ৰত্নাকৰ গুচি বাল্মিকী হোৱাৰ দৰেই…বন্দুকৰ পথ এৰি সন্ত্ৰাস নিৰ্মূলত ব্ৰতী এজন প্ৰাক্তন সন্ত্ৰাসবাদী

ৰছিদ খান । ৯০ দশকৰ এজন কুখ্যাত সন্ত্ৰাসবাদী । কুপৱাৰাৰ পৰা ৰছিদ খান পাকিস্তান অধিকৃত কাশ্মীৰলৈ গৈ আফগান মুজাহিদীনৰ পৰা প্ৰশিক্ষণ লৈ উভতি আহিছিল । ‘আজাদ কাশ্মীৰ’ৰ সপোন লৈ তেওঁ সীমান্ত পাৰ হৈ পাকিস্তানত প্ৰৱেশ কৰিছিল । আজি সেই সকলোবোৰ অতীতত । ইতিমধ্যে তেওঁ নিজৰ অস্ত্ৰ ত্যাগ কৰিছে । আজি তেওঁ কেৱল সমাজৰ মূলসুঁতিত থকাই নহয়, তেওঁ সন্ত্ৰাসবাদীক নিঃশেষ কৰাতো সহায় কৰে ।

সন্ত্ৰাসবাদীৰ প্ৰশিক্ষণ ল’বলৈ পাকিস্তানলৈ যোৱাৰ স্মৃতি আজিও ৰছিদ খানৰ মনত সতেজ হৈ পৰিছে । সীমান্ত পাৰ হোৱাৰ লগে লগে পাকিস্তানী সেনাই আদৰণি জনাছিল । সীমান্তৰ পৰা গাড়ীৰে বহু দূৰৰ এটা প্ৰশিক্ষণ শিবিৰলৈ লৈ যোৱা হৈছিল তেওঁক ।

প্ৰশিক্ষণ শেষ হ’ল । অস্ত্ৰ-শস্ত্ৰ লৈ ঘৰলৈ উভতি আহিল । ইয়াৰ পিছত সীমান্তৰ সিপাৰৰ পৰা অনবৰতে নিৰ্দেশ আহিছিল । কিন্তু শেষত তেওঁ উপলব্ধি কৰে যে এই ‘আজাদ কাশ্মীৰ’ৰ সপোন আচলতে মিছা । সেয়ে তেওঁ সেনাবাহিনীৰ ওচৰত আত্মসমৰ্পণ কৰিলে । তেতিয়াৰ পৰাই তেওঁ চৰকাৰৰ সৈতে কাম কৰিবলৈ আৰম্ভ কৰে, যাক ‘এখোৱানী’ বুলি কোৱা হয় ।

কুপৱাৰাৰ পৰা ছোপোৰলৈকে এক বিশাল অঞ্চলত ১০০ৰো অধিক সন্ত্ৰাসবাদীক বন্দী বা নিধন কৰাত সহায় কৰিছে ৰছিদ খানে । পহলগামতল সংঘটিত এনে বৃহৎ আক্ৰমণ তেওঁ মানি ল’ব পৰা নাই । তেওঁ স্পষ্টকৈ ক’লে, “মানুহে এনে কাম কৰিব নোৱাৰে ।” একে সময়তে যুদ্ধৰ সূত্ৰপাত হ’লে তেওঁ সেনাৰ সৈতে কান্ধত কান্ধ মিলাই পাকিস্তানৰ সৈতে যুঁজিবলৈ সাজু বুলিও কয় ।

এতিয়া তেওঁ ভাবে যে সন্ত্ৰাসবাদী প্ৰশিক্ষণ আচলতে এটা প্ৰতাৰণা । সেয়া এতিয়াও চলি আছে । তেওঁৰ মতে জামাত-ই-ইছলামীৰ দৰে সংগঠনে মানুহক প্ৰতাৰণা কৰি বিপথে পৰিচালিত কৰিছে । এইখন তেওঁৰ নিজৰ দেশ । গতিকে সেই দেশখনক বচাবলৈ যুঁজিবলৈ সাজু হৈছে ৰছিদ খান ।