যদি আপোনাৰ PF একাউণ্ট আছে তেন্তে ৭ লাখ টকা পৰ্যন্ত পাব বীমা, দিব নালাগে কোনো প্ৰিমিয়াম, জানি লওক সবিশেষ

লাখ লাখ নিয়োজিত লোকৰ বাবে কৰ্মচাৰীৰ ভৱিষ্য নিধি (EPF) একাউণ্টৰ অৰ্থ হ’ল অৱসৰৰ পিছত এককালীন ধন বা বৃদ্ধ বয়সৰ বাবে পেঞ্চন। কিন্তু এই চেভিংছ একাউণ্টত এনে এটা সুবিধা আছে যিটোৰ বিষয়ে বেছিভাগ কৰ্মচাৰীয়েই অজ্ঞাত। এই সুবিধা হৈছে ৭ লাখ টকা পৰ্যন্ত বিনামূলীয়া জীৱন বীমা।

যদি আপুনি EPFৰ সদস্য হয় তেন্তে আপোনাক কৰ্মচাৰী ভৱিষ্য নিধি সংস্থাৰ (EPFO) বিশেষ আঁচনিৰ অধীনত সামৰি লোৱা হয়। যিয়ে আপোনাৰ পৰিয়ালক আৰ্থিক সুৰক্ষা প্ৰদান কৰে। এই সুবিধাক কৰ্মচাৰী জমা সংযুক্ত বীমা (EDLI) আঁচনি বোলা হয়। এই আঁচনিৰ আটাইতকৈ গুৰুত্বপূৰ্ণ বৈশিষ্ট্য হ’ল কৰ্মচাৰীজনৰ দৰমহাৰ পৰা কোনো ধৰণৰ ধন কৰ্তন কৰা নহয়। এই বীমা সম্পূৰ্ণৰূপে কোম্পানীয়ে বহন কৰে।

EDLI আঁচনি কি?

EDLI বা কৰ্মচাৰী জমা সংযুক্ত বীমা আঁচনি হৈছে EPFO ই ইয়াৰ সকলো সদস্যক আগবঢ়োৱা জীৱন বীমা পলিচি। EPF আৰু EPS (কৰ্মচাৰীৰ পেঞ্চন আঁচনি)ৰ লগতে ই তৃতীয়টো ডাঙৰ সুবিধা। ইয়াক আপোনাৰ PF একাউণ্টৰ সৈতে লিংক কৰা হয়। যেতিয়ালৈকে আপুনি এজন সক্ৰিয় EPF সদস্য, তেতিয়ালৈকে আপুনি এই বীমাৰ অধীনত থাকিব।

মানুহে প্ৰায়ে ধৰি লয় যে বীমা থাকিলে প্ৰিমিয়াম থাকিব লাগিব। কিন্তু সেয়া নহয়। এই আঁচনিৰ সম্পূৰ্ণ প্ৰিমিয়াম আপোনাৰ নিয়োগকৰ্তাই দিয়ে। নিয়ম অনুসৰি আপোনাৰ নিয়োগকৰ্তাই প্ৰতিমাহে আপোনাৰ দৰমহাৰ (বেচিক + ডি এ) ০.৫% EDLI আঁচনিত অৱদান আগবঢ়ায়। কৰ্মচাৰীৰ দৰমহাৰ পৰা কোনো কৰ্তন নহয়, গতিকে সম্পূৰ্ণ বিনামূলীয়া। সংগঠিত খণ্ডৰ লাখ লাখ শ্ৰমিকক সামাজিক সুৰক্ষাৰ মৌলিক আৱৰণ প্ৰদানৰ বাবে এই আঁচনি আৰম্ভ কৰা হৈছিল।

৭ লাখ টকা পৰ্যন্ত এই বীমা কেতিয়া পোৱা যায়?

এই বীমা কভাৰ কৰ্মচাৰীজনৰ মৃত্যুৰ পিছত তেওঁলোকৰ সেৱাৰ সময়ছোৱাত সক্ৰিয় হয়। অৰ্থাৎ যদি কোনো কৰ্মচাৰীয়ে কৰ্মৰত অৱস্থাত দুৰ্ভাগ্যজনকভাৱে মৃত্যুবৰণ কৰে (কাৰ্যালয়তেই হওক, ঘৰতেই হওক, বা ছুটীতেই হওক) তেন্তে বীমাৰ ধনৰাশি তেওঁলোকৰ পৰিয়াল বা মনোনীত ব্যক্তিক প্ৰদান কৰা হয়। এই আঁচনিখন গুৰুত্বপূৰ্ণ কাৰণ ইয়াৰ দ্বাৰা এটা পৰিয়ালৰ হঠাৎ আৰ্থিক সংকট হ’লে তাৎক্ষণিকভাৱে সকাহ পোৱা যায়।

এই আঁচনিৰ অধীনত উপলব্ধ ন্যূনতম ধন ২.৫ লাখ আৰু সৰ্বোচ্চ ৭ লাখ টকা। এই ধনৰাশি কৰ্মচাৰীজনৰ শেহতীয়া ১২ মাহৰ দৰমহা আৰু তেওঁলোকৰ PF একাউণ্টত থকা বেলেঞ্চৰ ওপৰত ভিত্তি কৰি নিৰ্ধাৰণ কৰা হয়। PF কৰ্তন কৰা প্ৰতিজন কৰ্মচাৰীয়ে এই আঁচনিৰ সুবিধা লাভ কৰে।

আপুনি স্থায়ী কৰ্মচাৰী হওক বা চুক্তিত কাম কৰি হওক, কোনো কথা নাই। যদি আপোনাৰ PF একাউণ্ট আছে, তেন্তে আপুনি EDLI ৰ সদস্য। কিন্তু অসমৰ চাহ বাগিচাৰ শ্ৰমিকৰ ক্ষেত্ৰত এই আঁচনি প্ৰযোজ্য নহয়; ইয়াৰ বাবে পৃথক পৃথক ব্যৱস্থা আছে।

কোম্পানী গাফিলতিৰ নিয়ম কি কি?

কৰ্মচাৰীৰ স্বাৰ্থ সুৰক্ষিত কৰিবলৈ EPFO ই এই আঁচনিৰ বাবে কঠোৰ নিয়ম স্থাপন কৰিছে। প্ৰতিজন কৰ্মচাৰীৰ বাবে ০.৫% EDLI অৱদান সময়মতে জমা কৰাটো নিয়োগকৰ্তাৰ একমাত্ৰ দায়িত্ব। যদি কোনো নিয়োগকৰ্তাই তেনে কৰিব নোৱাৰে বা গাফিলতি কৰে তেন্তে প্ৰতিমাহে ১% জৰিমনা বিহা হয়। নিয়োগকৰ্তাই এই জৰিমনা নিজৰ পকেটৰ পৰা দিব লাগে, যিটো তেওঁলোকে কৰ্মচাৰীজনৰ পৰা আদায় কৰিব নোৱাৰে।

কিন্তু কিছুমান বিশেষ পৰিস্থিতিত, যেনে কোম্পানীটোৱে যদি গুৰুতৰ আৰ্থিক সংকটৰ সন্মুখীন হৈছে বা পৰিচালনাৰ ডাঙৰ সমস্যা আছে, তেন্তে ব’ৰ্ডে এই শাস্তি হ্ৰাস বা ৰেহাই দিব পাৰে, কিন্তু ই ব্যতিক্ৰম। এই আঁচনিৰ মূল উদ্দেশ্য হৈছে কৰ্মচাৰীজনৰ পৰিয়ালে যাতে প্ৰয়োজনৰ সময়ত আৰ্থিক সাহায্য লাভ কৰাত কোনো ধৰণৰ বাধাৰ সন্মুখীন নহয়। দাবী প্ৰক্ৰিয়াটোও যথেষ্ট পোনপটীয়া। মনোনীত ব্যক্তি বা আইনী উত্তৰাধিকাৰীয়ে দাবী কৰিলে ২০ দিনৰ ভিতৰত বীমাৰ ধন পৰিশোধ কৰা হয়।

৭ লাখ টকাৰ সম্পূৰ্ণ হিচাপ

এতিয়া আটাইতকৈ গুৰুত্বপূৰ্ণ প্ৰশ্নটো হ’ল এই সৰ্বোচ্চ ৭ লাখ টকাৰ পৰিমাণ কেনেকৈ নিৰ্ধাৰণ কৰা হয়। বীমাৰ পৰিমাণ দুটা ভাগত হিচাপ কৰা হয়। প্ৰথম অংশটো কৰ্মচাৰীজনৰ শেহতীয়া ১২ মাহৰ গড় মাহিলী দৰমহাৰ ওপৰত ভিত্তি কৰি, আৰু দ্বিতীয় অংশটো তেওঁৰ PF একাউণ্টত থকা পুঁজিৰ ওপৰত ভিত্তি কৰি কৰা হয়।

গণনাৰ সূত্ৰটো হ’ল- (শেহতীয়া ১২ মাহৰ গড় মাহিলী দৰমহা x ৩৫) + (PF একাউণ্টত থকা পুঁজিৰ ৫০%)। মন কৰিবলগীয়া যে গড় মাহিলী দৰমহা গণনাৰ সৰ্বোচ্চ সীমা ১৫,০০০ টকা। একেদৰে PF পুঁজিৰ অংশৰ সৰ্বোচ্চ সীমা ১.৭৫ লাখ টকা। এইদৰে (১৫,০০০ x ৩৫ টকা) = ৫,২৫,০০০ টকা + ১,৭৫,০০০ টকা= ৭,০০,০০০ টকা।