জীৱনটো নৰক হৈ পৰিছে… কিয় বলীউডৰ জগতখন ত্যাগ কৰিলে তনুশ্ৰীয়ে?

তনুশ্ৰী দত্তক মনত আছেনে? এসময়ত বলীউডত তেওঁকলৈ চৰ্চা চলিছিল। ইমৰাণ হাছমীৰ সৈতে ‘আছিক বনয়া আপনে’ ছবিখনত তেওঁৰ গীতটো হয়টো মনত আছে? তনুশ্ৰীৰ বয়স এতিয়াও ৪০ বছৰ হোৱা নাই। অৱশ্যে কেইবাবছৰ মান পূৰ্বে তেওঁ অভিনয় জগতখন এৰি থৈ যায়। আনকি তেওঁৰ চেহেৰাৰো পৰিৱৰ্তন হৈছে। কিয় হঠাতে বলীউডৰ পৰা নোহোৱা হৈ গ’ল তনুশ্ৰী? পোনপটীয়াকৈ আঙুলিয়াইছে অভিনেত্ৰীগৰাকীয়ে একাংশ ‘বলিউড মাফিয়া’ক। #মিটু আন্দোলনত নানা পাটেকাৰৰ বিৰুদ্ধে মাত মতাৰ পিছত তেওঁৰ জীৱনটো নৰকত পৰিণত হোৱা বুলি এক সাক্ষাৎকাৰত দাবী কৰে।

২০১৮ চনৰ ২৬ ছেপ্টেম্বৰত দিয়া এক সাক্ষাৎকাৰত তনুশ্ৰীয়ে দাবী কৰে যে ২০০৯ চনৰ ‘হৰ্ণ ওকে প্লিজ’ ছবিৰ শ্বুটিংৰ সময়ত নানা পাটেকাৰে তেওঁক অনুমতি অবিহনে স্পৰ্শ কৰিছিল। ইজনৰ পিছত সিজন নায়িকা, বলীউডৰ প্ৰযোজক আৰু পৰিচালক তেওঁৰ বিৰুদ্ধে ওলাই আহিল। অৱশ্যে নানা পাটেকাৰৰ ক্ষেত্ৰত কথাবোৰ অলপ বেলেগ হৈ পৰিল।

প্ৰত্যক্ষদৰ্শীৰ বক্তব্য আৰু প্ৰমাণৰ বাবে এই গোচৰত নানা পাটেকাৰক ক্লিন চিট দিয়া হৈছিল। কিন্তু তনুশ্ৰী নিৰুদ্দেশ হৈ গ’ল। তনুশ্ৰী বঙালী হ’লেও জন্ম জমছেদপুৰত। অৱশ্যে বংগৰ সৈতে তেওঁৰ গভীৰ সম্পৰ্ক আছিল। বলীউডৰ পৰা নিৰুদ্দেশ হোৱাৰ পিছত তনুশ্ৰী বিদেশলৈ যায়। ২০২০ চনত দেশলৈ উভতি অহা তনুশ্ৰীয়ে ৰাজহুৱাভাৱে কয় যে তেওঁ নিবনুৱা হৈ পৰিছিল, কাৰণ তেওঁ বলীউডৰ সেই ডাঙৰ নামবোৰৰ বিৰুদ্ধে মাত মাতিছিল।