আহমেদাবাদ বিমান দুৰ্ঘটনাৰ ৩৮ ঘণ্টাৰ পিছতেই বিপদৰ সন্মুখীন হৈছিল এইখন বিমান, কথমপি ৰক্ষা পৰিল বহু যাত্ৰীৰ প্ৰাণ
১৪ জুনৰ নিশা ২:৫৬ বজাত ৰাষ্ট্ৰীয় ৰাজধানীৰ ওপৰেৰে ধুমুহাৰ মাজতে উৰি আছিল বিমানখন। বিমানখনে গ্ৰাউণ্ড প্ৰক্সিমিটি ৱাৰ্নিং চিষ্টেমৰ পৰা দুটা ড’নট ছিংক সতৰ্কবাণী লাভ কৰিছিল, যাৰ ফলত উচ্চতা অস্বাভাৱিকভাৱে হ্ৰাস পোৱাৰ বিষয়ে ক্ৰুসকলক সতৰ্ক কৰি দিয়া হৈছিল।
যোৱা ১২ জুনত আহমেদাবাদত দুৰ্ঘটনা সংঘটিত হৈছিল এয়াৰ ইণ্ডিয়াৰ এ আই ১৭১ বিমানখন। লণ্ডনলৈ যোৱা বিমানখনত থকা ২৪১জন লোকৰ মৃত্যু। মাত্ৰ এজন ব্যক্তিহে ৰক্ষা পৰিছিল এই দুৰ্ঘটনাত। এই ঘটনাৰ ৩৮ ঘণ্টাৰ পাছত সংকীৰ্ণভাৱে ৰোধ কৰা হয় আন এক বৃহৎ দুৰ্ঘটনা। দৰাচলতে দিল্লীৰ পৰা ভিয়েনালৈ যোৱা বয়িং ৭৭৭ বিমানখনে উৰণৰ লগে লগে কেইবাটাও গুৰুতৰ সতৰ্কবাণী লাভ কৰিছিল।
টাইমছ অৱ ইণ্ডিয়াৰ এক প্ৰতিবেদন অনুসৰি ১৪ জুনৰ নিশা ২:৫৬ বজাত এই ঘটনা সংঘটিত হয়। ৰাষ্ট্ৰীয় ৰাজধানীৰ ওপৰেৰে ধুমুহাৰ মাজতে উৰি আছিল বিমানখন। বিমানখনে গ্ৰাউণ্ড প্ৰক্সিমিটি ৱাৰ্নিং চিষ্টেমৰ পৰা দুটা ড’নট ছিংক সতৰ্কবাণী লাভ কৰিছিল, যাৰ ফলত উচ্চতা অস্বাভাৱিকভাৱে হ্ৰাস পোৱাৰ বিষয়ে ক্ৰুসকলক সতৰ্ক কৰি দিয়া হৈছিল।
৯০০ ফুট তললৈ নামি আহিছিল বিমানখন
বিষয়টোৰ সৈতে পৰিচিত বিষয়াসকলে নিশ্চিত কৰে যে বিমানখন উৰণৰ কিছু সময়ৰ পিছতে প্ৰায় ৯০০ ফুট তললৈ নামি আহিছিল। যদিও ৯ ঘণ্টা ৮ মিনিট পিছত বিমানখন নিৰাপদে ভিয়েনাত অৱতৰণ কৰে, তথাপিও এই ঘটনাৰ পিছত অসামৰিক বিমান পৰিবহণ সঞ্চালকালয়ে (ডিজিচিএ) তদন্ত আৰম্ভ কৰে।
দুয়োজন পাইলটক কৰ্তব্যৰ পৰা আঁতৰাই দিয়াৰ লগতে বিমান সংস্থাটোৰ নিৰাপত্তাৰক্ষী মুৰব্বীক সোধা-পোছাৰ বাবে মাতি অনা হয়। বিষয়াসকলৰ মতে, ক্ৰুৱে ষ্টিক শ্বেকাৰ এলাৰ্ট লাভ কৰে। এইটো এটা গুৰুতৰ সতৰ্কবাণী যিয়ে উৰণ নিয়ন্ত্ৰণক জোকাৰি যায়। এই ব্যৱস্থাটো এনেদৰে ৰচনা কৰা হয় যাতে পাইলটসকলৰ দৃষ্টি তৎক্ষণাত আকৰ্ষণ কৰিব পাৰে আৰু সংশোধনী ব্যৱস্থাৰ দাবী কৰিব পাৰে।
ঘটনাৰ সৈতে পৰিচিত বিষয়াসকলে জনোৱা মতে, বিমানখনৰ উৰণৰ সময়ত ষ্টিক শ্বেকাৰ আৰু GPWS এলাৰ্টৰ সমস্যা হৈছিল। উৰণৰ লগে লগে ষ্টিক শ্বেকাৰৰ সতৰ্কবাণী আৰু GPWS ছিংক সতৰ্কবাণী দেখা গ’ল। ষ্টিকৰ সতৰ্কবাণী এবাৰ আহিল আৰু GPWSৰ সতৰ্কতা দুবাৰ আহিছিল। উৰণৰ সময়ত প্ৰায় ৯০০ ফুট তললৈ নামি আহে বিমানখন।
এই কাণ্ড সংঘটিত হৈছিল এআই ১৭১ দুৰ্ঘটনাৰ মাত্ৰ ৩৮ ঘণ্টাৰ পিছত। এআই ১৭১ দুৰ্ঘটনাৰ পিছত ডিজিচিএই বিমান সংস্থাটোৰ বহৰ আৰু সুৰক্ষা প্ৰট’কলৰ ওপৰত উন্নত নিৰীক্ষণ আৰম্ভ কৰে। এয়াৰ ইণ্ডিয়াৰ এগৰাকী মুখপাত্ৰই জনোৱা মতে, পাইলটৰ ৰিপ’ৰ্ট পোৱাৰ পিছতে নিয়ম অনুসৰি বিষয়টো ডিজিচিএক অৱগত কৰা হয়। ইয়াৰ পিছত বিমান ৰেকৰ্ডাৰৰ পৰা তথ্য লাভ কৰাৰ পিছত অধিক তদন্ত আৰম্ভ কৰা হয়। তদন্তৰ ফলাফল ওলোৱালৈকে পাইলটসকলক কৰ্তব্যৰ পৰা আঁতৰাই দিয়া হৈছে।
১৭ জুনত ডিজিচিএই বিমানখনৰ ৰক্ষণাবেক্ষণৰ সমস্যা সন্দৰ্ভত আনুষ্ঠানিকভাৱে উদ্বেগ প্ৰকাশ কৰিছিল আৰু সুৰক্ষাৰ ওপৰত মনোনিৱেশ কৰি বিমান সংস্থাটোক অভিযান্ত্ৰিক, পৰিচালনা আৰু গ্ৰাউণ্ড হেণ্ডলিং বিভাগৰ মাজত সমন্বয় বৃদ্ধি কৰিবলৈ নিৰ্দেশ দিছিল।
