অসম ৰাজ্যিক চলচ্চিত্ৰ বঁটাৰ বাবে মনোনয়ন পত্ৰৰ আহ্বানঃ ৰাজ্যিক চলচ্চিত্র নিগমে প্ৰকাশ কৰিলে জাননী

অসম ৰাজ্যিক চলচ্চিত্র সমাৰোহ প্রতিযোগিতা সন্দৰ্ভত এক জাননী জাৰি কৰিছে অসম ৰাজ্যিক চলচ্চিত্র (বিত্ত আৰু উন্নয়ন) নিগমে। এই জাননীৰ জৰিয়তে নিগমে অসম ৰাজ্যিক চলচ্চিত্র সমাৰোহ প্রতিযোগিতাৰ ২০২০ বর্ষ আৰু ২০২১ বর্ষ শিতানত মনোনয়ন পত্ৰৰ আহ্বান জনাইছে। অসম ৰাজ্যিক চলচ্চিত্র (বিত্ত আৰু উন্নয়ন) নিগমে জাননীখনত উল্লেখ কৰা মতে, অসম ৰাজ্যিক চলচ্চিত্র সমাৰোহ প্রতিযোগিতাৰ ২০২০ বর্ষ শিতানত ১ জানুৱাৰীৰ পৰা ২০২০ চনৰ ৩১ ডিচেম্বৰৰ ভিতৰত চেন্সৰ বোর্ডৰ দ্বাৰা অনুমোদিত চলচ্চিত্রসমূহে অংশ গ্রহণৰ যোগ্যতা অর্জন কৰিব।

একেদৰে ২০২১ বর্ষ শিতানত ২০২১ চনৰ ১ জানুৱাৰীৰ পৰা ২০২১ চনৰ তাৰিখৰ ভিতৰত ৩১ ডিচেম্বৰৰ ভিতৰত চেন্সৰ বোর্ডৰ দ্বাৰা অনুমোদিত চলচ্চিত্রসমূহে অংশ গ্রহণৰ যোগ্যতা অর্জন কৰিব। প্রতিযোগিতাত অংশ গ্রহণার্থে অসমৰ বিভিন্ন ভাষাৰ কাহিনী, অ-কাহিনী চিত্র (তথ্যচিত্র আৰু চুটি ছবি) সমূহৰ প্রযোজকসকলে অহা ২২ ছেপ্টেম্বৰৰ ভিতৰত মনোনয়ন পত্র জমা দিব লাগিব।

জাননীখনত উল্লেখ কৰা মতে, প্রযোজকসকলে অহা ১ ছেপ্টেম্বৰৰ পৰা ১০০ টকা জমা দি অসম ৰাজ্যিক চলচ্চিত্র (বিত্ত আৰু উন্নয়ন) নিগম পৰিসীমিতৰ কাৰ্যালয়ৰ পৰা নির্দিষ্ট প্র-পত্র সংগ্ৰহ কৰি অহা ২২ ছেপ্টেম্বৰৰ ভিতৰত চেন্সৰ বোৰ্ডৰ দ্বাৰা অনুমোদিত চলচ্চিত্ৰসমূহৰ প্রিন্ট, MOV, BLU RAY, Pen Drive ফর্মেটত মনোনয়ন পত্রসহ জমা দিব লাগিব।

অসম ৰাজ্যিক চলচ্চিত্র (বিত্ত আৰু উন্নয়ন) নিগমৰ নামত বেংক চেক বা ড্রাফ্টযোগে কাহিনী চিত্ৰৰ বাবদ ৫০০০ টকা আৰু অ-কাহিনী চিত্ৰৰ বাবদ ২০০০ টকা জমা দিয়াৰ লগতে প্রয়োজনীয় নথি-পত্ৰ পৰিচালন সঞ্চালক, অসম ৰাজ্যিক চলচ্চিত্র (বিত্ত আৰু উন্নয়ন) নিগমৰ কার্যালয়ত জমা দিব লাগিব বুলি জাননীখনত উল্লেখ কৰা হৈছে।

২০১০ চনৰ পৰা ৰাজ্যিক চলচ্চিত্র সমাৰোহৰ পুৰস্কাৰ শিতানত বিশিষ্ট সাংবাদিক, সমালোচক স্বর্গীয় পবিত্র কুমাৰ ডেকাৰ সোঁৱৰণত শ্রেষ্ঠ চলচ্চিত্র সমালোচকৰ বঁটা প্ৰদান কৰি অহা হৈছে। চলচ্চিত্ৰৰ ওপৰত বিশেষ লেখাৰ (গ্রন্থ আৰু প্রকাশিত প্রবন্ধ) বাবে এই বঁটা দিবলৈ সিদ্ধান্ত গ্রহণ কৰা হৈছে।

সেয়েহে আগন্তুক নৱম অসম ৰাজ্যিক চলচ্চিত্র বঁটা সমাৰোহত এই বঁটা প্রাপক নিৰ্বাচনৰ বাবে অসমৰ চলচ্চিত্র সমালোচকসকলৰ পৰা ২০২০ চনৰ ১ জানুৱাৰীৰ পৰা ৩১ ডিচেম্বৰ আৰু ২০২১ চনৰ ১ জানুৱাৰীৰ পৰা ৩১ ডিচেম্বৰৰ ভিতৰত প্রকাশিত গ্রন্থ তথা লেখা আদি (৪টা প্রতিলিপি) অসম ৰাজ্যিক চলচ্চিত্র (বিত্ত আৰু উন্নয়ন) নিগমৰ কাৰ্যালয়ত  অহা ২২ ছেপ্টেম্বৰৰ ভিতৰত জমা দিবলৈ অনুৰোধ জনোৱা হৈছে।