কলকাতা কাণ্ড: কঠোৰ আইন প্ৰণয়নৰ দাবীৰে প্ৰধানমন্ত্ৰী মোদীলৈ মমতাৰ পত্ৰ
কলকাতা ধৰ্ষণৰ ঘটনা সন্দৰ্ভত প্ৰধানমন্ত্ৰী মোদীলৈ পত্ৰ লিখিছে মুখ্যমন্ত্ৰী মমতা বেনাৰ্জীয়ে। পত্ৰখনত তেওঁ প্ৰধানমন্ত্ৰীক ধৰ্ষণ আৰু হত্যাৰ দৰে ঘটনাৰ ওপৰত কঠোৰ আইন প্ৰণয়ন কৰিবলৈ দাবী জনাইছে। ইয়াৰ উপৰিও তেওঁ অভিযোগ কৰে যে কেন্দ্ৰীয় চৰকাৰে আগতে লিখা পত্ৰসমূহৰ কোনো সঁহাৰি দিয়া নাই।
কলকাতাত প্ৰশিক্ষাৰ্থী চিকিৎসকৰ ধৰ্ষণ আৰু হত্যাৰ তদন্ত এতিয়াও চলি আছে। ন্যায় দাবীৰে দলবোৰে নিৰন্তৰভাৱে ইজনে সিজনৰ ওপৰত অভিযোগ উত্থাপন কৰি আহিছে। ইফালে বংগৰ মুখ্যমন্ত্ৰী মমতা বেনাৰ্জীয়ে দেশৰ প্ৰধানমন্ত্ৰীলৈ এখন পত্ৰ লিখিছে। পত্ৰখনত মমতা বেনাৰ্জীয়ে কেন্দ্ৰীয় চৰকাৰক ধৰ্ষণ আৰু হত্যাৰ দৰে ঘটনাৰ ওপৰত কঠোৰ আইন প্ৰণয়ন কৰিবলৈ আৰু এনে জঘন্য অপৰাধ প্ৰতিৰোধ কৰিবলৈ প্ৰধানমন্ত্ৰী মোদীলৈ পত্ৰ লিখিছে। এই পত্ৰখনত মুখ্যমন্ত্ৰী মমতাই কৈছিল, ‘আপোনাৰ মনত আছে মই ২২ আগষ্টত এখন পত্ৰ লিখিছিলোঁ। কিন্তু আপুনি এনে এটা সংবেদনশীল বিষয়ত কোনো সঁহাৰি দিয়া নাছিল। অৱশ্যে মই মহিলা আৰু শিশু বিকাশ মন্ত্ৰালয়ৰ পৰা মোৰ পত্ৰৰ উত্তৰ পাইছিলোঁ। মই নাভাবো যে কেন্দ্ৰীয় চৰকাৰে এনে এক সংবেদনশীল বিষয়টো গুৰুত্ব সহকাৰে লৈছে।”
মমতা বেনাৰ্জীয়ে লগতে কয় যে, “চৰকাৰে এই বিষয়টো গুৰুত্বসহকাৰে ল’লেও, যি ধৰণৰ পৰিৱেশ সৃষ্টি হৈছে সেই অনুসৰি ই অপৰ্যাপ্ত। মমতা বেনাৰ্জীয়ে আৰু কৈছে যে আপোনাৰ মন্ত্ৰালয়ৰ পৰা যি উত্তৰ আহিছে তাত দেখা গৈছে যে বিষয়টো গুৰুত্ব সহকাৰে লোৱা হোৱা নাই। আগতেও মই মোৰ ৰাজ্যৰ সৈতে সম্পৰ্কিত বহুতো বিষয়ত আপোনালৈ পত্ৰ লিখিছোঁ, কিন্তু সেইবোৰটো গুৰুত্ব দিয়া হোৱা নাই।”
I have written this letter to the Hon’ble Prime Minister of India in connection with an earlier letter of mine to him. This is a second letter in that reference. pic.twitter.com/5GXKaX6EOZ
— Mamata Banerjee (@MamataOfficial) August 30, 2024
প্ৰধানমন্ত্ৰী মোদীলৈ লিখা এখন পত্ৰত মমতা বেনাৰ্জীয়ে আগতে লিখা পত্ৰসমূহৰ বিষয়ে উল্লেখ কৰে। তেওঁ কৈছে যে আগতে লিখা পত্ৰবোৰ গুৰুত্ব সহকাৰে লোৱা হোৱা নাই বা সেইবোৰক লৈ এতিয়ালৈকে কোনো সঁহাৰি পোৱা নাই। মুখ্যমন্ত্ৰীয়ে লিখিছে, “মই আশা কৰিছোঁ মোৰ এই পত্ৰখন গুৰুত্বসহকাৰে লোৱা হ’ব। মই আপোনাক ধৰ্ষণৰ সৈতে মোকাবিলা কৰিবলৈ এখন কঠোৰ আইন প্ৰস্তুত কৰাৰ বিষয়ে বিবেচনা কৰিবলৈ অনুৰোধ জনাইছোঁ। লগতে যিসকলে এনে জঘন্য অপৰাধ কৰে তেওঁলোকৰ বাবে কঠোৰ শাস্তি প্ৰদান কৰা উচিত।”
তেওঁ লগতে দাবী কৰিছিল যে, “ধৰ্ষণৰ দৰে গোচৰৰ শুনানি অতি সোনকালে হ’ব। মই আশা কৰিছোঁ এই বিষয়টোত নিশ্চিতভাৱে গুৰুত্ব দিয়া হ’ব। এনে ধৰণৰ গোচৰৰ মোকাবিলা কৰিবলৈ মই ফাষ্ট ট্ৰেক বিশেষ আদালত আৰু POCSO আদালত শক্তিশালী কৰাৰ বাবে নিৰন্তৰ কাম কৰি আছোঁ।”
উল্লেখ্য যে, ৯ আগষ্টত কলকাতাৰ আৰ জি কৰ মেডিকেল কলেজ এণ্ড হাস্পতালৰ চেমিনাৰ হলত এগৰাকী প্ৰশিক্ষাৰ্থী চিকিৎসকৰ মৃতদেহ উদ্ধাৰ হয়। পাছত এইটো প্ৰকাশ পাইছিল যে ধৰ্ষণৰ পাছত চিকিৎসকগৰাকীক হত্যা কৰা হৈছিল। এই বিষয়টোক লৈ দেশৰ সকলো লোকৰ মাজত ক্ষোভৰ উদগীৰণ হৈছিল। যাৰ পাছত বৃহৎ সমদল উলিওৱা হৈছিল।
