পৰিয়ালৰ আপত্তি থকা পাছতো হেমা মালিনীয়ে কিয় ধৰ্মেন্দ্ৰক বিয়া কৰালে?

১৯৮০ চনত বিবাহপাশত আবদ্ধ হৈছিল ধৰ্মেন্দ্ৰ আৰু হেমা মালিনী। সেই সময়ত বিয়াৰ লগে লগে শেষ হৈছিল বেছিভাগ অভিনেত্ৰীৰ কেৰিয়াৰ। অধিক সংখ্যক অভিনেত্ৰী ব্যস্ত হৈ পৰিছিল পৰিয়াল আৰু ল’ৰা-ছোৱালীক লৈ। কিন্তু তাৰ ব্যতিক্ৰম আছিল হেমা মালিনী। পৰিয়াল আৰু দুগৰাকী কন্যাক চোৱা-চিতা কৰাৰ সমান্তৰালকৈ অভিনয় কৰি গৈছিল হেমাই। এই ক্ষেত্ৰত তেওঁক সদায় সমৰ্থন কৰি আহিছিল ধৰ্মেন্দ্ৰই। তেওঁ কেতিয়াও হেমাক নিজৰ কাম বন্ধ কৰিবলৈ কোৱা নাছিল।

হেমাৰ ভাষাত “মই জন্ম আৰু ডাঙৰ-দীঘল হৈছিলোঁ এনে এটা পৰিয়ালত য’ত শিল্পক অতি প্ৰাধান্য দিয়া হৈছিল। সৰুৰে পৰা মই নৃত্য কৰি ভাল পাইছিলোঁ। মায়েও মই নৃত্যৰ লগত জড়িত কিবা এটা কৰাটো বিচাৰিছিল। ধৰ্মেন্দ্ৰৰ লগত বিয়াও মোৰ জীৱনৰ এক অতি গুৰুত্বপূৰ্ণ মুহূৰ্ত আছিল। ভাল কথাটো হ’ল যে, তেওঁ মোক কেতিয়াও কাম কৰাত বাধা দিয়া নাছিল। তেওঁৰ আবেগ এটা পেছালৈ পৰিণত হৈছিল। আমি ইজনে সিজনৰ কামত সদায় সহায় কৰিছিলোঁ। আমাৰ মাজত এক সুন্দৰ বুজাবুজি আছিল। আমি ইজনে সিজনক সময় দিলোঁ, যাৰ ফলত আমাৰ সম্পৰ্ক আৰু অধিক সুন্দৰ হৈ পৰিল।”

ধৰ্মেন্দ্ৰ আৰু হেমা মালিনী, প্ৰায় সংখ্যক বলিউড অনুৰাগীৰ প্ৰিয় দম্পতী। অনস্ক্ৰিন হওক বা অফস্ক্ৰিন, তেওঁলোকৰ কেমিষ্ট্ৰী সকলোৱে ভাল পাইছিল। কিন্তু তেওঁলোকৰ বিবাহ একেবাৰে সহজ নাছিল। ছিমি গৰেৱালে আয়োজন কৰা এটা টেলিভিছন শ্ব’ত ধৰ্মেন্দ্ৰক বিয়া কৰাবলৈ কিমান কঠিন আছিল সেই কথা প্ৰকাশ কৰে হেমা মালিনীয়ে। পৰিয়ালৰ তীব্ৰ আপত্তি থকাৰ পাছতো ধৰ্মেন্দ্ৰৰ সৈতে বিয়া হৈছিল হেমা।

হেমাই কয়, “ধৰ্মেন্দ্ৰ ধুনীয়া বুলি সকলোৱে মানি ল’ব। কিন্তু মই তেওঁৰ লগত কামহে কৰিছিলোঁ। মোৰ বিয়া হোৱাৰ কোনো পৰিকল্পনা নাছিল। কিন্তু মই ভাবিলোঁ, যদি বিয়া হ’ব লাগে তেন্তে তেওঁৰ দৰে কাৰোবাক বিয়া কৰাম। তেওঁ নহয় ! কিন্তু সেয়াই হ’ল।” হেমাই কয় যে, ধৰ্মেন্দ্ৰৰ সৈতে তেওঁৰ ঘনিষ্ঠতা বাঢ়িছিল। ইয়াৰ ওপৰত বহুত কাহিনী আৰম্ভ হ’ল। তাৰ পিছত এদিন হেমাই ধৰ্মেন্দ্ৰক ক’লে যে, এইবাৰ তেওঁলোকৰ বিয়া হ’ব লাগিব। ধৰ্মেন্দ্ৰই লগে লগে মান্তি হ’ল।

প্ৰথম বিবাহৰ পাছত ধৰ্মেন্দ্ৰ চাৰিটা সন্তানৰ পিতৃ আছিল। দুজন পুত্ৰ ছানি আৰু ববি দেউল। দুই কন্যা বিজিতা আৰু অজিতা। সেইবাবেই হেমাৰ পৰিয়ালৰ লোকে নিজৰ জীয়েকক ধৰ্মেন্দ্ৰৰ দৰে মানুহলৈ বিয়া দিবলৈ সন্মত নাছিল। হেমাই কয় যে, সেই সময়ত তেওঁ কাৰো কথা শুনা নাছিল। বৰং তেওঁ ধৰ্মেন্দ্ৰক স্বামী হিচাপে গ্ৰহণ কৰিব বিচাৰিছিল।