গ’ল্ড লোনৰ ক্ষেত্ৰত ৰিজাৰ্ভ বেংকৰ নতুন নিয়ম, লাভ হ’ব নে লোকচান, জানি লওক

আমাৰ সকলোৰে ঘৰত এপদ-দুপদ হ’লেও সোণৰ আল-অলংকাৰ থাকে । এই অলংকাৰ কেৱল সৌন্দৰ্যবৰ্ধনৰ বাবে পৰিধান কৰিবলৈ নহয়, আপদে-বিপদে আৰ্থিক সকাহ প্ৰদানৰ বাবে ই এক সম্পদ । এই সোণৰ বিপৰীতে আপুনি বেংকৰ পৰা ঋণ ল’ব পাৰে ।

এতিয়া ভাৰতীয় ৰিজাৰ্ভ বেংকে এই সোণৰ বাবদ ঋণ গ্ৰহণৰ নিয়ম সলনি কৰিবলৈ ওলাইছে । এই নতুন নিয়ম ২০২৬ চনৰ ১ এপ্ৰিলৰ পৰা কাৰ্যকৰী হোৱাৰ সম্ভাৱনা আছে । এনে পৰিস্থিতিত ইয়াৰ দ্বাৰা সাধাৰণ মানুহ লাভৱান হ’ব নে লোকচানৰ সন্মুখীন হ’ব সেয়া জনাটো অতি প্ৰয়োজনীয়?

শেহতীয়াকৈ RBI ৰ গৱৰ্ণৰ সঞ্জয় মালহোত্ৰাই যেতিয়া মুদ্ৰানীতিৰ পৰ্যালোচনা দাঙি ধৰে, তেতিয়া তেওঁ কয় যে গ’ল্ড লোনৰ বাবে এই নতুন নিৰ্দেশনাসমূহ আচলতে ইয়াৰ বিভিন্ন অৰ্ডাৰক একে ঠাইলৈ অনাৰ এক উপায় । একে সময়তে ই বেংকৰ পৰা নন-বেংকিং ফাইনেন্স কোম্পানী (এন বি এফ চি)লৈকে গ’ল্ড লোনৰ নিয়ম একাকাৰ কৰি তোলাৰ কাম কৰিব ।

নতুন গ’ল্ড লোনৰ নিয়মত এইবোৰ কথা মনত ৰখা হৈছে

RBI য়ে কয় যে গ’ল্ড লোনৰ সৈতে জড়িত নতুন নিয়মত কিছুমান বিশেষ কথাৰ ওপৰত গুৰুত্ব আৰোপ কৰা হৈছে । এইবোৰে গ’ল্ড লোন খণ্ডত ঋণগ্ৰহণকাৰীক সুৰক্ষা প্ৰদান কৰিব । গ’ল্ড লোন খণ্ডত স্বচ্ছতা আনিব, লগতে বাণিজ্যিক বেংকৰ দৰে ঋণ দিয়া বিত্তীয় প্ৰতিষ্ঠানসমূহৰ জবাবদিহিতা নিৰ্ধাৰণ কৰিব ।

গ্ৰাহকৰ বাবে সুবিধা আৰু অসুবিধা

গ’ল্ড লোনৰ ক্ষেত্ৰত RBI ৰ নতুন নিয়মত বহু বিধান আছে । আমি আপোনালোকক সেইবোৰৰ বিষয়ে ক’ম, যাৰ দ্বাৰা আপুনি নিজেই অনুমান কৰিব পাৰে যে এই নিয়ম আপোনাৰ বাবে উপকাৰী নে নহয় ?

• নতুন নিয়মত স্পষ্টকৈ উল্লেখ আছে যে ২.৫ লাখ টকা পৰ্যন্ত গ’ল্ড লোন লোৱাসকলে বন্ধকত দিয়া সোণৰ মূল্যৰ বিপৰীতে ৮৫ শতাংশ পৰ্যন্ত ঋণ লাভ কৰিব । ইয়াৰ ভিতৰত ঋণৰ সুতো অন্তৰ্ভুক্ত হ’ব । আগতে ই সোণৰ মূল্যৰ ৭৫ শতাংশৰ সমান আছিল আৰু ইয়াত সুত অন্তৰ্ভুক্ত কৰা হোৱা নাছিল । বহু নন-বেংকিং ফাইনেন্স কোম্পানীয়ে মাত্ৰ ৬৫ শতাংশ গ’ল্ড লোন দি আছিল ।
• নতুন নিয়ম অনুসৰি ২.৫ লাখ টকাৰ কম মূল্যত গ’ল্ড লোন লোৱাসকলে আয় মূল্যায়ন বা ক্ৰেডিট চেক কৰাৰ প্ৰয়োজন নহ’ব । ইয়াৰ দ্বাৰা কম আয়ৰ গোটৰ লোক বা ক্ষুদ্ৰ ঋণ লোৱা লোকসকল উপকৃত হ’ব ।
• গ’ল্ড লোনৰ বাবে মূলধন আৰু সুত একেলগে পৰিশোধ কৰা হ’ব । ইয়াৰ কিস্তি মাত্ৰ ১২ মাহৰ হ’ব । অৰ্থাৎ এবছৰৰ ভিতৰত ঋণ সম্পূৰ্ণৰূপে পৰিশোধ কৰিব লাগিব ।
• গ’ল্ড লোনৰ বাবে আপুনি কিমান সোণ বন্ধকত ৰাখিব পাৰে আৰু ইয়াত কিমান সোণ কাৰ উপাদান হ’ব সেয়াও স্পষ্ট কৰি দিছে RBI য়ে । উদাহৰণস্বৰূপে, গ’ল্ড লোনৰ বাবে মাত্ৰ ১ কেজি সোণৰ গহনা বন্ধকত ৰাখিব পাৰিব, ইয়াৰ ভিতৰত সৰ্বোচ্চ সীমা ৫০ গ্ৰাম সোণৰ মুদ্ৰা অন্তৰ্ভুক্ত হ’ব ।
• গ’ল্ড লোনৰ লগতে এতিয়া আপোনাক ৰূপৰ ওপৰতো ঋণৰ প্ৰস্তাৱ দিয়া হ’ব । অৰ্থাৎ ৰূপৰ গহনা আৰু মুদ্ৰাৰ বিপৰীতে নগদ ঋণ ল’ব পাৰিব ।
• গ’ল্ড লোন প্ৰদান কৰা কোম্পানীসমূহৰ দায়িত্বও নিৰ্ধাৰণ কৰিছে RBI য়ে । যেনেকৈ ঋণ বন্ধ হোৱাৰ পিছত তেওঁলোকে বন্ধকত দিয়া সোণ বা ৰূপ নিৰ্দিষ্ট সময়সীমাৰ ভিতৰত ঘূৰাই দিব লাগিব, নহ’লে ক্ষতিপূৰণ দিব লাগিব । যদি বন্ধকত দিয়া সোণ হেৰাই যায় বা তাত কোনো ধৰণৰ ক্ষতি হয়, তেন্তে ইয়াৰ বাবে কোম্পানী দায়ী হ’ব আৰু তাৰ ক্ষতিপূৰণ দিব লাগিব ।
• কেৱল এয়াই নহয়, গ’ল্ড লোনৰ বাবে যি নথি-পত্ৰ প্ৰস্তুত কৰা হ’ব, সোণৰ কেৰেট, ইয়াৰ পৰিমাণ, যদি হীৰা বা অন্যান্য ৰত্ন ষ্টাড কৰা হয়, তেন্তে স্বচ্ছভাৱে চুক্তিখনত ইয়াৰ পৃথক ওজনৰ কথা উল্লেখ কৰিব লাগিব । আনহাতে যদি ঋণ পৰিশোধ কৰাত ডিফল্ট হয়, তেন্তে ইয়াৰ সম্পূৰ্ণ তথ্য প্ৰদান, নিলামৰ পূৰ্বে ঋণ লোৱাজনক জাননী দিয়া আদি প্ৰক্ৰিয়া সম্পূৰ্ণ কৰিব লাগিব ।