টাটা ট্ৰাষ্টত বৃহৎ অথন্তৰ! ৰতন টাটাৰ অত্যন্ত বিশ্বস্ত এইগৰাকী কৰ্মচাৰীক বৰ্খাস্ত কোম্পানীৰ

দেশৰ অন্যতম বৃহৎ তথা সম্ভ্ৰান্ত ব্যৱসায়িক গোষ্ঠী টাটা গ্ৰুপত অক্টোবৰ মাহত পুনৰবাৰ এক প্ৰকাৰ অস্থিৰ পৰিস্থিতিৰ সৃষ্টি হৈছে। ২০১৬ চনত চাইৰাছ মিষ্ট্ৰীক অধ্যক্ষ পদৰ পৰা বৰ্খাস্ত কৰাটো এতিয়াও বহুতৰে মনত সতেজ হৈ আছে। এতিয়া আন এজন মিষ্ট্ৰীৰ প্ৰস্থানৰ খবৰে কৰ্পৰেট জগতখনক আচৰিত কৰি তুলিছে।

এইবাৰ প্ৰয়াত ৰতন টাটাৰ ঘনিষ্ঠ বুলি গণ্য কৰা মেহলী মিষ্ট্ৰীক টাটা ট্ৰাষ্টৰ পৰা প্ৰস্থানৰ দুৱাৰ দেখুৱাইছে সংস্থাটোৱে। এই সিদ্ধান্তই টাটা ছন্সৰ হোল্ডিং কোম্পানী ছাৰ ৰতন টাটা ট্ৰাষ্ট (এছ আৰ টি টি) আৰু ছাৰ ডোৰাবজী টাটা ট্ৰাষ্ট (এছ ডি টি টি)ৰ ভিতৰত এক বৃহৎ উত্তাল পৰিস্থিতিৰ সৃষ্টি কৰিছে, য’ত মেহলীৰ কাৰ্যকাল বৃদ্ধিৰ বাবে অনুমোদন দিয়া হোৱা নাই।

কেনেকৈ সমাপ্ত হ’ল মেহলী মিষ্ট্ৰীৰ কাৰ্যকাল?

দৰাচলতে টাটা ট্ৰাষ্টৰ চিইঅ’ সিদ্ধাৰ্থ শৰ্মাই যোৱা শুকুৰবাৰে মিষ্ট্ৰীৰ কাৰ্যকাল তিনি বছৰৰ বাবে বৃদ্ধিৰ প্ৰস্তাৱ আগবঢ়াইছিল। ইকনমিক টাইমছত প্ৰকাশিত এক প্ৰতিবেদন অনুসৰি ট্ৰাষ্টী দাৰিয়াছ খাম্বাট্টা, প্ৰমিত ঝাভেৰী আৰু জাহাংগীৰে এই প্ৰস্তাৱত সন্মতি প্ৰকাশ কৰে। কিন্তু যেতিয়া টাটা ট্ৰাষ্টৰ অধ্যক্ষ নোৱেল টাটা (ৰতন টাটাৰ ভাতৃ), ভাইচ চেয়াৰমেন বেনু শ্ৰীনিবাসন, আৰু ট্ৰাষ্টী বিজয় সিঙে এই প্ৰস্তাৱৰ বিৰুদ্ধে ভোটদান কৰে তেতিয়া মিষ্ট্ৰীৰ কাৰ্যকাল কাৰ্যকৰীভাৱে স্তব্ধ হৈ পৰে।

‘অক্টোবৰ’ৰ কাকতলীয় সংযোগ

এইটো এটা আচৰিত কাকতলীয় সংযোগ যে মেহলী মিষ্ট্ৰীক সেই একেটা মাহতে অপসাৰণ কৰা হৈছে, আজিৰ পৰা কিছু বছৰ পূৰ্বে যিটো মাহত (২০১৬ চনৰ অক্টোবৰ মাহত) তেওঁৰ সম্পৰ্কীয় ভাতৃ চাইৰাছ মিষ্ট্ৰীক টাটা সন্সৰ অধ্যক্ষৰ পৰা নাটকীয়ভাৱে অপসাৰণ কৰা হৈছিল। মেহলীও একেটা পৰিয়ালৰ সদস্য। এই ঘটনাই অক্টোবৰ মাহটো পুনৰবাৰ টাটা গ্ৰুপৰ বাবে অস্থিৰ মাহ কৰি তুলিছে।

মেহলী মিষ্ট্ৰী কোন?

টাটা গ্ৰুপৰ প্ৰাথমিক হোল্ডিং কোম্পানী টাটা ছন্সত টাটা ট্ৰাষ্টৰ ৬৬% অংশীদাৰিত্ব আছে। এই ট্ৰাষ্টৰ ভিতৰত দুটা ডাঙৰ ট্ৰাষ্ট আছে: ছাৰ দোৰাবজী টাটা ট্ৰাষ্ট (এছডিটিটি) আৰু ছাৰ ৰতন টাটা ট্ৰাষ্ট (এছআৰটিটি), যিবোৰে একেলগে টাটা ছন্সত ৫১% সংখ্যাগৰিষ্ঠ অংশীদাৰিত্ব লাভ কৰিছে। অৰ্থাৎ এই ট্ৰাষ্টসমূহৰ সিদ্ধান্তই টাটা গ্ৰুপৰ দিশ নিৰ্ধাৰণ কৰে।

মেহলী মিষ্ট্ৰীৰ সন্দৰ্ভত ক’বলৈ গ’লে তেওঁ এম পল্লনজী গ্ৰুপ অৱ কোম্পানীৰ প্ৰমোটাৰ। এই গোটটোৱে ঔদ্যোগিক পেইন্টিং, জাহাজ চলোৱা, ড্ৰেজিং, গাড়ী বিক্ৰেতা আদি বিভিন্ন খণ্ডত কাম কৰে। তাৎপৰ্যপূৰ্ণভাৱে তেওঁৰ ব্যৱসায়ৰ সৈতে কেইবাটাও টাটা কোম্পানী জড়িত বা অংশীদাৰ হৈ আহিছে। তদুপৰি তেওঁ ব্ৰিচ কেণ্ডি হাস্পতাল ট্ৰাষ্টৰো ট্ৰাষ্টী। তেওঁৰ সম্পৰ্ক কেৱল ব্যৱসায়ত সীমাবদ্ধ নাছিল; তেওঁক প্ৰয়াত ৰতন টাটাৰ ঘনিষ্ঠ বুলি গণ্য কৰা হৈছিল।

ৰতন টাটাৰ মৃত্যুৰ পিছত গোটটোৱে স্থিৰতা বিচাৰি পাব বুলি আশা কৰা হৈছিল যদিও ট্ৰাষ্টৰ ভিতৰত চলি থকা অস্থিৰতাই বেলেগ কাহিনীৰহে সূত্ৰপাত ঘটাইছে। সূত্ৰই লগতে প্ৰকাশ কৰিছে যে শেহতীয়াকৈ টাটা গ্ৰুপৰ একাংশ শীৰ্ষ বিষয়াই দুগৰাকী জ্যেষ্ঠ কেন্দ্ৰীয় মন্ত্ৰীক সাক্ষাৎ কৰিছিল।