পৰা অপাৰেশ্যন সেন্দূৰলৈ উদাত্ত ভাষণ প্ৰধানমন্ত্ৰীৰ
এক সমাৱেশক সম্বোধন কৰি প্ৰধানমন্ত্ৰী মোদীয়ে কয়, “মাতা বৈষ্ণো দেৱীৰ আশীৰ্বাদত কাশ্মীৰ উপত্যকা এতিয়া দেশৰ ৰে’ল ব্যৱস্থাৰ সৈতে সংযুক্ত হৈ পৰিছে । আনকি ৰে’লৱেৰ বাবেও ‘কাশ্মীৰৰ পৰা কন্যাকুমাৰীলৈ’ বাক্যাংশটো এতিয়া বাস্তৱত পৰিণত হৈছে ।”
পহলগাম সন্ত্ৰাসবাদী আক্ৰমণৰ পিছত প্ৰথমবাৰৰ বাবে জম্মু-কাশ্মীৰ ভ্ৰমণৰ সময়ত প্ৰধানমন্ত্ৰী নৰেন্দ্ৰ মোদীয়ে শুকুৰবাৰে কাট্ৰাত এক ঐতিহাসিক মাইলৰ খুঁটি স্থাপন কৰে । কাশ্মীৰ উপত্যকাক দেশৰ ৰে’ল নেটৱৰ্কত সম্পূৰ্ণৰূপে একত্ৰিত কৰি মোদীয়ে উদ্বোধন কৰিলে বিশ্বৰ সৰ্বোচ্চ ৰে’ল দলং ‘চেনাব ব্ৰিজ’। তাৰোপৰি কাট্ৰা-শ্ৰীনগৰৰ মাজত বন্দে ভাৰত এক্সপ্ৰেছো মুকলি কৰে প্ৰধানমন্ত্ৰীয়ে ।
এক সমাৱেশক সম্বোধন কৰি প্ৰধানমন্ত্ৰী মোদীয়ে কয়, “মাতা বৈষ্ণো দেৱীৰ আশীৰ্বাদত কাশ্মীৰ উপত্যকা এতিয়া দেশৰ ৰে’ল ব্যৱস্থাৰ সৈতে সংযুক্ত হৈ পৰিছে । আনকি ৰে’লৱেৰ বাবেও ‘কাশ্মীৰৰ পৰা কন্যাকুমাৰীলৈ’ বাক্যাংশটো এতিয়া বাস্তৱত পৰিণত হৈছে ।”
The inauguration of mega infrastructure projects today marks a turning point in Jammu and Kashmir’s development journey. Addressing a programme in Katra. https://t.co/yW4P7yaaRf
— Narendra Modi (@narendramodi) June 6, 2025
পাকিস্তানক তীব্ৰ সমালোচনা প্ৰধানমন্ত্ৰীৰ
উদাত্ত ভাষণত প্ৰধানমন্ত্ৰীয়ে পাকিস্তানক তীব্ৰ সমালোচনা কৰি শেহতীয়াকৈ পহলগামত সংঘটিত সন্ত্ৰাসবাদী আক্ৰমণৰ বাবে পাকিস্তানক দোষাৰোপ কৰে, য’ত কেইবাজনো সাধাৰণ নাগৰিকৰ মৃত্যু হৈছিল । এই আক্ৰমণক কাশ্মীৰৰ পৰ্যটন অৰ্থনীতিক ক্ষতিগ্ৰস্ত কৰাৰ লক্ষ্যৰে কৰা ষড়যন্ত্ৰ বুলি অভিহিত কৰি প্ৰধানমন্ত্ৰী মোদীয়ে কয়, “পাকিস্তান মানৱতা, পৰ্যটন, আৰু কাশ্মীৰীৰ ‘ৰৌজী-ৰোটি’ৰ বিৰুদ্ধে — সেইবাবেই ই পহলগামত নিৰীহ পৰ্যটকক লক্ষ্য কৰি লৈছিল ।”
এই আক্ৰমণক ‘উন্মাদ’ আৰু ‘কাশ্মীৰি’ৰ ওপৰত আক্ৰমণ বুলি অভিহিত কৰি মোদীয়ে অভিযোগ কৰে যে সমগ্ৰ দেশতে সাম্প্ৰদায়িক উত্তেজনা জগাই তোলাৰ লক্ষ্যৰে এই আক্ৰমণ কৰা হৈছে । ভাৰতৰ সন্ত্ৰাসবাদ বিৰোধী ব্যৱস্থাৰ কথা উল্লেখ কৰি তেওঁ কয়, ‘‘যেতিয়াই পাকিস্তানে ‘অপাৰেচন সেন্দূৰ’ৰ নাম শুনিব, তেতিয়াই ইয়াৰ লজ্জাজনক পৰাজয়ৰ কথা সুঁৱৰিব ।‘‘
ভাৰতে কেতিয়াও সন্ত্ৰাসবাদৰ আগত শিৰনত নকৰে বুলি জোৰ দি প্ৰধানমন্ত্ৰীয়ে জম্মু-কাশ্মীৰৰ যুৱক-যুৱতীসকলক উগ্ৰবাদৰ বিৰুদ্ধে যুঁজত একত্ৰিত হৈ থিয় দিয়াৰ বাবে প্ৰশংসা কৰে । তেওঁ লগতে কয়, ‘‘ইয়াৰ যুৱ প্ৰজন্মই শান্তি, প্ৰগতি আৰু সমৃদ্ধি বিচাৰে ।‘‘
কেন্দ্ৰৰ আন্তঃগাঁথনিৰ পদক্ষেপ
অঞ্চলটোত কেন্দ্ৰৰ আন্তঃগাঁথনিৰ পদক্ষেপৰ ওপৰত আলোকপাত কৰি প্ৰধানমন্ত্ৰী মোদীয়ে কয় যে উধামপুৰ-শ্ৰীনগৰ-বৰামুল্লা ৰে’ল লাইন আৰু অত্যাধুনিক চেনাব আৰু আঞ্জি দলঙৰ দৰে প্ৰকল্পৰ উদ্বোধনে জম্মু আৰু কাশ্মীৰৰ উন্নয়নৰ এক টাৰ্নিং পইণ্ট হিচাপে চিহ্নিত কৰিছে । তেওঁ ৰে’ল লাইন “নতুন, ক্ষমতাশালী জম্মু-কাশ্মীৰ”ৰ প্ৰতীক আৰু ভাৰতৰ ক্ৰমবৰ্ধমান শক্তিৰ প্ৰমাণ বুলি অভিহিত কৰে মোদীয়ে ।
কেন্দ্ৰীয় শাসিত অঞ্চলত সংযোগ আৰু অৰ্থনৈতিক বিকাশৰ লক্ষ্যৰে ধাৰাবাহিক মেগা আন্তঃগাঁথনিৰ পদক্ষেপ উদ্বোধন কৰি মোদীয়ে কয়, ‘‘চেনাব আৰু আঞ্জি দলংখনে কেৱল ঠাই সংযোগ কৰাই নহয়, জম্মু-কাশ্মীৰৰ বাবেও সমৃদ্ধিৰ দুৱাৰমুখ হৈ পৰিব ।‘‘
