‘গণতন্ত্ৰত ভোটাৰ হোৱাটোৱেই হৈছে….’, ৰাষ্ট্ৰীয় ভোটাৰ দিৱসত প্ৰধানমন্ত্ৰী মোদীৰ বিশেষ পত্ৰ

ৰাষ্ট্ৰীয় ভোটাৰ দিৱস উপলক্ষে প্ৰধানমন্ত্ৰী নৰেন্দ্ৰ মোদীয়ে ‘MY-Bharat’ স্বেচ্ছাসেৱক আৰু সমগ্ৰ ভাৰতৰ যুৱক-যুৱতীসকললৈ এখন বিশেষ পত্ৰ লিখিছে। এই পত্ৰৰ জৰিয়তে প্ৰধানমন্ত্ৰীয়ে ভাৰতৰ যুৱ প্ৰজন্মক তেওঁলোক নিজে বা তেওঁলোকৰ আশে-পাশে থকা কোনো লোক ভোটাৰ হিচাপে পৰিগণিত হোৱাৰ বিশেষ মুহূৰ্তটিক উদযাপন কৰিবলৈ আহ্বান জনাইছে। তেওঁ উল্লেখ কৰে যে গণতন্ত্ৰত ভোটাৰ হোৱাটোৱেই হৈছে আটাইতকৈ ডাঙৰ সৌভাগ্য আৰু দায়িত্ব। প্ৰধানমন্ত্ৰী মোদীয়ে শিক্ষা প্ৰতিষ্ঠানসমূহকো তেওঁলোকৰ ছাত্ৰ-ছাত্ৰীসকল ভোটাৰ হোৱাৰ সময়ত এক উৎসৱ হিচাপে পালন কৰিবলৈ আহ্বান জনায়।

প্ৰধানমন্ত্ৰীয়ে লিখিছে যে ভাৰতক পৃথিৱীৰ সৰ্ববৃহৎ গণতন্ত্ৰ বুলি কোৱা হয় আৰু এয়া একেবাৰে সঁচা। ‘গণতন্ত্ৰৰ মাতৃ’ (Mother of Democracy) হিচাপে ভাৰতৰ গণতান্ত্ৰিক মূল্যবোধৰ ইতিহাস অতি প্ৰাচীন আৰু ইয়াক লৈ আমি গৌৰৱ কৰা উচিত বুলি তেওঁ দোহাৰে। “১৯৫১ চনত প্ৰথম নিৰ্বাচনৰ প্ৰক্ৰিয়া আৰম্ভ হৈছিল আৰু এই বছৰ আমি ইয়াৰ ৭৫ বছৰ সম্পূৰ্ণ হোৱাৰ উৎসৱ পালন কৰিছোঁ। ১৯৫২ চনত সম্পন্ন হোৱা এই নিৰ্বাচনে বিশ্বক দেখুৱাই দিছিল যে গণতান্ত্ৰিক চেতনা ভাৰতীয়ৰ তেজত আছে।”- এইদৰে লিখিছে প্ৰধানমন্ত্ৰী মোদীয়ে।

ভোটাৰেই দেশৰ অংশীদাৰী

প্ৰধানমন্ত্ৰী মোদীয়ে কয়, “গণতন্ত্ৰত ভোটদান কৰাটো এক বিশেষাধিকাৰ হোৱাৰ লগতে এক বৃহৎ দায়িত্বও। ভোটদান এক সাংবিধানিক অধিকাৰ, যি ভাৰতৰ ভৱিষ্যতত দেশৰ নাগৰিকৰ অংশগ্ৰহণৰ প্ৰতীক। এজন ভোটাৰেই দেশৰ অংশীদাৰিত্ব বহন কৰে। ভোটদানৰ সময়ত আঙুলিত লগা অমিত চিয়াহীয়ে আমাক সোঁৱৰাই দিয়ে যে আমাৰ গণতন্ত্ৰ জীৱন্ত আৰু ইয়াৰ উদ্দেশ্য অতি মহান। আপোনাৰ বন্ধু বা আত্মীয়ৰ মাজত এনে বহু যুৱক-যুৱতী থাকিব পাৰে যিয়ে প্ৰথমবাৰৰ বাবে ভোটাৰ হৈছে।”

“তেওঁলোকৰ জীৱনৰ বাবে এয়া এক অত্যন্ত গুৰুত্বপূৰ্ণ মুহূৰ্ত। প্ৰথমবাৰৰ ভোটাৰসকলক গণতন্ত্ৰত আন্তৰিক আদৰণি জনোৱা উচিত কাৰণ তেওঁলোকৰ ওচৰত দেশৰ ভাগ্য সলনি কৰাৰ ক্ষমতা আছে। তেওঁ এক বিশেষ আহ্বান জনাই কয় যে যেতিয়াই ঘৰৰ বাবে ওচৰ-পাজৰৰ কোনো যুৱক বা চিনাকি ব্যক্তি প্ৰথমবাৰৰ বাবে ভোটাৰ হয়, তেওঁক উৎসাহিত কৰক।”- প্ৰধানমন্ত্ৰী নৰেন্দ্ৰ মোদীয়ে লগতে পত্ৰখনত এইদৰে লিখিছে।

ৰাষ্ট্ৰীয় ভোটাৰ দিৱস উদযাপন

তেওঁ লিখিছে যে আমাৰ স্কুল আৰু কলেজসমূহত গণতান্ত্ৰিক মূল্যবোধৰ শিক্ষা দিয়া হয়। শিক্ষা প্ৰতিষ্ঠানসমূহে ছাত্ৰ-ছাত্ৰীৰ প্ৰথমবাৰৰ ভোটদানক এক গুৰুত্বপূৰ্ণ সুযোগ হিচাপে গণ্য কৰক বুলিও তেওঁ আহ্বান জনায়। “ইয়াৰ বাবে বিশেষ অনুষ্ঠানৰ আয়োজন কৰিব পাৰি য’ত যুৱ প্ৰজন্মক সন্মান জনোৱা হ’ব। স্কুল-কলেজৰ চৌহদত এনে কাৰ্যসূচী ৰূপায়ণ কৰিব পাৰি। প্ৰতি বছৰৰ ২৫ জানুৱাৰী অৰ্থাৎ ৰাষ্ট্ৰীয় ভোটাৰ দিৱস এনে কাৰ্যকলাপৰ বাবে এক উপযুক্ত সুযোগ।”- এই পৰামৰ্শ প্ৰধানমন্ত্ৰী মোদীৰ।

প্ৰধানমন্ত্ৰী মোদীয়ে উল্লেখ কৰে যে বিশ্বৰ বাবে এনে এক বৃহৎ পৰিসৰত নিৰ্বাচন অনুষ্ঠিত কৰাটো ব্যৱস্থাপনাৰ ফালৰ পৰা এক ডাঙৰ সাফল্য। ই কেৱল পৰিচালনাই নহয়, ই গণতন্ত্ৰৰ মূল্যবোধৰো এক উৎসৱ। ইয়াত সকলো ভোটাৰে মিলি আনন্দ কৰে বুলি উল্লেখ কৰি প্ৰধানমন্ত্ৰী মোদীয়ে লগতে ভোটদানক লৈ দেশবাসীৰ দায়বদ্ধতা অতি গভীৰ বুলিও দোহাৰে। তেওঁৰ ভাষাত, হিমালয়ৰ উচ্চতাৰ পৰাই হওক বা আন্দামান-নিকোবৰ দ্বীপপুঞ্জ, ৰাজস্থান বা ঘন অৰণ্যৰ মাজৰ পৰাই হওক, তেওঁলোকে ভোট দি নিজৰ কণ্ঠ যাতে শুনা যায় সেয়া নিশ্চিত কৰে।

যুৱতীসকলৰ সক্ৰিয় অংশগ্ৰহণ গণতন্ত্ৰৰ শক্তিশালী আধাৰ

পত্ৰখনত প্ৰধানমন্ত্ৰী মোদীয়ে লগতে লিখিছে যে গণতান্ত্ৰিক আদৰ্শৰ প্ৰতি ভোটাৰৰ এই দায়বদ্ধতা অনাগত সময়ৰ বাবে এক ডাঙৰ অনুপ্ৰেৰণা হ’ব। এক অন্তৰ্ভুক্তিমূলক গণতন্ত্ৰৰ বাবে আমাৰ নাৰী শক্তি, বিশেষকৈ যুৱতীসকলৰ অংশগ্ৰহণ অতি প্ৰয়োজনীয় বুলি উল্লেখ কৰি প্ৰধানমন্ত্ৰী মোদীয়ে তেওঁলোকৰ সচেতনতা আৰু সক্ৰিয় অংশগ্ৰহণে ভাৰতৰ গণতন্ত্ৰৰ ভেটি অধিক শক্তিশালী কৰিছে বুলিও কয়। তেওঁ লগতে যুৱক-যুৱতীসকলক ‘Mera Yuva Bharat’ বা ‘MY Bharat’ প্লেটফৰ্মৰ সৈতে জড়িত হ’বলৈ আহ্বান জনাইছে।

‘MY Bharat’ প্লেটফৰ্ম দেশক আগুৱাই নিয়াৰ বাবে যুৱক-যুৱতীৰ দায়বদ্ধতা প্ৰকাশৰ এক মাধ্যম হ’ব পাৰে বুলি আশা প্ৰকাশ কৰি তেওঁ কয় যে এই প্ৰজন্মৰ কোনেও কোনো কাম ভাগ্যৰ ওপৰত এৰি দিব নালাগে, বৰঞ্চ আনকো সচেতন কৰিব লাগে। তেওঁ সকলোকে ‘আমি আমাৰ গণতন্ত্ৰক শক্তিশালী কৰিবলৈ কোনো ত্ৰুটি নকৰোঁ’ বুলি সংকল্প ল’বলৈ আহ্বান জনায়। ইয়াৰ জৰিয়তে এখন বিকশিত, অন্তৰ্ভুক্তিমূলক আৰু আত্মনিৰ্ভৰশীল ভাৰত গঢ়াৰ সপোন বাস্তবায়িত হ’ব বুলি প্ৰধানমন্ত্ৰী মোদীয়ে পত্ৰখনত লিখিছে।