বিদেশলৈ নপঠিয়ায়, দেশতেই তদন্ত হ’ব আহমেদাবাদত দুৰ্ঘটনাত পতিত বিমানখনৰ ব্লেক বক্সৰ তদন্ত

যোৱা ১২ জুনত দুৰ্ঘটনাত পতিত হৈছিল আহমেদাবাদৰ পৰা লণ্ডন অভিমুখী এয়াৰ ইণ্ডিয়াৰ এখন বিমান । দুৰ্ঘটনাগ্ৰস্ত এয়াৰ ইণ্ডিয়াৰ বিমানখনৰ ব্লেক বক্সৰ তদন্ত অব্যাহত আছে। বিমান দুৰ্ঘটনা তদন্ত ব্যুৰোৰ (AAIB) দ্বাৰা কৰা হৈছে এই তদন্ত। অসামৰিক বিমান পৰিবহন মন্ত্ৰী ৰাম মোহন নাইডুৱে স্পষ্টকৈ কয় যে বিমানখনৰ ব্লেক বক্স বিদেশলৈ প্ৰেৰণ কৰা নহ’ব। নাইডুৱে সকলো জল্পনা-কল্পনা নাকচ কৰিছে।

অসামৰিক বিমান পৰিবহণ মন্ত্ৰীগৰাকীয়ে কয় যে চলিত মাহৰ আৰম্ভণিতে আহমেদাবাদত দুৰ্ঘটনাগ্ৰস্ত হোৱা বিমানখনৰ ব্লেক বক্স বিদেশলৈ প্ৰেৰণ কৰা নহয়। বিমানখনৰ ব্লেক বক্সটো ভাৰততে আছে আৰু তদন্ত অব্যাহত ৰাখিছে এএআইবিয়ে।

চৰ্দাৰ বল্লভভাই পেটেল আন্তঃৰাষ্ট্ৰীয় বিমানবন্দৰৰ পৰা উৰণৰ পিছত এয়াৰ ইণ্ডিয়াৰ বিমানখন মেঘনিনগৰৰ এখন চিকিৎসা মহাবিদ্যালয়ৰ হোষ্টেলৰ চৌহদত দুৰ্ঘটনাগ্ৰস্ত হয়। এই অভিশপ্ত বিমানখনত ২৩০ জন যাত্ৰী আৰু ১২ জন ক্ৰু সদস্য আছিল। বিমানখনৰ ২৪১ জন লোকসহ মুঠ ২৭০ জন লোকে প্ৰাণ হেৰুৱাইছিল এই বিমান দুৰ্ঘটনাত। মাত্ৰ এজন যাত্ৰীৰ প্ৰাণ ৰক্ষা পৰিছিল এই দুৰ্ঘটনাত।

যোৱা ১৩ জুনত বিমানখনৰ ব্লেক বক্স উদ্ধাৰ কৰা হৈছিল। ব্লেক বক্স হৈছে এনে এক যন্ত্ৰ যাৰ জৰিয়তে বিমান দুৰ্ঘটনাৰ পূৰ্বে কি হৈছিল সেই কথা জানিবলৈ চেষ্টা কৰা হয়। ইয়াত বিমানখনৰ বিষয়ে তথ্য পোৱা যায়। ই কাৰিকৰী তথ্য সংগ্ৰহ কৰাত সহায় কৰে।

‘ব্লেক বক্স ডিকোড কৰি তথ্য লাভ কৰা হ’ব’

ৰাম মোহন নাইডুৱে কয় যে ব্লেক বক্সৰ পৰা কেতিয়া তথ্য উপলব্ধ হ’ব সেয়া কাৰিকৰী বিষয়। তদন্তৰ বাবে গঠন কৰা হৈছে উচ্চ পৰ্যায়ৰ পেনেল। এই ঘটনাৰ পিছত চৰকাৰে কৈছিল যে ব্লেক বক্সটো ডিকোড কৰিলে দুৰ্ঘটনাটোৰ ঠিক আগতে কি হৈছিল তাৰ গুৰুত্বপূৰ্ণ তথ্য পোৱা যাব।

শেহতীয়াকৈ মন্ত্ৰালয়েও এনে জল্পনা-কল্পনা নকৰিবলৈ আবেদন জনাইছিল। মন্ত্ৰালয়ে কয় যে সমগ্ৰ তদন্ত প্ৰক্ৰিয়াটো কাৰিকৰী পদ্ধতিৰে কৰা হ’ব। এই বিমান দুৰ্ঘটনাই ভাৰতৰ লগতে সমগ্ৰ বিশ্বকে শোকাহত কৰি তুলিছিল।