অপাৰেচন সেন্দূৰত অংশ লোৱা দেশৰ সাহসী জোৱানলৈ সন্মানঃ BSFৰ ১৬ জোৱানলৈ বীৰত্বৰ পুৰস্কাৰ

কাইলৈ দেশে উদযাপন কৰিব ৭৯ সংখ্যক স্বাধীনতা দিৱস। দেশৰ সৰ্বপ্ৰান্তত এই মহান দিনটো উদযাপনৰ বাবে কৰা হৈছে তীব্ৰ প্ৰস্তুতি। স্বাধীনতা দিৱসৰ এই বিশেষ ক্ষণত পাকিস্তানৰ বিৰুদ্ধে কিছুদিন পূৰ্বে ভাৰতীয় সেনাই চলোৱা অপাৰেচন সেন্দূৰত অংশ লোৱা কেইজনমান জোৱানক সন্মান জনোৱা হ’ব। অপাৰেচন সেন্দূৰৰ সময়ত অতুলনীয় সাহস আৰু বীৰত্ব প্ৰদৰ্শন কৰাৰ বাবে সীমান্ত সুৰক্ষা বাহিনী (BSF)ৰ ১৬জন জোৱানক বীৰত্ব পদক প্ৰদান কৰা হৈছে। স্বাধীনতা দিৱসৰ প্ৰাকক্ষণত কেন্দ্ৰীয় চৰকাৰে এই জোৱানসকলৰ বাবে গেলেণ্ট্ৰি মেডেল ঘোষণা কৰে।

অৰ্ধসামৰিক বাহিনীটোক দেশৰ পশ্চিম দিশৰ নিয়ন্ত্ৰণ ৰেখাৰ উপৰিও ২২৯০ কিলোমিটাৰ দৈৰ্ঘৰ ভাৰত-পাকিস্তান আন্তঃৰাষ্ট্ৰীয় সীমান্তত পহৰা দিয়াৰ দায়িত্ব অৰ্পণ কৰা হৈছিল। বি এছ এফে একে ছ’চিয়েল মিডিয়া পোষ্ট যোগে এই বিষয়ে সদৰী কৰি এই পদক ভাৰতৰ প্ৰথমটো প্ৰতিৰক্ষা পৰ্যায় সীমান্ত সুৰক্ষা বাহিনীৰ ওপৰত জাতিটোৰ বিশ্বাস আৰু আস্থাৰ সাক্ষ্য বুলি অভিহিত কৰে।

উল্লেখ্য যে ২২ এপ্ৰিলত পহলগামত সংঘটিত ভয়ানক সন্ত্ৰাসবাদী আক্ৰমণৰ প্ৰতিশোধ হিচাপে ৭ মে’ৰ পৰা ১০ মে’লৈ ভাৰতীয় সেনাই অপাৰেচন সেন্দূৰ অভিযান চলাইছিল। এই অভিযানত বি এছ এফৰ দুজন জোৱান শ্বহীদ হোৱাৰ বিপৰীতে ৭ জন আহত হয়। এই সময়ছোৱাত সীমান্ত চকীত পাকিস্তানী মৰ্টাৰৰ আক্ৰমণত বাওঁ ভৰি হেৰুৱাইছিল স্থানীয় উপ-পৰিদৰ্শক ব্যাস দেৱে।

বিষয়াগৰাকীয়ে কনিষ্টবল সুদ্দি ৰাভাৰ সৈতে মিলি অভিযানৰ সময়ত ফ্ৰণ্টলাইনত নিয়োজিত সৈন্যৰ বাবে গোলাবাৰুদ পুনৰ যোগানৰ বাবে অভিযানৰ নেতৃত্ব দিছিল। জম্মুৰ খাৰকোলাত আন্তঃৰাষ্ট্ৰীয় সীমান্তৰ পৰা মাত্ৰ ২০০ মিটাৰ দূৰত্বত অৱস্থিত এক স্পৰ্শকাতৰ সীমান্ত চকীত সহযোগী কমাণ্ডেণ্ট অভিষেক শ্ৰীবাস্তৱৰ কমাণ্ডত আন এটা ইউনিট মোতায়েন কৰা হৈছিল।

অভিযানৰ সময়ত ১০ মে’ত শ্ৰীবাস্তৱে হেড কনিষ্টবল ব্রিজ মোহন সিং আৰু কনিষ্টবল দেপেশ্বৰ বৰ্মন, ভূপেন্দ্ৰ বাজপেয়ী, ৰাজন কুমাৰ আৰু বাসৱৰাজ শিৱপ্পা সুনাকদাৰ সৈতে পাকিস্তানী ড্ৰ’ন আক্ৰমণ বিফল কৰি তোলে। পাকিস্তানৰ আক্ৰমণত এই সীমান্ত চকীত শ্বহীদ হয় উপ-পৰিদৰ্শক মহম্মদ ইমটিয়াজ আৰু কনিষ্টবল দীপক চিংগাখাম। মৰণোত্তৰভাৱে তেওঁলোকক গেলেণ্টীৰ বাবে মিলিটাৰী মেডেল প্ৰদান কৰাৰ সম্ভাৱনা আছে।

ডেপুটি কমাণ্ডেণ্ট ৰবীন্দ্ৰ ৰাথোড়, পৰিদৰ্শক দেৱী লাল, হেড কনিষ্টবল চাহিব সিং আৰু কনিষ্টবল কানৱৰ সিঙৰ নেতৃত্বত আন এটা ইউনিটে অনন্য সাহসৰ পৰিচয় দি এগৰাকী সহযোগী জোৱানৰ জীৱন ৰক্ষা কৰে। সহকাৰী উপ-পৰিদৰ্শক উদয় বীৰ সিঙক জম্মুৰ জবোৱাল সীমান্তৰ আউটপোষ্টত পোষ্ট কৰা হৈছিল আৰু তেওঁৰ নেতৃত্বত এই ইউনিটে পাকিস্তানী কেমেৰা আৰু মেচিনগানৰ পোষ্ট ধ্বংস কৰে।

তেওঁৰ এই কাৰ্যই ভাৰতীয় সেনাৰ অভিযানক অধিক গতি দিছিল আৰু সহযোগী সৈনিকসকলক অনুপ্ৰাণিত কৰিছিল বুলি কোৱা হৈছে। অপাৰেচন সেন্দূৰৰ লগতে দেশৰ আন প্ৰান্তত পৃথক অভিযান চলোৱা আন আৰক্ষী আৰু কেন্দ্ৰীয় সশস্ত্ৰ আৰক্ষী বাহিনীৰ জোৱানসকলৰ বাবেও চৰকাৰে বীৰত্বৰ পদক ঘোষণা কৰে। ইয়াৰ ভিতৰত জম্মু-কাশ্মীৰ আৰক্ষীৰ বাবে ১২৮টা, চি আৰ পি এফৰ বাবে ২০টা আৰু ছত্তীশগড় আৰক্ষীৰ বাবে ১৪টা পদক ঘোষণা কৰা হৈছে বুলি প্ৰকাশ পাইছে।